Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

JUHAN 10 - OTSAO BAIBEL (BSI)


Chun-Nyetmix Bama Kaxpan

1 Jisu-e akax: “Otsingtsingma kue hünzom ang thüipu: Khünak owa chun thom khato fülom makhange chidongüi hex, ikoxle mama lom makhange zün akaile dongüi hex, chix a tuita pa-lole laxkya ahux mix changpu.

2 Ikoxle owa fülom makhange dongpuix, chix a chun-nyetmix changle.

3 Fülom nyetmixe chix ang ka daple fale, ilaxle chunbue chix kax atatle; tamchu chixe chunbu ang mün makhange nyakle ilaxle chun ibu chixe jenlo le zunle paole.

4 Otue chixe ibu homtho to alaipuix, chix a hwom thoma leüi, ilaxle chunbue chix man tole azuiüi, chemthüikoxle hwome chix dingzak awanle.

5 Mixhing füito chipaoüi, itülüi hwom chix thoto afale mix paoüi; chemthüikoxle hwome chix dingzak müntsing.”

6 Jisu-e ija kaxpan hwom füi akax, ikoxlechu chixe ija chem hanpak ang akaxpuix, ija hwome awanle lax ang chitho.


Jisu a Chun-Nyetmix Amüikya

7 Ija khoma chatlechu Jisu-e hwom ang thüi: “Otsingtsingma kue hünzom ang thüipu, chunbu hanpakma fülom ang a ku changpu.

8 Ku thoma hüikya mamabu pangnu wüi ahux mixbu changpu tamchu pa-lole laxkya mixbu changpu. Ikoxlechu chunbue hwom kax ma chilax.

9 Ku a kafülom changpu; owa ku makhange hommong to nopüihex, chix khosünüi; chix a dongpue laipue le ahamüi ilaxle fum tsüt angkya nui ataküi.

10 Ahux mix a ahux ang tamchu lang ang ilaxle ama angle ngui wüi; ikoxle ku a hünzom ang khüzün naxtüi ang tamchu ija okhongui le natüi angle hüipu.

11 “Chun hanpakma zi ang achwonle tüikya chun: nyetmix amüikya a ku changpu.

12 Ikoxlechu owa hingchak achakkya mix hex, tamchu chun nyet mix tsingtsing chichang puix, owa chunbu hopunuchu chichang puix; hulax shwonbu hüikya ma. Chixe chunbu dantoxlaxle pao ma sütüi, ilaxle shwonbue ibu chun shingle kopüi, ile hwom a anyaple asamüi.

13 Chix a paole maxünüi, chemthüikoxle chix a hingchak lanlan achakkya mix changpu, idaile chunbu hanpakma chix ma hünlix müntüi.

14 Chun-nyetmix Amüikya a Ku changpu; chemle Apae ku awan tamchu kue chix awanpuix,

15 ilailaile kue ma chunbu awanle ilaxle hwomechu ku awanpu. Ku tsün a chunbu hanpak ang dan kox ang tsupu.

16 Ikoxle ija othom kha angkya chichangle, ku ang chun mamabuchu wüi tüihule; kue hwomchu wüi apüi angkya changle; hwome ku kax ma laxle tüiüi, ile nyetmix tuita fangma othom tuita ang achang angkya changle.

17 “Apae ku to mongkünle, chemthüikoxle tam chatle atak angkya hanpakma kue ku tsün kox ang tsupu.

18 Ku angkya ku tsün owaechu pale paokya chichang ikoxle kue mongtsu laxle ija ku tsün koxpu. Kox angkya tamchu tamchatle lax angkya tsakzong ku ma tüile. Kue ile mok angkya a Apae ku ang koxkya kaxtom changpu.”

19 Ija zangwün khoma Jehudi khünakbu khama ahan angkya tamlai.

20 Hwom züizüie thüi: “Chix ma bao tüile! Chix a ongat changpu! Hünzome chix kax chemlom ang apapu?”

21 Ikoxle mamabue thüi: “Bao füikya mix tuita ile akax angkya oli münchang. Bao tuitae mikduak mix ang mik daple kox ang thoüi hia?”


Jisu Pongle Chikop

22 Ija pongma zangwa changkya ilaxle Jerusalem ma Zangshwom-Hom Atsaokya Pangpwon asu.

23 Jisu a Zangshwom-Hom angkya Solomon nya-o ma ahamle ngokya.

24 Jehudi khünakbu chix akhople afoxlaxle chix ang thüi: “Nange kwom ang kho otukux asamle thom angkya? Nang Khrista jangchang thüichu angaile akax hüi.”

25 Jisu-e hwom kax to lan: “Hünzom hama kue wündaoa, ikoxle hünzome ku to chiong; kue Apa mün ma mokkya mwotbue ku hanpakma kaxkhi fale,

26 ikoxlechu hünzome chiong; chemthüikoxle hünzom a ku chunbu chichang.

27 Ku chunbue ku kax atatle; kuechu hwom mün awanle ilaxle hwomchu ku füito azuile.

28 Kue hwom ang oshuk chitüikya khüzün tsün koxpu, ilaxle hwom a tamchu chiziüi. Ku chak angkya hwom owaechu pale chipaoüi.

29 Apae ku ang koxdaokya a pangnu thakma achongkya changle; ilaxle owaechu ibu Apa chak tokya pale pao ang müntho.

30 Ku üntoxle Apa kukhi a tuita changpu.”

31 Izumachu Jehudi khünakbue chix to thup angle long tswon.

32 Jisu-e hwom ang thüi: “Apae koxkya müikya mwotbu kue hünzom hama huanuma mokle ahodaoa; ijabu khama opupu mwot thaikya khoma hünzome ku to thup angkya?”

33 Jehudi khünakbue chix kax to lan: “Kwome nang to müikya mwot khomale thupüi münchang; ikoxle Zang adakya khoma thup angkya changle! Nang khünak tuita olekyae nang lualua to Zang ang achang ang azong ngole.”

34 Jisu-e hwom kax to lan: “Hünzom a zangbu changle le wanlom ma zale tüile.

35 Otsao Lai kax a othuithuima otsingtsing changpu; ilaxle chix kaxho fadaokyabu ang Zange zangbu changle le akaxle.

36 Ku bama, ku a chaxwannu to Apae tsanle ngui ang tompu. Jangchang thüikoxle, kue ‘Ku a Zang Hosa changpu’ le thüikya khoma, ija a Zang ajaokya kax changpu le ku ang chemle thüipu?

37 Kue, ku tsanle ajokya Apa mongtex ma chimok thüikoxle, hünzome ku tochu taxong zi.

38 Ikoxle kue ile jangmok thüikoxle, hünzome chiong koxlechu, hünzome ku ma Apa tüile tamchu ku Apa ma tüile le awan ang kop angkya kuxma, kue mokkya mwotbu to thüi ngaxchu onglax.”

39 Tamchatlechu ija khoma wüi hwome chix kop ang azong.

40 Chix Jordan shuanu tachi to, ami pongma Juhan-e bapti koxle ngokya khato pao. Ilaxle chix ija khato nui.

41 Chix hato khünaknu huanuma nguilaxle thüi: “Otsingma Juhan-e ohünotün mwot chemchu chimok; ikoxlechu chixe ija mixsün bama akaxkyabu pangnu wüi changle hüile.”

42 Ilaxle ikhato khünakbue chix to ong.

Wancho Naga Bible - OTSAO BAIBEL

Copyright © 2012 by The Bible Society of India

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ