JOB LAIPEX 6 - OTSAO BAIBEL (BSI)

Job

^1-2 Ku sikngün mongthang a tuak ma thütkoxba,

³ tinu khatokya sak füi ngaxchu sülixle bangse, idaile ku tsaima-kaxshixkya to hünzom tax-abüt.

⁴ Khüthak Zang-e ku to sanjunbu füi tople, ilaxle ibu khun-hinge ku tsangtsa awangle. Zang-e chix thamabu thong-thünle ku-zan to ka ang dandaoa.

⁵ Mantsak tuita fum fünle saxpongma mongzom müipu, maihu tuita a tsax sax pongma dangpu.

⁶ Ikoxlechu hum chitüikya süt haisokkya owae saxthoüi? Oti mongtho ma ozing-olong chemtüi?

⁷ Iningkya süt saxsele ku münazam; kue asaxsax pangwüi ku zongto kak-lak ang achangle.

⁸ Kue ajuju Zang-e büthüikoxle chifa puix? Ku zangjop to chixe büthüikoxle chilan puix?

⁹ Hule chingole chixe ku langle awütkoxbae!

¹⁰ Chixe ile mok angkya kue awankoxbae, ku-kak ku-lak tükux tüikoxchu ku mongmüi-tungle atwom füt-sedai. Zang a otsao changle le kue awanle; chixtsai-chixkaxbu to kue chemtuechu münchangle mathüi.

¹¹ Ozün ma ngo angkya ku ma chemtsak-chemzong tüilaxpu? Monghom angkya chitüi khato ku ozün ma ngo angkya a chem mwot tüilaxpu?

¹² Ku a long füi zingpu lehia? Ku tompo a khop changpu lehia?

¹³ Ku lailai to azangtsuak angkya ku ma chem zong müntüi; ku to süfonghüi thüi angkya olom ojongtochu müntüi.

¹⁴ Iningle sikngün pongma, kue Zang chiawüt koxlax awüt koxlax, kue ma to akhüixkya zuikhuibu lompu.

¹⁵ Zang chiwat pongma zanle paokya shuasa ta ningle, zuikhuibu, hünzome ku dyenle thomle.

¹⁶ Shuasabu to zangkong jundütkyabue chwople thomle,

¹⁷ ikoxlechu zangkham sheme ija chitüikya ang chule sam, ilaxle shuajen a chemchu chitüile zuazoxkya shuasa ang achangpao.

¹⁸ Ut zyembu ti lomle sam; hwom tüjong-tüjong alople aham ilaxle sak-hax to zile pao.

¹⁹ Sheba hia Tema angkya ut zyembue tüle ti lom,

²⁰ ikoxlechu hwom monghom a zanzokkya shuasa jen ma ashuk.

²¹ Hünzom a ku zongto shuasa jajen ibu lailai; hünzome ku osho ngün üntoxle zalaxle anongle pao.

²² Kue hünzom ma ku ang hingho fahüile jupia? Chichangba ku hanpakma owawa dyen-ngankoxle thüipia?

²³ Zan hia pünshix-wangmabu chak tokya ku azünhüile thüipu?

²⁴ Changle, ku hama apuahu; ku thaikyabu ahole fahu; hünzom kax to apale ku dang ang.

²⁵ Otsingtsing zangwünbu a changpule lax angkya jao, ikoxle hünzome ongat-ongui zangwün wünle.

²⁶ Hünzome ku zangwün a kaxbi-ngaoba zangwin kaxle thütle; jangchangba ija ku mongmüt zangwün to oma ang lan-ngo?

²⁷ Changle, hünzome zasa-khaxsabu chizing to nantakle; üntoxle ma zuikhuibu angkya hünzome olüi saxle!

²⁸ Ku thün to hulax, ku münatse.

²⁹ Hünzom a okhonguile atsai-akax paodaoa. Thaile ngokya dantox dao. Ku wün tax-ahai, ku a sule tüile.

³⁰ Ikoxlechu hünzome thütle ku atse ngole, ku thaingokya khato kaxtsing zangwün ang müntho, lea.