LIWI 4 - OTSAO BAIBEL (BSI)

Chakchax-jansax Ochax Tö Koxkya

¹ Ilaxle Jowanpae Mosa ang kaxtom koxle

² Israel khünaknu hama, chaktung ma chichang koxlechu owawae ochax lyenle Jowanpa kaxtom wanlom pünle jangchang, hwome ibu wanlom zomzingle chang angkya oli.

³ Nguakhoe ochax lyenlaxle khünaknu hato thaikya sikngün apüikya jangchang, chixe ofwot chizaikya maihupongsa tuita, ochax tö hanpak ang Jowanpa ang kox angkya changle.

⁴ Chixe ija maihupongsa khünaknu Nyihom fülom ma Jowanpa hato apüile kox angkya changle. Chixe ija müi khangkho ma chix chak dan ilaxle Jowanpa tunthoma ija lang angkya changle.

⁵ Ilaxle münga füi lilaxle zünle kopkya Nguakhoe ija maihupongsa aji a Nyihom to anopüi.

⁶ Chixe ija to chix chakkhi füi thulaxle otsao tuknyi thünthochi ma anüt ma saküi.

⁷ Ilaxle Nyihom ma tüikya, ongan müikya so zokkya tö-tsapbu oja Jowanpa pomtho ma tüipuix, nguapae ibu to aji füi lyetüi; ifüima aji pangwüi, Nyihom fülom ma tüikya, zokle ashunle tö koxkya tö-tsap chitong ma ija thoküi.

⁸ Ija müi angkya ozao pangwüi, oshin-howok ma tüikya ozaobu,

⁹ mongsa otom anyi hia ima tüikya ozao, okhax sümüikya kha, ibu laxüi.

¹⁰ Nguapae ija ozao laxüi ilaxle ija a zokle ashunkya tö koxkya tö-tsap ma zokle ashunüi. Chixe ija a notom-tusüi tö koxpongma koxkya müizao füi mokpupule moküi.

¹¹ Ikoxlechu chixe ija okhwon, ohak, okhang, ochakbu, okhax-omong, oche chuwüi, ibu pangwüi kopüi,

¹² ilaxle ibu zanglom ma otsao nui pom homtho to alaiüi, ilaxle wündix thokle awütkya nui to ha füi ibu zokle ashunüi.

¹³ Anaole chitsing laxle Israel khünaknu othomthome ochax lyen, ikoxle ija noknu miksho ma pyenle thom, ilaxle Jowanpae taxmokle abaxkya tütali thaile moklaxle ochax kople jangtüiba;

¹⁴ chemtue chem ma hwom thaidaolaxpuix, ija awanle changkya zuma, ima wüi othome ochax tö hanpak ang huzanpong tuita tö koxüi. Ija a Jowanpa Ngwotnui Nyihom to apüilaxle koxüi.

¹⁵ Israel khünaknu tüichong-mixmüibue Jowanpa pomtho ma ija müi okhang ma hwom chakbu danüi. Ija müi a chix tunthoma langüi.

¹⁶ Nguakhoe ija müi aji Nyihom to apüiüi.

¹⁷ Chixe ija aji to chix chakkhi füi thulaxle atsyenkya nyinu tunthoma, Jowanpa pomtho ma othom anüt ma saküi.

¹⁸ Nyihom mongkha ma tüikya ongan müikya tö zokle kox angkya tö-tsap ma tüikya müizongbu to chixe aji füi hidaopong lyetüi ilaxle ota tüikyabu a fülom angkya zokle ashunle tö kox angkya tö-tsap chitong ma thoküi.

¹⁹ Ifüima chixe ija angkya müizao pangwüi alaile laxüi ilaxle tö-tsap dingma ija komkaile zokle ashunüi.

²⁰ Ochax tö kox angkya maihupong to chemle changpuix ilailaile chixe ija müi to chuwüi changüi. Ile chixe khünaknu hanpak ang tö koxüi ilaxle khünaknu ang thailakkya tüiüi.

²¹ Ifüima chixe maihupong pom kotho to alaiüi ilaxle ija zokle ashunüi. Ija a chixe chix ochax hanpak ang koxkya maihupong zokle ashunkya lailaile changüi. Khünaknu ochax hünle pao angkya ochax tö koxkya a ija changle.

²² Ikoxle ochax lyenkya mix a lompa tuita jangchang ilaxle chaktung ma chichang koxlechu Jowanpa kaxtom amakya tuita ang jang achang,

²³ chix ang ija ochax apuale fakya füi tomle, chixe chix tö hanpak ang ofwot chitüikya zwonpong tuita apüiüi.

²⁴ Chixe ija müi khangkho ma chix chak danüi ilaxle tö-tsap zongma shuakux chikao ma ija langüi, ija a zokle ashunkya tö kox angkya müibu langkya khama changüi. Ija a ochax hünle pao angkya hanpakma koxkya tö changle.

²⁵ Nguapae ija müiji khato chix chakkhi somüi, ija füi tö-tsap angkya müizongbu to hidaopong lyetüi, ilaxle mama ajibu a tö-tsap chitong ma thokle liüi.

²⁶ Notom-tusüi hanpak ang koxkya tö müizao chemle zokle ashunpuix ilailaile chixe tö-tsap dingma ija müizao zokle ashunüi. Ile nguapae lompa tuita ochax hanpakma tö koxüi, ilaxle chix ang ija ochax thailakkya tüiüi.

²⁷ Khünak owawae ochax lyen ilaxle chaktung ma chichang koxlechu ija Jowanpa kaxtombu kax ma chilaxkya ang achang,

²⁸ ochax awanle lax ang kopkya füi tomle, nange nang hanpakma ofwot chitüikya zwonnu tuita apüi angkya changle.

²⁹ Nange ija müi okhang ma nang chak danüi ilaxle tö-tsap zongma shuakuxchi ma ija langüi. Ija a zokle ashunle kox angkya tö müibu langkya kha ma changüi.

³⁰ Nguapae chix chakkhi ija müi aji to somüi, tö-tsap angkya müizongbu to ija füi hidaopong paüi, ilaxle aji mamabu a tö-tsap chitong ma thokle liüi.

³¹ Ifüima chixe ija angkya müizao komkaile alaiüi, Ija a notom-tusüi to hanpak ang langkya müizaobu alaikya ningle changüi, ilaxle chixe ija Jowanpa zongto ongan müikya tö tuita ang tö-tsap ding ma zokle ashunüi. Ile nguapae khünak tuita hanpakma tö koxüi ilaxle ija khünak ang chix ochax thailak tüiüi.

³² Nange ochax tö hanpak ang chun tuita apüile jangchang thüiningle, ija a ofwot chitüikya honu tuita chang angkya oli.

³³ Nange ija müi khangkho ma nang chak danüi ilaxle zokle ashun angkya tö langkya nui ma, tö-tsap zongma shuakuxchi ma langüi.

³⁴ Nguapae ija müi aji khato chix chakkhi somüi, tö-tsap angkya müizongbu to ija hidaopong lyetle changüi, ilaxle aji mamabu a tö-tsap chitong ma thokle liüi.

³⁵ Ilaxle chixe, notom-tusüi tö hanpak ang langkya müi ozao alaile awütkya ningle ija müi ozao pangwüi alaiüi, Chixe ija Jowanpa ang koxkya süt tö füi tomle tö-tsap dingma zokle ashunüi. Ile nguapae hünzom ochax hanpakma tö koxüi, ilaxle hünzome ochax thailak ataküi.