LIWI 24 - OTSAO BAIBEL (BSI)

Chun Hosabu to Hu-mekya

¹ Jowanpae Mosa ang

² Israel khünaknu ang akax angkya ibibi kaxtom kox: Nyihom angkya wüntikbu hanpakma olip münga amüikya apüihüi, ikoxle tix chizakle wün atsople thom ang tsuaküi.

³ Jafole Arun-e ijabu atsopüi ilaxle Ataxkya Otsao Nui ma, atsyenkya nyinu zongma homthochi, Tsaotsüt Suak tüikya Jowanpa ngwotnui ma ibu a zang-angaile achuale thomüi. Ija wanlom a athax füichimachu jento twonle ngo angkya oli changpu.

⁴ Hun tsao-tsao makhange zingkya wüntikbu dannui Jowanpa ngwotnui ma jento wüntik atsople chang angkya a Arun mwot changle.

Zang ang Koxkya An

⁵ Tuakbün-anyi ankhix laxlax ilaxle ankhao bün-anyi zinglax.

⁶ Jowanpa ngwotnui angkya hun-tsap tuita ding ma, ankhao ozyen anyi ma, zyenpong to ankhao azok apongle danlax.

⁷ Jowanpa ang süt tö hanpak ang ankhao lüix ma ongan müikya so hidaopong pangnyi zyen ma dankox.

⁸ Füichima Sabath foto Jowanpa ngwotnui ma ankhao dan angkya changle. Ija a othuithuima Israel khünakbue mok angkya mwot.

⁹ Ankhao a Arun hia hosu-sasün hwom tsyen ang changüi, ilaxle hwome ija otsao nui ma saxüi, chemthüikoxle nguapabu hanpakma, Jowanpa ang koxkya süt khama ija a ataxle tsaokya kha changle.

Sukya hia Changkya Olom ma Sikngün ang Tomkya

^10-11 Shelomith le amünle, Israel khünak Dibri sasün, Dan homjen angkya, hopa a Ijip sün ikoxle honu a Israel cha mixcha tuita tüikya. Hwom thongnui to ija khünak a Israel nokbu füi ahe. Ahe pongma chixe Zang to thuakzomle chang, ikhoma hwome chix a Mosa hato apüi.

¹² Hwome chix nyele thom, ilaxle Jowanpae hwom ang chemle moklax le thüiüihex, le chix kaxnong tanle nui.

¹³ Jowanpae Mosa ang thüi:

¹⁴ “Ija mixsün a pom angkya homtho to alaidao. Chixe Zang to thuakzomle changkya zing opangsae atatle laxpuix, hwom bibie chix a thaile le aho ang, hwom chak füi chix khang ma twon ang laxkox, ifüima noknue chix a long füi thuple langüi.

¹⁵ Ifüima Israel khünaknu hama Zang to thuakzomle changkyabue iningkya thama apong angkya changle,

¹⁶ üntoxle mik max ang tomüile akaxkox. Israel haxtok ngokya, Israel nok wüi changlax chichangba mixnok wüi changlax, Zang to thuakzomle changkya mix a noknue long füi thuple lang angkya changle.

¹⁷ “Owawae mix mik-amütle jangchang thüiningle chix chuwüi mik max ang tomüi.

¹⁸ Owawae mixkux tsom-pom langle jangchang thüiningle, chixe olüix thomüi. Kaxwanpan ma khüzün lüix ma khüzün le bangpu.

¹⁹ “Owawae mix thomzünle jangchang, chixe mix to chemle hwonpuix ilailaile chix to chuwüi hwon angkya oli.

²⁰ Chixe za apakle jangchangdao, chix za chuwüi apak angkya oli changpu; chixe mix mik kaochi asutle jangchangdao, chix ang chuwüi kaochi mik asut ang kox angkya oli; chixe wa hongle adütle jangchangdao, chix angchu wa hongle adüt angkya oli changpu. Chixe mixsün tuita to chemningle mak-khale koxdaolaxpuix, ija ningle chix to chuwüi mak-khale kox angkya changpu.

²¹ Owae mix tsom-pom mik amütle changdaolaxpuix chixe olüix kox angkya changpu, ikoxlechu owae khünak mik amütle changdaolaxpuix chix a mik max ang tom angkya wüi changpu.

²² Ija wanlom a, hünzom khama tüikya, Israel khünak tamchu mixnok pangnusa hanpak ang changpu, chemthüikoxle ku a Jowanpa hünzom Zang changle.”

²³ Chemtue Israel khünaknu hama Mosa-e ija kax ngaipuix, hwome ija mixsün homtho to alai ilaxle long füi thuple lang. Ile Israel khünaknue Mosa makhange hüikya Jowanpa kaxtom kax ma laxle mokle hüi.