JOB LAIPEX 4 - OTSAO BAIBEL (BSI)

Pongwang lükya Zangwün (4.1—14.22) Elifaz

^1-2 Job, kue zangwünkoxle nang to poxüntoxcha? Athax ku ang dangjajale ngohüi thüiüntoxcha?

³ Nange khünaknu hama anwot-anole changdaoa; chak ma zong chitüikyabu ang tsak-zong koxle changdaoa.

⁴ Chemtue owawa atile, naile, na-juale max; nang zangwüne ija khünak ajong angkya janzüi kox.

⁵ Athax a nang hato sikngün angkya othui hüitüi; ifüi apong ang nang jemax-hwonsamle changtüi.

⁶ Nang a Zang tong shwomkya mix, ma tsün ma thaile le fe ang ojao chitüikya mix; nang ma mongong –chalom, monghom tüiangkya jao.

⁷ Athaxpi anongle chatle tam ajangle anohu; otsao khünak owawa thama füi apongkya mix bangcha hunohu.

⁸ Ochax manzai üntoxle ochax liwüi saikya kue ngünle hüipu; athax ibue chimüikya hia ochax oziak-opua athünle ngopu.

⁹ Zangchei-cheinu ningle Zang-e chix mongtsik füi hwom oli thule.

¹⁰ Ochax khünak mailangbu ningle ahungle üntoxle akhwomle; ikoxchu Jowanpa-e hwom adangle üntoxle owabu hingle.

¹¹ Osüt lomle sax ang chithole owa chitüikya mailangbu lailaile; hwom zile pao ilaxle hosa hwom pangwüi afale samle.

¹² Hanpak tuita ma dangwüi dangle kaxho tuita hüi, kue ija kaxho müt-mütle tix atat ang kop.

¹³ Wünmang makya ta ningle ijae ku to mikngüt amale pox.

¹⁴ Ku a tüle aban üntoxle abün; zakyae ku tsangtsa pangwüi anyon.

¹⁵ Zangngai zangwin tuitae ku thün to jep; zakyae ku khangmun ajong.

¹⁶ Kue ikhama tütali ajongle ngokya ngün; kue khile hukoxchu ija chem hex awan ang chitho. Ifüima dangle ngokya khato kaxzing tuita kue atat:

¹⁷ “Zang mik-hu ma owawa otsao ang changtsuak ang chami? Chix zingpupa pomtho ma tsaothale tüitsuak ang chami?

¹⁸ Zang-e zangkho tokya chix dabu to ngaxchu mün-ong; kaxtaimixbu ma ngaxchu chixe thaikya atakle.

¹⁹ Komhax oja tikkhe lailaile akhixle pao angkya to; ija füi zingkya chix chakzing to, chixe mongong ang thoüile nange thütpia?

²⁰ Khünak tuita swomsa ma ozün ma tüi ang tsuak; hansong thoma owa chingünle zile nui ang tsuak.

²¹ Chix ma chem tüipuix ija pangwüi paoüi; chix a jekho chingui homtoxle ziüi.”