LIWI 11 - OTSAO BAIBEL (BSI)

Sax ang Tsuak angkya Müibu

¹ Jowanpae Mosa hia Arun nyi füi Israel khünaknu hanpakma ibibi kaxhua kox:

² Israel khünaknu füi akax angkya kaxtom, chaxwannu angkya zünmok khama hünzome sax ang tsuak angkya a ibu changle:

³ Müi khama ocha afile sok zaikya hia fumchak shaole saxkya müili sax ang tsuak.

^4-6 Ikoxle hünzome ut, zuazu chichangba juxhong-nalo ibu müi chisaxüi. Ibu a hünzom hanpakma chitsaokya müibu changpu; changle hwome fum shaole saxle ikoxlechu ibu ang sok münafi.

⁷ Wak müibu taxsax. Ibu a chitsaokya ang laxüi; hwom ang sok afile zaile ikoxlechu fum shaole münsax.

⁸ Müi ibu omüi taxsax chichangba ibu müimang to lyetle taxchang; ibu a chitsaokya müibu changle.

⁹ Okui-ozang füikya nyax hünzome pangwüi sax ang tsuak,

¹⁰ ikoxlechu tima ngokya zünmok chempang ma okui-ozang chitüipuix, ibu hünzome taxsax.

¹¹ Iningkya zünmokbu a chitsaokya ang eüi. Hünzome ibu taxsax tamchu ibu omang to ngaxchu taxtwon

¹² Hünzome tikha ma ngokya zünmok chempangsa ma okui hia ozang chitüipuix, ibu sax angkya oli münchang.

^13-19 Osabu ibibi omüi hünzome taxsax: ola, okhux, lawang, falkon, buzzard, okun, okha, ostris, ti-opak, olo wanghom, heron, pelikan, komoran; hopoi; chichangba opak-pakpe ibibi.

²⁰ Hozang füikya kuksa-waisa chemchu otsao münchang;

²¹ fütle ahamkyabu kukbu tixwüi otsao changpu.

²² Hünzome ijabu sax ang tsuak: Zefyak kuknu, okhang hwonkya kuk ojat pangwüi.

²³ Ikoxlechu ozang füikya zünmok hixkyasabu tamchu alyangle ahamkya pangwüi chitsaokya ang laxüi.

^24-28 Hünzome müimang ibu to twonle jangchang thüiningle, hanhomma thule nang chitsaokya ang ngoüi: osok füikya müi pangwüi, ibu ochisok afile chitüi tamchu ibue osüt shaole chisax, üntoxle ocha ali zaikya müi pangwüi. Nange iningkyabu müimang nwonle jangchangdao, nange nang nyi-za so angkya changle, ikoxlechu hanhomma thule nang chitsaokya ang ngoüi.

^29-30 Juxpisabu, juxnakbu, juxtho, üntoxle flo-fyensangbu, ibu pangwüi chitsaokya ang lax angkya changle.

³¹ Owapange ijabu to chichangba ibu omangbu to twonle changüihex, ija khünak a hanhomma thule chitsaokya ang ngoüi.

³² Ilaxle ibu omang tütali ding to dütle jangchang, ija chitsaokya ang changüi. Ija a tütaningkya mwot to laxle ngokya changkoxchu, pün, nyi-za, müikhwon, chichangba nyikhwon, ibu pangwüi chitsaokya ang laxüi. Ija a ti to somle changüi ikoxlechu hanhomma thule chitsaokya ang ngoüi.

³³ Ilaxle ibu omang haxtik ding to dütle jangchang, ija haxtik mong ma atüitüi komkaile chitsaokya ang changüi, ilaxle nange ija tikkux a ashix angkya changle.

³⁴ Süt oja zangjang to saxtsuak angkya hex, ikoxlechu ija ding to iningkya tikkux angkya ti füi lile jangchangdao, ija a chitsao ang changüi, ilaxle iningkya tikkux ma lingkya li chem tüilaxpuix, chitsaokya ang changüi.

³⁵ Tüta ningkya ding to changkoxchu omang dütle jangchangdao thüiningle chitsaokya ang changpu; hax fonglong hia fongbak a akhixle ama angkya changpu.

³⁶ 12 ibu omangbue lyetle changkya pangwüi chitsaokya ang changkoxchu tümik hia tüküi a tsaole wüi ngoüi.

³⁷ Iningkyabu tüta wüi changkoxchu, sai angkya tsaxli ding to dütle jangchang, ija tsaxli a otsao ang wüi ngoüi.

³⁸ Ikoxlechu ija tsaxli ti to asomle chang ilaxle ija ding to iningkya tütali dütle jangchang, ija tsaxli a chitsaokya ang changüi.

³⁹ Saxtsuak angkya müi tütapu zingle jangchang, ija müimang ma twonkya mix hanhomma thule chitsaokya ang ngoüi.

⁴⁰ Ilaxle hünzom owawae ija müi tüta-jongkha saxle jangchang, nange nang nyi-za sole changüi ikoxlechu nang a hanhomma thule chitsaokya ang ngoüi. Ija müimang azyale changdaokyabue ma nyizabu so angkya changle, ikoxlechu nang a hanhomma thule chitsaokya ang ngoüi.

⁴¹ Chaxwantok ma ozyem ma ahamkya zünmok chemchu otsao münchang idaile hünzome ibu taxsax;

⁴² howok zutle ahamkya zünmok, ocha ali füikya zünmok chichangba ocha-ochak tüihukya zünmok, thüikoxle chaxwantok ma amik-amokle ahamkya zünmok tütachu hünzome chisax angkya changle; chemthüikoxle ibu a nushixdongkyabu changle.

⁴³ Ozyem ma ahamkya müi tütali saxkya makhangechu hünzome ma alüile nushixdongkya ang taxachang,

⁴⁴ chemthüikoxle, Jowanpa ku a hünzom Zang changle. Hünzome ma alüile atsaolax ilaxle otsao ma ngolax, chemthüikoxle ku a otsao changle. Chaxwantok ma ozyem ma ahamkya zünmok tüta makhangechu hünzom chitsaokya ang taxachang.

⁴⁵ Ku hünzom Zang ang achang ang, Ijip haxtok tokya hünzom zunle apüikya Jowanpa a ku changpu. Ku a otsao idaile hünzom chuwüi otsao ma ngo angkya oli changpu.

⁴⁶ Müi nüjen ilaxle o nüjen ilaxle ti ma ahamkya zünmok nüjen tamchu chaxwantok ma ozyem ma ahamkya zünmok nüjen, ibu pangwüi hanpak ang ija a tuita wanlom longzi tankya ang changle.

⁴⁷ Ija a, chitsaokya hia tsaokya tamchu chisax homfang zünmok hia saxhomfang zünmok nyi ba süile ajat angkya hanpakma changle.