LIWI 13 - OTSAO BAIBEL (BSI)

Angwonkya bama Wanlombu

¹ Ilaxle Jowanpae Mosa hia Arun nyi makhange wanlom ibu kox:

² Khünak tuita tsangtsa khwon ma fingle chichangba mak laile chao chichangba athuak-athangle jangchangba, ilaxle chix khwon ma angwonkya mowan ngünle jangchangba, ima wüi chix a nguapa Arun hato chichangba chix sasün hwomkha angkya nguapa tuitata hato apüi angkya changle.

³ Nguapae chix tsangtsa to hule wanüi, ilaxle ija khama mun thole jangbang thüiba, ilaxle chix tsangtsa khwon mamakha füi akhünle zule jangchangba, ija a ngwon mak wüi changpu; ilaxle nguapae chix to hulaxle chix chitsaokya ngaile faüi.

⁴ Ikoxlechu chix tsangtsa khwon ma laile tüikya mun thothole tüikoxchu, mama kha tsangtsa khwon füi akhünle zule chitüiba ilaxle ikhama tüikya munchu thole chichang thüiningle, ijama wüi nguapae, ija mak füikya mixsün nyix-anüt hakle thomüi.

⁵ Nyix-anüt lükya to nguapae chix mak to tamchatle huüi; ilaxle ija chix mik-hu ma mak a tsale chipaole otyatya wüi jangchang thüiningle, imawüi nguapae ija mixsün a nyix-anüt hanpakma tamchatle hakle thomüi.

⁶ Anaole chu nyix-anüt lükya to nguapae tamchatle huüi, ithoma mak sühuile tamchu mama khato tsale chipaole, ijama wüi nguapae chix a otsao changle le ngaiüi; ija a tuita zangjang mak laikya changpu; idaile chix a ma nyi-za sole atsao koxle tsaothale ngoüi.

⁷ Ikoxlechu chix tsaokya ang achang angkya hanpakma, ma tsangtsa nguapa hato aho füima mak a tsangtsa awangle tsale jangtüiba, chixe ma tsangtsa tamchatle nguapa hato aho angkya changle.

⁸ Nguapae hu ilaxle mak a tsangtsa to sisile tsale jangbang thüiningle ijama wüi nguapae ija mixsün a müntsaole ngaiüi; ija a ngwon kax wüi changle.

⁹ Chemtue khünak tuita ma ngwon kak laile changüihex, ijama wüi chix a nguapa hato apüiüi,

¹⁰ ilaxle nguapae hule wanüi, ipongma tsangtsa khwon ma thobokbokle fingle tamchu ijae tsangtsa mun athwotle tamchu ija makthün ma hak-hing laile jangtüiba,

¹¹ ija a tsangtsa hak ma tüikya ngwon kak ozang changle, ilaxle nguapae ija khünak a müntsaole ngaiüi. Ija mixsün a nguapae tsyenle chithomüi chemthüikoxle chix a chitsaokya khünak tuita changle.

¹² Ngwon a tsangtsa khwontok to laile khanghomhua makhange chitua-chakza to lünle ule jangtüi,

¹³ nguapae hule wanüi ilaxle ija okake tsangtsa to ule jangchangün tamchu ija makman thothole jangchangün, ija kakmix a zanglom ma otsao changpule chixe ngai angkya changpu.

¹⁴ Ikoxlechu chix mak a achut füi abuakle jangtüi, chix a chitsaokya ang ngoüi.

¹⁵ Nguapae mak abuakle laikya to tamchatle hulaxle, chix a otsao münchangle ngai angkya changpu; abuakle mak laikya a ngwon wüi changpu.

¹⁶ Ikoxle hakzün laikya tamchatle tsele janglüiba, ijama wüi chix a nguapa hato nguiüi, ilaxle nguapae chix to hule wanüi.

¹⁷ Ikoxle mak a thole jangtüiba, ijama wüi mak füikya mixsün a otsao changle le nguapae ngaile kox angkya changpu; chix a tsaole wüi tüile.

¹⁸ Chemtue tsangtsa khwon ma tsomdong laxle mak müikya oman jangtüi

¹⁹ ilaxle tsomdün nui ma thothole fingle jangtüi chichangba khisumle fingle jangtüi, ijama wüi chixe nguapa hato aho angkya changpu.

²⁰ Nguapae hule wanüi; ilaxle ikha mama tsangtsa khwon füi akhündukle jangtüiba tamchu ikha angkya mun thobokbokle jangtüiba, ijama wüi nguapae chix a müntsaole ngaiüi; ija a tsom ma laikya ngwon mak changle.

²¹ Ikoxlechu nguapae ito hule wankya ma ikhama mun thokya chibang ilaxle khwonchu khünle dütkya kha chitüi ikoxlechu fingle jangtüi thüiningle, ijama wüi nguapae chix a nyix anüt süile thomüi.

²² Ija makman tsangtsa mama khato tsale paokya jangtüi thüiningle, nguapae chix a otsao münchangle ngaiüi; ija a ngwon kak wüi changle.

²³ Ikoxlechu fingkya otyatya wüi jangchang thüiningle ija a tsom dong koxle fingkya ofing changle, ilaxle ijama wüi nguapae chix a otsao changle le ngaiüi.

²⁴ Chichangba, tsangtsa ma wünhuak mak tüi ilaxle ija wünhuak mak hak-hing sükhidaole tho chichangba thobokle ofwot jangtüiba,

²⁵ nguapae ija to hule wanüi. Ija mak angkya mun thothole jangtüiün ilaxle tsangtsa mamakha füi onüi akhünle jangtüiün, ija a ngwonkak changle; ija a wünhuak mak ma laikya changle. Nguapae chix a tsaole müntüile ngaiüi, ija a ngwon kak wüi changle.

²⁶ Ikoxle nguapae ija to hule wankoxle ikha angkya mun thokya chitüi, ilaxle tsangtsa khwon mamakha füichu akhündukle chichang ikoxlechu fingle jangtüi thüiningle, nguapa chix a nyix-anüt süile thomüi.

²⁷ Nyix-anüt lükya to nguapae tamchatle hule wanüi, ikoxle ija mama khato tsale jangbang, nguapae ija mixsün a otsao münchangle ngaiüi. Ija a ngwon kak wüi changpu.

²⁸ Ikoxlechu fingkya a ikhakha ma wüi, tsangtsa mama khato tsale chichang tamchu hidaole sühuikya ningle jangtüi thüiningle ija a wünhuak mak fingkya wüi changpu. Nguapae chix a tsaothale tüile le ngaiüi, chemthüikoxle ija a wünhuak makman wüi changle.

²⁹ Lüka wüi changlax sheko wüi changlax, khünak tuita ma chemtue khang ma chichangba kaxza ma kak tüile changüihex,

³⁰ nguapa ija kak to hule wan angkya changle. Ija mama tsangtsa khwon füi südukle jangchang thüiningle tamchu ikha angkya mun nanle üntoxle pakle jangchang, nguapae ija mixsün a müntsaole ngaiüi. Ija a khang chichangba kaxza ma tüikya ngwon kak wüi changle.

³¹ Nguapae ija buk to hule jangwan thüiningle, ija buk füikya khünak nguapae nyix anüt hanpakma süile thomüi.

³² Nyix anüt lükya to nguapae ija buk to tamchatle hule wanüi; ija buk tsale chibang ilaxle ikhama mun nankyachu chitüi, ilaxle ija buk mamakha tsangtsa khwon füi onüi adukle jukya chitüi,

³³ chixe mun ongüi, ikoxlechu buk mak kha chiongüi. Nguapae ija buk füikya mixsün nyix anüt süile thomüi.

³⁴ Nyix anüt lükya to nguapae ija buk to tamchatle hule wanüi; ilaxle ija buk mamakha to tsale chipao tamchu mama tsangtsa khwon füi onüi akhünle chichang thüiningle nguapae ija a tsaothale tüile le ngaiüi. Chixe ma nyi-za soüi ilaxle tsaothale ngoüi.

³⁵ Ikoxlechu ija buk a tsangtsa mamakha tochu tsale jangchang, chix a tsaothale tüile le ngai füima chang koxlechu,

³⁶ nguapae tamchatle hule wanüi; izuma buk tsale jangbang, nguapae mun nankya tüichale lomngo angkya jao münchang, chix a chitsaokya jaojao.

³⁷ Ikoxlechu chix mik-hu ma buk müi üntoxle ija ma munnak nyemle jangbang, ija buk a müidaoa, chix a tsaoüna; ilaxle nguapae chix a tsaoünale ngaiüi.

³⁸ Lüka ma wüi changlax sheko ma wüi changlax, khünak tuita tsangtsa ma thothokya janmanbu jangtüi,

³⁹ nguapae hule wanüi, ilaxle tsangtsa khwon angkya janmanbu tsezale achutle jangpao, ija a tsangtsa tok to mak laile paokya changwüi ikoxle ijae chix a zanglom ma chitsaokya ang münachang.

^40-41 Owawa ang khang angkya khomun dütle jangchang, chix a khanghwon ikoxlechu otsao changpu. Ikoxle chix khangpong angkya hia namya angkya kho dütkyae khangkokya lan.

⁴² Ikoxlechu kho dütle khangpong hwonkya hia chix khanghan ma lomlomkhile thokya janman jangtüiba, ija a chix khangpong hia khanghan ma ngwon mak mwople laikya changpu.

⁴³ Nguapae chix to hule wanüi, ikoxle ija khangpong hia namya angkya kak fingle tamchu lomlomkhile thole jangchang, oja mak tsangtsa mamakha to laikya füi talailaile tüipuix,

⁴⁴ ija a ngwon jaojao, chix a müntsao. Nguapae chix a müntsaole ngaiüi; ija kak a chix khang ma tüile.

⁴⁵ Ngwon kak füikya khünake nyi-za otsyen laxüi ilaxle chix khang angkya kho chu chaole thomüi; ilaxle chixe thakchi tun to chwople koplaxle: Ku a chitsaokya mix! Ku a chitsaokya mix! le akhongüi.

⁴⁶ Chix ma kak tüikya kople chix a chitsaokya mix ang ngoüi, chix a chitsaokya mix jao changpu. Chix a chix tata ngo ang tomüi. Chix pom a pantua to zingle koxüi.

Nyi-ngwon bama Wanlombu

⁴⁷ Chemtue nyi-za to nyi-ngwon paxle changüihex, painyi wüi changlax munyi wüi changlax,

⁴⁸ ija muzi makhange chichangba pai zi makhange takkya wüi changlax, chichangba swotle zingkya nyi wüi changlax, müikhwon chichangba müikhwon makhange zingkya nyi wüi changlax,

⁴⁹ chemtue nyi-za, muzi füi zingkya wüi changlax chichangba pai füi zingkya wüi changlax chichangba müikhwon füi zingkya wüi changlax, ija to naknaktsakle chichangba khikhisumle janman toxle jangchangba, ija a ngwonkak changle ilaxle ija a nguapa hato aho angkya changle.

⁵⁰ Nguapae kak to hule wanüi, ilaxle ija kak füikya jali nyix anüt hanpak ang süile danüi.

⁵¹ Nyix anüt lükya to chixe tamchatle hule wanüi. Ija kak nyi ma tsale jangbang, munyi wüi changlax, pai nyi wüi changlax chichangba müikhwon nyi wüi changlax tamchu müikhwon makhange zingkya tütali wüi changlax, ija a ngwonkak tsale paokya wüi changpu; ija a chitsaokya oli ang changdaoa.

⁵² Ija kak a swotkya nyi ma wüi tüilax chichangba takkya nyi ma wüi tüilax, munyi wüi changlax chichangba painyi wüi changlax chichangba müikhwon füi zingkya oli wüi changlax; ija a ngwon kak tsale ngokya daile chixe manyi-maza wün to zokle ashun angkya oli changle.

⁵³ Ikoxle nguapae hulaxle mak a takle zingkya chichangba swotle zingkya nyi-za ma chichangba müikhwon füi zingkya tütali ma wüi changlax tailaile tsale paokya chitüi jangthüiba,

⁵⁴ nguapa mak tüikya nyi-za so angkya kax koxüi, ilaxle ija nyi-za süile awütle thomüi.

⁵⁵ Mak tüikya nyi-za solaxle thomkyabu nguapae nyix anüt füima tamchatle hule wanüi. Ikoxle makman osün ajele machangba, ija mak tsale chipao koxlechu ija a otsao münchang; ngwonkak makman otok towüi tüilax chichangba omong towüi tüilax, nange ija wünkha to zokle ashun angkya oli changle.

⁵⁶ Nguapae tamchatle hule wankya zuma, ija sokya füima makman huile jangbang, chixe züchao nyi angkya wüi changlax chichangba painyi angkya wüi changlax tamchu müikhwon angkya wüi changlax, ija makmanbu kyetle awüt angkya changle.

⁵⁷ Ifüima, nyi-za ma makman janglai, painyi ma wüi changlax munyi ma wüi changlax chichangba müikhwon füi zingkya tütalima wüi changlax, ija a atai-alaile tsakya changpu. Nange ija mak ngaikya a wün to zokle ashun angkya oli changle.

⁵⁸ Ikoxle nyi-za, painyi wüi changlax, munyi wüi changlax chichangba müikhwon füi zingkya tütali wüi changlax, nange sokya zuma oja angkya kaklak paopuix, ijachu tamchatle soüi, ifüima ija a tsaokya ang changüi.

⁵⁹ Ija a nyi-za ma, painyi wüi changlax munyi wüi changlax chichangba müikhwon füi zingkya tütali wüi changlax, ngwon kak-lak chitüipia tüipuix chichangba chitsao pia tsaopuix le awan ang zingkya zom olom tuitata wüi changle.