LIWI 21 - OTSAO BAIBEL (BSI)

Nguapabu Ataxle Tsaokya

¹ Jowanpa Mosa füi Arun homjen nguapabu füi akax angkya kaxtom koxle thüi: “Ma-mix owawa zikya khato nuidaobale nguapa owaechu ma alüile chitsaokya ang taxachang.

² Chix honu hia hopa tomtata, tamchu sasün hia hosheko hwom tomtata, hotüi-honao hwom tomtata,

³ chichangba tui to majukya hona-honao tomtata, kako angkya owawa tomtata asule lüwüi chichang, müimama nule atsaole chingoüi.

⁴ Chongnyingchi kao owawa zi-maxkya khoma, chix tomtata otsao münchangle chichangüi.

⁵ “Nguapa owaechu ma mong makya aho ang khang ongle chichangüi chichangba janman toxle tsangtsa to chizütüi.

⁶ Chix a otsao ang ngo angkya tamchu ku mün chiama angkya changle. Chixe ku ang sütli tö koxle idaile chix a otsao chang angkya oli.

⁷ Mixcha owae zangshwom-hom-ma ma tsangtsa hangle ngodaolaxpuix, mixcha owa naocha chichangpuix chichangba owa lüka füi fanlaxle thanu ang ngokya mixcha changpuix, iningkya mixcha nguapabue ma kako ang chilax angkya oli changpu; chix tuita otsao chang koxle.

⁸ Khünaknue nguapa a atsaole lax angkya oli, chemthüikoxle sütli tö ku ang chixe tix koxpu. Ku a Jowanpa, ku a otsao changle ilaxle kue ku khünaknu otsao ang zingpu.

⁹ Nguapa tuita sacha ma tsangtsa hangkya mixcha tuita ang jang achang, she-e hopa ang zak-akoppu; idaile she a wünkha to zokle lang angkya changle.

¹⁰ “Nguakho a atsaole khang ma münga füi lidaokya mix changle idaile nguapabu nyi-za lax ang chix atsaole dankya mix tuita changle, idaile chixe kho alwotle chithomüi chichangba ma mongma aho ang manyi-maza akyetle chichangüi.

^11-12 Chix a ku hanpak ang atsaodaokya changle ilaxle wanlom ma alüile chitsaokya mix ang chilaxüi chichangba ija danle toxlaxle, hopa tomtata wüi changlax honu tomtata wüi changlax, mang tüikya khato noplaxle ku otsao Nyihom chitsaokya ang chiachangüi.

¹³ Chixe ma kako ang naocha tix apüi angkya changpu,

¹⁴ zomnu chichangba thanu chichangba ma tsangtsa hangle ngodaokya mixcha chilaxüi. Chix füi ma zu-jen tokya naocha ti atu-amaile changüi.

¹⁵ Ile chichang thüiningle, sasün hwom opang otsao ang changsehex, hwom a wanlom ma chitsaokya ang laxüi. Ku a Jowanpa, ilaxle chix a kue Nguakho ang süile dankya changpu.”

¹⁶ Jowanpae Mosa ang

¹⁷ Arun füi akax angkya kaxtom koxle thüi: “Nang sixli owa tsangtsa ma thaikya tüile changlaxpuix, chixe ku ang sütli tö kox angkya oli münchang. Ija wanlom a tsüntsün to ngoüi.

¹⁸ Tsangtsa ma thai-waile tüikya khünake tö kox ang münthoüi; thütba: mik maxdaokya, cha faikya, pak-nyakle hia kux-kwomle tüikya, iningkyabu;

¹⁹ chafai-chaknyaile tüikya owaechu;

²⁰ tok kwomle tüikya hia mixtsak-mixlak owaechu; mik-kak hia mak-chak füikya owaechu; ilaxle zwom züidaokya owaechu ija to münfatsuak angkya oli.

²¹ Nguapa Arun sixli tsangtsa longkha je-kwomle tüikoxlechu chixe ku hato sütli tö apüile tö kox ang tsuaküi.

²² Iningkya khünak tuitae ku hato apüikya süt, otsao süt tamchu ataxkya otsao süt sax ang thoüi,

²³ ikoxlechu chix a je-kwomle tüikya khünak tuita daile, chix a otsao nui atsyenkya nyinu hato chisoxüi tamchu tö tsap hato chisoxüi. Chixe ija otsao akhu ang chitomüi, chemthüikoxle ku a Jowanpa tamchu kue hwom atsaole zingpu.”

²⁴ Ifüima ija a Mosa-e Arun hama, Arun sasün hwom hama tamchu Israel khünaknu hama akaxle koxkya changpu.