JUHAN 19 - OTSAO BAIBEL (BSI)

Hux Khohom

¹ Ifüima Pilat-e Jisu alai laxle chiet-müi ang koxle apao.

² Süpahibue hux füi lople khüsün zinglaxle ija chix khang ma sünle kox; ilaxle chix to nyikhike awunle kox.

³ Hwom chix hato hüilaxle thüi: “Jehudi nok wanghom! Tsünlo le ngolax!” Ilaxlechu hwome chix to chak füi wyen.

⁴ Chatlechu Pilat hwom hato lai üntoxle thüi: “Hulax, chix ma kue thaikya chemchu münatak lekya kax ang kue chix hünzom hato alaipu.”

⁵ Ija ma Jisu a nyikhike awunlaxle tamchu hux khüsün sün laxle lai. Pilat-e hwom ang thüi: “Hulax! Khünak a ija changle!”

⁶ Nguakhobu hia apün awangkyabue chix ngünkya zuma akhongle thüi: “Chix pünsak ma takkox! Chix pünsak ma takkox!” Pilat-e thüi: “Hünzome hünzom lualua to paolaxle chix taklax; ikoxle kue chix ma thaikya chemchu münatak.”

⁷ Jehudi khünakbue chix kax to lan: “Kwom ang wanlom tuita tüile, ilaxle ija wanlom ma chix zi angkya changle. Chemthüikoxle chixe alüile chix a Zang Hosa changpu le akaxle.”

⁸ Ija kax atatlaxle sisi Pilat za.

⁹ Chatlechu wüi chix chongwang khwa to donglaxle Jisu ma atüi: “Nang a ojong tokya hüipu?” Jisu-e chix kax to chemlechu chilan.

¹⁰ Pilat-e chix ang thüi: “Nange ku füi münakaxüi hexnyi? Nang dan angkya hia pünsak ma tak ang kox angkya ku ma zong tüile le nange müntsing hia?”

¹¹ Jisu-e chix kax to lan: “Thakchi tokhange Zange chifa thüikoxle ku zongto tüi angkya zong nang ma chemchu chitüise. Ikhoma, owae ku nang chak to fünle koxlaxpuix, amakya ochax chix ma tüile.”

¹² Ija atatlaxle Pilat-e chix dan angkya olom lom. Ikoxlechu Jehudi khünakbue akhongle thüi: “Nange ija khünak jangdan thüiba nangchu Kaisar zuikhui münchang! Owa malualua to wanghom ang achangpuix, ija khünak a chongwangpa Kaisar füi zong apankya changpu.”

¹³ Ija kax atatlaxle Pilat-e Jisu homtho to alai. Chix longkhao füi zingkya (Ibri kax ma Gabatha le nyakkya) tüntong ma thung.

¹⁴ Ija a Kaitox Pangpwon hanpakma asuikya nyix kha tungto shen changkya. Pilat-e Jehudi khünaknu ang thüi: “Ija a hünzom wanghompa changle.”

¹⁵ Hwom akhongle thüi: “Chix langdao! Chix langdao! Chix a pünsak ma takle langdao!” Pilat-e hwom ang thüi: “Kue hünzom wanghom pünsak ma takle naxlang le hi?” Nguapa akhokyabue lan: “Kaisar boma kwom ang wanghom owachu müntüi!”

¹⁶ Ifüima Pilat-e pünsak ma takle lang angkya hanpakma Jisu a hwom chak to owüiole kox. Ikoxle hwome Jisu pongle kop.

Jisu Pünsak ma Takle Lang

¹⁷ Chix ang ma pünsak alüile apai laxle (Ibri kax ma Golgotha le nyakkya) khangza füikya haxhua to dün.

¹⁸ Ikhato hwome chix pünsak ma tak; Jisu otan ma lax üntoxle chix atale, chix füi tomle hwome mixsün anyi tak.

¹⁹ Pilat-e awan ang kox angkya hanpakma ile zakya tuita chix khangkho ma apütle kox: NAZARETH NOK JESU, JEHUDI NOK WANGHOM.

²⁰ Khünakbue ija e, chemthüikoxle Jisu pünsak ma takkya nui a Tingnu hama hoxhox le tüikya; ija kax a Ibri, Grik tamchu Letin kaxbu ma zale tüikya.

²¹ Jehudi nok nguapa akhokyabue Pilat ang thüi: “Jehudi nok wanghom le taxza, itülüi: ‘Ija khünake, chix a Jehudi nok wanghom changpu le akaxle’, le zakox.”

²² Pilat-e lan: “Kue chem zadaopuix, ija kue zadaoa!”

²³ Süpahibue Jisu pünsak ma tak füima, chix nyipong nyiza othom ali ma ahanlaxle hwome thompong ahanle lax. Nyipong a takkya, singkya opong chitüi le tüikya changkya. Ijachu wüi hwome lax.

²⁴ Süpahibue tata füi akax: “Keme ija taxakyethax, ikoxle owa ma asusu ang nantak le anohax.” Otsao Lai kax: “Hwome ku nyiza ahanle lax, tamchu ku nyipong bama nantak”, le tüikya kotok to angai angkya hanpakma ija ile chang.

²⁵ Jisu pünsak zuima soxle ajongle ngokyabu a chix honu Meri, she honao Meri owa Klopa kakonu changkyahex ilaxle Meri Magdalen hwom changkya.

²⁶ Honu hia chixe mongkünkya Wangshem hoxhox le ajong ngokya ngün pongma Jisu-e onu ang thüi: “Mixcha, ija a hünsa changle!”

²⁷ Chixe ma wangshem angchu thüi: “She a hünnu changle.” Ija makhange chixe she a ma füi tomle thom ang chix hom to pao.

Jisu Zikya

²⁸ Ifüima Jisu-e mwot pangnu tsuakdaoale awanlaxle, Otsao Lai kax angai angkya kuxma, chixe “Ku ang ti alanle”, le thüi.

²⁹ Ikhama jusike awangkya tik tuita tüikya. Hwome müiza tuita jusik khato som laxle haisop le nyakkya pünkang ma la laxle chix tun to thule kox.

³⁰ Ikoxle ija jusik lingkya füima Jisu-e thüi: “Ija tsuakpu.” Ija füima chixe ngom angoxle akhuxlaxle chasa laile pao ang tom.

Jisu Samba ma Pax füi Topkya

³¹ Ija nyix a pangpwon hanpakma asuikya nyix daile, ofüi nyix nazak angkya nyix mang pünsak ma chithom angkya hanpakma (chemthüikoxle ija nazak nyix a onüi ang otsao nyix changkoxle) hwome cha hongle apak laxle mang pao angkya hanpakma pünsak ma takdaokyabu mang Jehudi nok pünpa-chongwangbue Pilat ma jule lax.

³² Ikoxle süpahibue hüilaxle pongwang ma, Jisu atale pünsak ma takle thomkya mixsün nyi cha apak.

³³ Ikoxle hwom Jisu hato hüikya thoma, chix owüiole mang kongle bang, ikhoma hwome chix cha chiapak.

³⁴ Ikoxlechu süpahibu kha angkya mixsün tuitae chix chak angkya pax Jisu samba ma tsunle anop; ija füi tomle aji hia ti jenle lai.

³⁵ Ija ngünkya mixe kaxkhi fa: Chixe otsingtsing wüi akaxle, chixe kaxthai zang münwün le kue awanpu; ija a hünzomechu mongong angkya hanpak changle.

³⁶ “Chix ang za tuitachu münapaküi”, le Otsao Lai kax ma tüikya ngai angkya hanpakma ile chang.

³⁷ Ikoxlechu Otsao Lai jongta khama thüi: “Khünaknue owa to tsunle anop, hwome chix to huüi.”

Jisu Mang Zukya

³⁸ Ifüima Arimathia nok Jusep, Jehudi nok pünpa-chongwangbu thua zalaxle pyen ngokya Jisu wangshem tuita, chixe Jisu mang pao angkya Pilat ma ju. Pilat-e ija chix ang kox. Idaile chix hüilaxle Jisu mang pao.

³⁹ Üntoxle Nikudema, jata Jisu hato zuile nguikya mixsün, ongan müikya so tamchu ongan müikya hathop tuak punyi bün tukux koplaxle Jusep füi tomle pao.

⁴⁰ Okhie Jisu mang ajo laxle Jehudi nok mangzuk wanlom ningle, nyidax füi loplaxle mang zu ang atha anyem.

⁴¹ Pünsak ma takle Jisu langkya zuima, tsawat tuita tüikya. Ija tsawat khama khünak mang otuechu matoxkya zuk hozün tuita tüikya.

⁴² Tamchu ija nyix a Jehudi nok pangpwon hanpakma asuikya nyix daile, ilaxle zu angkya nui hoxchwon ma tüikya daile, hokhie Jisu mang ikhama tox.