KOLOSI 2 - OTSAO BAIBEL (BSI)

¹ Hünzom hanpakma tamchu Laodekia khünaknu hanpakma ilaxle huaksüi le ku füi süntsing münwan matüikyabu pangnu hanpakma kue chemle azongle mokpuix ija hünzom hama wünfang.

² Hwom mongchyene awangle tüi angkya kuxma ilaxle mongkün ma asüi angkya kuxma, ito khange changkya lom ma tsingwankya apüi angkya okhonguikya tuina bama mongao chitüi angkya kuxmale kue Ija mwot mokpu. Ija ningle hwome Zang huxsa thüikoxle Khrista chix tomtata tsingle laxüi.

³ Khomle thomkya tuina oja Zang hwon-je üntoxle tsingwankya hex, ibu pangnu ka dap angkya kapatja a chix changle.

⁴ Idaile kue thüipu, hwom tüta tukux wüi müile ngün ang thüilax, owaechu kaxthai zangwün tokhange nang dyen ngan ang taxtom.

⁵ Chemthüikoxle ku tsangtsa ma hünzom khato chitüi koxlechu chasa ma ku hünzom füi tüile, ilaxle Khrista tokya mongong ma hünzom shingmongle ajongkya ngünlaxle ku ang mongmüipu.

Khrista ma Nguiwangkya Tsün

⁶ Hünzome Khrista Jisu pongle kopdaokya daile, chix füi notomle ngolax.

⁷ Chix ma hünzom otsing mongle julax, chix ma hünzom khüzün tsün zinglax, ilaxle hünzom hama anwot-ano daokya ningle mongong ma zong südong-südong donglax. Ilaxle münchong fakyae awangle ngolax.

⁸ Khrista makhange chichang homtoxle khünake wünle hüikya tamchu zangfang apünkya chasabu hwon-nwot jaono tokhange nang owaechu üntoxle chemlechu chilaxle khünak owaechu nang da tuita ang chikop angkya bama khünli lax.

⁹ Chemthüikoxle Khrista ma tamchu chix khünak ang achangkya ma Zang jaopo komle tüile,

¹⁰ ilaxle chix füikya notom ma hünzom ang nguiwangkya khüzün tsün fadaoa. Chasa apün-awangkya hia tsakzong pangnu thakma chix hopupa changle.

¹¹ Hünzom a Khrista füikya notom ma khwonzüt zom zingkya changpu, khünake zingkya khwonzüt zom olom ma münchang, ikoxle Khrista-e zingkya khwonzüt zom olom makhange zingpu, oja zom ma ma ochax tuitex zong chak tokya pan-dankya tüilaxpuix.

¹² Chemthüikoxle baptikya zuma hünzom Khrista füi tomle akhün, ilaxle baptikya ma, zidaokya Khrista chatle azang azwotkya, dangle chingokya Zang zong to hünzome mongongkya makhange, Khrista füi tomle hünzomchu chatle azangle zo.

¹³ Tam a hünzom ochaxbu khoma tamchu wanlom chitüikya mixnokbu changkoxle chasa ma omangbu changkya. Ikoxlechu athax a Zange Khrista füi tomle hünzom a ozün ang achang daoa. Zange kem ochax pangnusa thailak fa;

¹⁴ ilaxle kem füi apüile chak füi zakya wanlom oja kem füi alünle ajong ngopuix, ija a chixe fwotle amüt laxle Khrista pünsak ma takle langle paodaoa.

¹⁵ Üntoxle Khrista-e pünsak ma chix lailai to chasa ma apün-awangkyabu tamchu akhokya tsakzong chak tokya dan-pan, ilaxle hünzom ochaxbu komle paokya Khrista-e pünsak ma tholünkya tokhange chaxwannu hato angaile aho.

¹⁶ Idaile hünzome chem saxpuix chichangba chem lingpuix chichangba nazakle nuikya nyixchu chichangba lyet-zün puakya chichangba sabath nyix, ibu bama owaechu wanlom taxzing.

¹⁷ Iningkyabu pangnu li wüi athax füichi ma changle hüi angkya ocha aho ngowüi; otsing tomtata a Khrista tix changle.

¹⁸ Othai to puinai le ahokya üntoxle kaxtaimixbu to shwomkyabu opange ataxkya mikngün ohün tüidaoa le akhokya changpu le thüilaxpuix, iningkya mix owa angchu nang thajao ang taxtom. Chemthüikoxle iningkya mix a tüta khoma lüchu chichangle chix müi-hi-aji mongjang makhange mongngam ahole,

¹⁹ ilaxle ma tompo zongto okhang ang owa changlaxpuix, Khrista, chix to shingmongle künkya danle. Khrista-e akumathumkya fangma tix tsangtsa pangwüi tuxtsomle üntoxle ija opong ozit hia ija khak-kha makhange tuita ang athople tüile, ilaxle ija a Zang mongtex ningle tsongle.

Khrista füi Ozün ma ngokya hia Zikya

²⁰ Hünzom a Khrista füi tomle zidaokya ilaxle ija zangfang apünkya chasabu chak tokya dandaoa. Jangchangba, hünzom büthüikya to ija chaxwannu kux ningle ngo angkya?

²¹ “Taxtwon, taxsax, taxpo” iningkya wanlombu kax ma hünzome büthüikoxle lax angkya!

²² Ibu pangnu a, amiba mwot ma tam hüikya ikoxlechu athax a tüta mwot machu chihüi le tüikyabu ang thüingopu; ibu a khünake zingkya wanlombu tamchu jalibu changle.

²³ Ma küntsu monglua ma Zang shwonkya, puinaikya tamchu tsangtsa zongto zothupkya tokhange otsingtsing lailaile ngün ang kople ikoxlechu müi-hi-aji mongzok chemchu akumathum ang müntho.