LIWI 15 - OTSAO BAIBEL (BSI)

Chitsaokya Hoti Tsangtsa angkya Laikya

¹ Jowanpae Mosa hia Arun nyi ang ibibi wanlombu kox.

² Ija a Israel khünaknu hanpakma changüi. Chemtue lüka mixsün owawa ang fünma makhange ngatto oti jenle laiüihex,

³ ija fünma ma oti jenle wüi ngolax chichangba oti jenkya thwonle wüi changlax, chix ma ija a chitsaokya kak changpu.

⁴ Lya oja ma chix thungpuix chichangba ngo-tongle changpuix, ija a müntsao.

⁵ Owawae ija chix lya to lyetle jangchang

⁶ chichangba chix thungkya jali to lyetle jangchang, ija khünake manyi-maza so angkya changpu ilaxle tichu ajo angkya changpu. Chix a hansong kople chitsaokya ang ngoüi.

⁷ Owawae ija oti jenle ngokya mixsün to twonle jangchangdao, chixe manyi-maza so ilaxle ti ajo angkya changle, ifüima chix a hansong kople chitsaokya ang ngoüi.

⁸ Tsaothale ngokya owawa to ija oti jenle ngokya mixsüne thuak-thuakle jangchang, ija mixsüne ma nyi-za soüi ilaxle ti ajoüi, ifüima hansong kople chix a chitsaokya ang ngoüi.

⁹ Ngwotnui-tüntong tüta ningkyachu ija mixsün thungle jangchangdao chitsaokya ang achangüi.

¹⁰ Ija mixsün ngwotnui tüntong to owawae twonle jangchang thüiningle, chix a hansong kople chitsaokya ang ngoüi. Owawae, ija mixsün ngodaokya tütali nwonle jangchangdao thüiningle, chixe ma nyi-za soüi ilaxle ti-lak ajole changüi, ifüima chix hansong kople chitsaokya ang ngohomüi.

¹¹ Ija oti jenle ngokya mixsüne chak chiatsux homtoxle owawa to twonle jangchang, ija khünake ma nyi-za so ilaxle tijo-chaktsuxle changüi, ifüima chix hansong kople chitsaokya ang ngole hüiüi.

¹² Ija mixsüne twondaokya haxtik tüta ningkyachu akhixle awütüi ilaxle chixe twondaokya pün-khup tüta ningkyachu müile fwotüi.

¹³ Hoti jenle ngokya müikya füima, chix a nyix anüt nuiüi, ifüima chixe ma nyi-za sole shua titsao ma tijo-chaktsuxle changüi ifüimatix chix wanlom ningle tsaokya ang laxüi.

¹⁴ Nyix achyet lükya to chixe osu anyi chichangba jua-o anyi koplaxle Jowanpa ngwotnui Nyihom fülom to nguile nguapa chak to ibu koxüi.

¹⁵ Ikha angkya nguapae tuita ochax tö hanpak ang koxüi ilaxle ata a zokle ashunkya tö ang koxüi. Ile ija mixsün hanpakma khongaile tsao angkya zom zingle koxüi.

¹⁶ Chemtue khünak owawa angkya hoti ngat-to jenle paoüihex, chixe ma tsangtsa komle soüi, ilaxle chix a hansong kople chitsaokya ang ngoüi.

¹⁷ Nyi hia müikhwon makhange zingkya chempang ding ma ija hoti adütle changpuix, ija a so angkya wüi, ilaxle hansong kople ija chitsaokya ang thomüi.

¹⁸ Sheko hia lüka nyi apongle mwot tsuakkya füima, hokhi pangnyie wüi ti-ajoüi ilaxle hansong kople chitsaokya ang ngoüi.

¹⁹ Chemtue sheko tuita ang tutsyen paole changpuix, she a nyix anüt chitsaokya ang ngoüi. Owawae she to twonle jangchang thüiningle, ija khünakchu hansong kople chitsaokya ang ngoüi.

²⁰ Tutsyen paole ngopongma she athungthung kha pangwüi chitsaokya ang changüi.

^21-23 Owawae she jipkya lya chichangba she ngokya ngwotnui tüntong to twonle jangchang thüiningle, ija khünake manyi-maza soüi ilaxle hansong kople chitsaokya ang ngoüi.

²⁴ Tutsyen paole ngopongma lüka mixpa tuita she füi jip-pomle jangchang thüiningle, chix to chuwüi ija mixcha chitsaokyae lyendaoa idaile chixe chuwüi nyix anüt chitsaokya ang ngoüi, ilaxle chix jipkya lya pangwüi chitsaokya ang ngoüi.

²⁵ Ikoxle sheko tuita a, she tutsyen paokya hanpak akaile aji paokya chithwonle jangngo chichangba she tutsyen paokya thwontue chithwonle paole jangngo thüiningle, she aji mathwon-mathwonle she a chitsaokya ang ngoüi, ija a tutsyen paole ngopongkya lailaile wüi changüi.

²⁶ Ile changpongma she jipkya lya hia thungkya ngwotnui tüntong pangwüi chitsaokya ang ngoüi.

²⁷ Owae ibu to twonle changüihex, ija khünak a chitsaokya ang changüi. Ija khünake manyi-maza sole tijo-chaktsuxle changüi, ilaxle ija khünak a hansong kople chitsaokya ang ngoüi.

²⁸ She aji jenkya thwonle chang füima nyix anüt tanle nuiüi, ifüima tix she a wanlom ningle tsaokya ang achangüi.

²⁹ Nyix achyet lükya to she-e osu anyi chichangba jua-o anyi Jowanpa ngwotnui Nyihom to nguapa chak to koxle nguiüi.

³⁰ Nguapae osa tuita a ochax tö hanpak ang ilaxle mama a zokle ashunkya tö angle koxüi. Ile chixe she atsaole kox angkya hanpakma khongai zom zingle koxüi.

³¹ Hwom pom osungkha ma tüikya Jowanpa ngwotnui Nyihom chitsaokya ang achangle chithai angkya kuxma, Jowanpae Mosa makhange Israel khünaknu ang ochax mwot mokle chithai angkya bama kaxkhün koxle zangwün.

³² Ibu a oti jenle ngokya hia ngat-to hoti laile paokya mixsün tuita atsao angkya

³³ tamchu sheko mixnu tuita tutsyen paole ngopongma chichangba tsaothale chingo pongma sheko mixnu tuita füi jip-pomle changkya lüka mixpa tuita atsao angkya bama zomzingle chang angkya wanlombu changle.