JOB LAIPEX 3 - OTSAO BAIBEL (BSI)

Job-e Zang to Kaxthup-ngaotün

¹ Oshukma hwom dangle ngokya kaxzakdünle Job-e chix puxkya nyix to thuakzomle chang.

Job

^2-3 O Zang, ku puxkya nyix to thuakzomfa; anu wok ma ku atüikya zangnak to thuakzomfa!

⁴ Zang, ija nyix a zangnak ang achangle achatfa; ija nyix tamtexle atak ang taxtomünfa; ija nyix to zangngaie fa ang taxtomünfa.

⁵ Ija nyix a zangnaktukle shixkya nyix ang achangfa; zangfwom füi joxle ikha angkya zanghan apaofa.

⁶ Zanglao angkya ija zangnak awütfa; ija tamchatle akiak ang taxtomünfa.

⁷ Ija ja mongmüi jao chitüile zangnakkya to, chipua-chishokya wun ang achangfa.

⁸ Lyetnu zanghan luk-ling abax thomkyabu hama, ija ja zangnak to thuakzom angkya bama, hingtwonpabu hama akaxfa.

⁹ Swomsa lyettsie nyan ang taxtomünfa; ija ja nakkya zangnak ang, füinop zangngai ngünse tex ang taxtomünfa.

¹⁰ Sikngün-mongthang hato angaile ija wün, ku pux ang tomkya bama thuakzomfa.

¹¹ Anu wok ma tüitanto chipao koxchu ku, puxfüishemle zidaokoxba müisedai ku.

¹² Anue ku omalax ang jak ma paikya hex? She tsomti füi ku chem ang tuxkya hex?

¹³ Ipongma wüi zidaopuix thüikoxba ku, athaxpongma nazak müile ngoünsedai ku.

¹⁴ Homzai alai tsuaklaxle wanghombu, tamchu alixachongbu lailaile jipbashui ngoünsedai ku.

¹⁵ Mahax-mahom hun, thalix longbu füi awanglaxle, wangchasabu tokdomdakya ningle, jipbashuile ngoünsedai ku.

¹⁶ Nampuxtankya naodomsa lailaile, jipbashuile ngoünsedai ku.

¹⁷ Chichangchizangkyabue ma ochax mwot, zukting matix ashuk-aza ang tomle; namna-namjuale mokkya mixe mwot, ashuklaxtix ma nazak ang tomle.

¹⁸ Kun ma kople thomkya mixe ngaxchu, atsang ngokya kaxtom khato, ma mong nazak kop ang tomle.

¹⁹ Ikhato a pangnusasa wüi, zangle wünkya hia owaechu chitikkya khünakbu, dahai pangwüi mongtextex ma ngo ang tomle.

²⁰ Hwom, sammixbu ningle ngo ang büthüikoxle tomsi? Künmax-mongshankyabu to zangngaie, omalax ang nyansi?

²¹ Hwome zik to huanuma sungkoxlechu ija tamchihüitox; thalix tui lompupule lomkoxchu ija chiataktox.

²² Zi üntoxle akhünle machang tanto hwom ang mongzom tamchimüitox;

²³ Zang-e hwom füichi hanpak pyenle thom, pangnu chitokhange hwom nyitua humthom.

²⁴ Sax-lax haxkux lüixto ku mongsoppu, ku mongsik-ngünle akhongkya münzakpu.

²⁵ Ku khompuatsile hia zale ngokya pangwüi, otsingtsing tomtata ang achangle hüi.

²⁶ Ku ma mongsom nazak chemchu chitüi, ku sikngün ashuktoxkya chitüi.