JOB LAIPEX 7 - OTSAO BAIBEL (BSI)

¹ Khünak tsün a tüle zong tüikya süpahibu ningle changle, Azongle mwot mokkya sütmix-mwotmix ningle,

² Dahai tuitae kongkya kha zangkhung lomkya ningle; mwotmok mixe hingchak mün tan-ngokya ningle changle.

³ Lyetjang füima lyetjang ku ozün ma ngo angkya chem-mwot müntüi; Zangnak füima zangnake ku ang mongma apüile ngole.

⁴ Chemtue ku jip angle lya ma shuipuix, hanpak-zanghan linle ahüi; wüntungle ku lop-khople ngolaxle zangngai sungle tan-ngo.

⁵ Ku tsangtsa a chonge awangle tüile; ija a buk-e awang laxle tüile; ku makbu tokhange achutbu jenle.

⁶ Ku nyix-hi-hanpak komle künmax-mongshanle akai, Nyitak-lak füingaxchu sümomle aham.

⁷ Texle atak-hüi, O Zang, ku tsün a tuita zakdün zaza wüi; Ku mongmüi a ashuk tomtata daoa.

⁸ Nange ku athax ngünpu, ikoxle chatle tam mün-ngün. Nange ku janglom thünba, ku a paoünle bangüi.

^9-10 Zangfwom tuita amuale samle paokya ningle, khünak tuita zile pao ilaxle chatle tamchichat; süntsing-münwanbu khünak noke chix alakle awüt.

¹¹ Münchang! Ku a dang ang müntho! Ku ang mongtsikle üntoxle mongsile, kue zangwün angkya wüi changle.

¹² Hünzome ku büthüikoxle nyele thompu? Hünzome ku a tinu khatokya müima-nyaxshix tuita ang laxpia?

¹³ Ku lya ma shuipu ilaxle mong nazak ang azongpu; Kue ku to tsütle kakle ngokya adang angkya lompu.

¹⁴ Ikoxle hünzome ku wünmangbu füi aza-anale changle; ku a ija tsangtsa ma nuzaole ngokya füi, Dingkux ma fyetle langdao koxwüi müisele,

¹⁵ miksho ma ale ang tamchu wünmang ma ku hato hüi ang tomle.

¹⁶ Kue khüzün pi dantoxdaoa; ku ozün ma ngokyae ngwomüna. Ku, ku tata naxngokox. Ku ozün ma ngokya ma chem olüi müntüi.

¹⁷ Hünzom zongto ku ningkya mix Khütkhaxkya mix ang laxle chemto akhi ngopu? Kue tüle wüi mokngolax hünzome omalax ang akhi ngopu?

¹⁸ Hünzome nop-fole ku to hule ano, Üntoxle janpong bato ku to wanle ano.

¹⁹ Kue thuakjok tsuakkya kople, Hünzome ku füi adu ang münthopia?

²⁰ Hünzom kun-nyetmixbu to ku ochax-e maklax ang tompia? Hünzome ku a mike zikya thang ang laxpia? Ku a hünzom zongto chongkya hünlix ang changpia?

²¹ Hünzome otuechu ku ang thailak müntüitsuak pia? Kue thaile mokdaokya ochax thailak müntüitsuak pia? Lebama wüi ku zuk khato ngoünüi, Hünzome ku lom pongma ku a paoünle bangüi.