JONA 1 - OTSAO BAIBEL (BSI)

Jona-e Jowanpa Kax ma Chilaxkya

¹ Nyixta Jowanpae Amittai sasün Jona füi zangwün.

² Chixe thüi: “Ija chongkya tingnu Ninewi to paokox ilaxle ija füi akaxkox; ikha angkya khünakbu chemtukuxle chichang-chizangkyabu hex kue tikle ngole.”

³ Ikoxle Jona a Jowanpa thoto azwon ang opüi chito mix paole azang ang azong. Chix a Joppa to ngui, ikhato chixe Spain nok to ka angkya khua tuita atak. Chixe otha kox ilaxle ikha angkya khünakbu füi tomle Spain to ka ang achex. Ikhato chix a Jowanpa tuntho angkya paole azangle ngotsuaküile thüt.

⁴ Ikoxlechu tinu khato Jowanpae chongkya zangchei ahüi. Ija zangcheie thukya khoma khua a akhixle pao angkya thama ma tüingo.

⁵ Ikhama tüikya khünaknu tüle abüt-aban ilaxle hwom pangnusae wüi ma zang-zang nyakle hwom khosün hüile akhong. Ifüima khua ti to maxüi ale hün acha angkya hanpakma, hwome khua angkya hün ti to tswonle awüt Ipongma, Jona a khua okha to donglaxle mikngüt müile jiple ngo.

⁶ Khua chei lompa-e chix ikhato atak laxle chix ang thüi: “Nang chemmok ang jiple ngopu? Zolax ilaxle nang khosün hanpakma nang Zang to joplax. Owatsing chixe kem to chingchalaxle kem azang ang tomtüilax.”

⁷ Ikhama tüikya khünakbue tata füi akaxle thüi: “Kem khama owa shoma khoma keme iningkya sikngün apong angkya atakpuix tsingang nantakle changhax.” Hwome ile mok, ija ma Jona shoma khomale nan dong.

⁸ Ikhoma hwome chix ang thüi: “Athaxpi, kwom hama akaxhu! Ija thama owa khoma changpule feüi? Nang ikhama chem mok ang ngo? Nang opupu nok tokya hex? Nang a opupu jat-li changkya hex?”

⁹ Jona-e lan: “Ku a Ibri khünak changpu. Kue tinu hia haxtok zingkya Jowanpa, zangkangting Zang to shwompu.”

¹⁰ Jona-e chizakle chix a Jowanpa thoto paole ngokya mix changpule wün. Ija kax atatlaxle ikha angkya khünaknu nok za, ilaxle hwome chix ang thüi: “Ipongpongkya khomtsikya mwot ija nange chimok fang jao mokpu!”

¹¹ Zangchei a sisile shixle male jao hüingo, ikhoma ikha angkya khünakbue chix ma atüi: “Ija zangchei adang angkya hanpakma kwome nang to chemle hwonüi?”

¹² Jona-e lan: “Hünzome ku tinu khato tswonle awütkox, ijama ija zangchei zaküi. Hünzom ipongpongkya zangchei thama füi apong ang tomkya a ku thaikya khoma changpule kue awanle.”

¹³ Ile chang koxle ikha angkya khuachei mixbue khua a kakax chito ahüi ang azongle hwome janzüi abakle azongle khua chei. Zangchei sisile shixle male hüi, ikhoma hwom tüta chito paole azang ang chimüile chang.

¹⁴ Ikhoma hwome Jowanpa to nyakle akhong: “O Jowanpa, kwome zangjoppu, ija mixsün mik amütkya khoma kwom to sik taxangününfa! Ija mwot bama hünlit nang changpu chemthüikoxle ija a, O Jowanpa, nang mwot wüi changpu.”

¹⁵ Ifüima hwome Jona tinu khato tswonle awüt, ifüi tomle ija zangchei dang.

¹⁶ Ija ngünlaxle khuachei mixbu ang Jowanpa chathua za angkya ahüi ilaxle hwome chix thotha angkya tsaosax.

¹⁷ Jowanpa kaxtom ma Jona a nyax chongkya tuitae jok, ilaxle chix a nyax wok khato nyix azom ja azom ngole hüi.