LIWI 2 - OTSAO BAIBEL (BSI)

Saxziak Tö Koxkya

¹ Owawae Jowanpa ang saxziak tö koxle changpongma, ija hünzome an ang achangle müile thule kopüi. Nguapabue ija to olip münga füi liüi ilaxle ongan amüi ang otex-tsyapi awutüi.

² Nguapabu, Arun sasün hwom hato ija apüiüi. Ikha angkya chakpuix tuita an hia olip münga tamchu ima tüikya otex-tsyapi pangwüi laxle chang füima, nguapae ija chakpuix an tö-tsap ma wünkhut ang achangle zokle ashunüi. Ija a Jowanpa zongto zinglongle ongan müikya to tuita changle.

³ Ile saxziak tö koxkya füima ota toxkya a Arun hia chix sasün hwom hanpak ang changüi. Ija a wün ma zokle Jowanpa ang tö koxkya khama ataxkya otsao mwot changpu.

⁴ Ikoxle tö a wün ma atsankya an jangchang, ija a twonkhax chiawonle zing angkya oli changpu. Ija an a olip münga füi awon tütle chichangba pakdaxle zingkya chang ang tsuak.

⁵ Ija tö a tikkhe ma mokkya an jangchang thüiningle, ija a ankhix olip münga füi awonkya ikoxlechu twonkhax chiawonkya an chang angkya oli.

⁶ Chemtue ija tö tuita ang nange koxüihex, ija akhixlax ilaxle ito münga füi lilax.

⁷ Nange tö a khuakhao ma atsanle zingkya kox angkya jangchang, ija a ankhix hia olip münga füi zingkya chang angkya oli.

⁸ Ija Jowanpa hato tö tuita ang apüilax ilaxle ija nguapa chak to laxkox, chixe tix ija tö-tsap hato paoüi.

⁹ Ibibi komkaile Jowanpa a tö koxkya ang laxle nguapae ikha angkya hidaole laxüi, ilaxle chixe ija tö-tsap ma zokle ashunüi. Ija ongan a Jowanpa zongto zinglongle müikya ongan changle.

¹⁰ Ota tüikya tö a nguapabu hanpak changle; ija a ataxkya otsao, chemthüikoxle ija a Jowanpa hato apüikya süt tö kha angkya kopkya changle.

¹¹ Hünzome Jowanpa ang koxkya saxziak tö chemchu twonkhax füi chiawonüi; Jowanpa a hünzome saxziak to koxle changpongma twonkhax hia nax-ti chemtuechu chiawonüi.

¹² Nange ibu puatak mün ma Jowanpa hato tö koxle apüi ang tsuak; ikoxlechu ibu a ongan müile zokle ashunkya tö koxkya tö-tsap dingma chidanüi.

¹³ Saxziak tö pangnu ma hum awonkox, chemthüikoxle hum a Zang hünkhi bama kaxfün tuita münwan ang ngoüi. (Nange koxkya tö pangnu ma hum awon angkya changle.)

¹⁴ Chemtue nange Jowanpa hato puamün tö apüile changüihex, huakkya sax chichangba ija amyetkya sax kox angkya oli.

¹⁵ Ija to olip müngae li ilaxle otex-tsyapi awonle changkox.

¹⁶ Ikha angkya sax hia münga tamchu hidaole tamchu otex-tsyapi komkaile koplaxle nguapae ija zokle ashunkya tö koxüi.