JOB LAIPEX 41 - OTSAO BAIBEL (BSI)

¹ Nange Lewiathan müinu nyaxpwon jankwot füi kop chichangba zu füi ole ma khakle chang ang tho ang chami?

² Nange zu füi hukle chix nakua apatle alyet ang tho ang chami? chichangba chix kaxbu apatle jankuix sho ang tho ang chami?

³ Chixe nang ang shong dan fahu le thüi ang chami? Chixe nang ma chingcha angkya tsaiju kaxjule chang ang chami?

⁴ Chixe nang füi im-jo le chang ang chami? üntoxle othuithuima nang thothale ngo angkya tsaosax ang chami?

⁵ Tsom-o ningle nange chix fünle kop ang tho ang chami? nang dacha hwom abüt ang tom angkya tütali sa ningle a?

⁶ Nyaxkop mixbue chix otha anai ang chami? Thalex mixbue hang ang chix tsople akhix ang chami?

⁷ Nange chix ngwotnui nyaxhuk paxbu füi awang ang tho ang chami? Harpon füi chix khang thuple apat ang tho ang chami?

⁸ Chix to tam twonle wanlax ilaxle nang chatle münazongüi; ija zanhok nange chemtuechu chialaküi!

⁹ Opange Lewiathan ngündao laxpuix hwom ang mongmaxle üntoxle hax to nguakle.

¹⁰ Chemtue chix zoüihex, chix a tüle za-adünle changle; owa angchu chix tunthoma ajong angkya mong münchong.

¹¹ Chix to sing üntoxle mak chilax homtoxle owa ngotsuak? Ile chaxwannu angkya khünak owaechu mok ang müntho.

¹² Lewiathan cha-chak bama kue nang hama wünfang üntoxle chix chemtukux chongpuix üntoxle janzüi füi tüipuix kue nang hama wünfang.

¹³ Chix tok-khwon owaechu akyetle awüt ang chichangthüiba chixe awunkya khyep-di owaechu tople apat ang müntho.

¹⁴ Khompua-atsikkya owabu tsyenthuile tüikya chix kax owae hyenle aka ang thoüi?

¹⁵ Chix tokfüi a dibu füi tsyenthuile zinglaxle tüile. Ilaxle ibu a tomwüi khakle amongle üntoxle long lailaile tsakle tüile.

¹⁶ Pangnu wüi tata füi asople amongle, oba makhange zangwin ngaxchu nop ang chithole shingmongle tüile.

¹⁷ Ibu a shingmongle ta ma akungle khale thomle, ibu tata füi atsaile chem füichu bele pao ang müntho.

¹⁸ Chix akhik pongma nakua makhange wün laile, ilaxle chix mik a zanghan chüdün pongkya lailaile khile.

¹⁹ Chix wikha makhange wünlebu laile, üntoxle ti jenkya ningle khik-khik-sao le wünpuabu pile laile.

²⁰ Chix nakua makhange wünkhutbu thokle laile, tik fang ma takkya hingmang angkya laikya wünkhut ningle.

²¹ Chix zakdün füi tomle wünchua ang süt; chix wikha makhange wünkhut athwomle lai.

²² Chix dingtom ma zongtüikya huanu, chix füi apongkya pangnusa wüi tüle zale.

²³ Chix tsangtsa khwon ma ikha naile lükya kha jao chitüi; ija a wün to ma-akhikkya jan lailaile tsakle.

²⁴ Long ningkya chix mong a chemthua chu münza, chipua-chishokya longnu tsakkya lailaile.

²⁵ Chemtue chix ajongüihex, tüle tsak-zongle tüikyabu ngaxchu abüt-abanle; hwom a zakyae chem chithüile maxle.

²⁶ Chix thomzün ang tom angkya kax müntüi; chix to mak-kha angkya chemningkya pax chichangba sanhap chichangba paxlo chemchu müntüi.

²⁷ Chix zongto jan a tsaxsa ningle muakya changle, üntoxle wi jan a pünbui ningkya onai changpu.

²⁸ Chix zik ang tom angkya sanhap chemchu müntüi; longnubu füi chix to thupkya a tsaxsa füi fitkya ningle süt.

²⁹ Chix zongto kiathox a tuita tsaxsa ningle, üntoxle khünakbue pax füi dao pongma chix nyile.

³⁰ Chix wok angkya khwonzabu a komtik shix okhaobu ningle; ibu füi chixe haxkhut kho füi laoxpupule hax khutle laox.

³¹ To le ngokya ti ningle chixe tinu shinthuk angkya ti alok ang tomle üntoxle münga tale thomkya tik ningle omwop alaile.

³² Chix man to jikjeple oman toxle üntoxle tinukha a thobokle thuakbuak ang achangle.

³³ Chaxwannu ma chix füi apyen angkya chemchu müntüi; chix a ojao zakya chitüikya zünmok tuita changle.

³⁴ Müinu-nyaxpabu pangwüi to chixe asongle hule; chix a faomüi khama müi wanghom jao changle.