JOB LAIPEX 2 - OTSAO BAIBEL (BSI)Bao-e Anaolechu Job to Thwontsing 1 Chemtue anaolechu ozün ma tüikya ding tokyabu Jowanpa pomtho ma asox angkya nyix nguile hüipuix, Bao hwom khama womle tüikya. 2 Jowanpa-e chix ma atüi: “Nang oma-ngokya?” Bao-e lan: “Ku a tüjong-tüjong alople chaxwannu ma khuafaole aham ngokya changpu.” 3 Jowanpa-e atüi: “Nange ku dapa Job ngünhex chami? Chaxwannu ma chix lailaile mongong füikya hia müikya khünak owachu müntüi. Chixe ku to shwomle ilaxle tütali ma thaithaxle chichang angkya hanpakma chix tüle khünzaile. Nange chemtsai-chemkax chitüikhato Job zan to ka angkya kuma tsaiju-kaxjule changpu, ikoxlechu athaxkople Job mongong ma otiatia wüi.” 4 Bao-e lanle thüi: “Ozün ma ngo angkya hanpakma khünake pangwüi dantox angkya changle. 5 Ikoxle athax nange chix tsangtsa to po-nole jangchangthünba; ima wüi ngünthünthünle chixe nang to thuakzomle changüi!” 6 Ikhoma Jowanpa-e Bao ang thüi: “Müiüi, chemthüikoxle chix a nang tsak-zong fang ma tüile, ikoxlechu nange chix mik max ang chitomüi.” 7 Ifüima Jowanpa ngwotnui angkya laile paolaxle Bao-e Job tsangtsa awangle mak-chak alaile kox. 8 Oma-oshixbu awutle athün thomkya khato paolaxle ikha angkya tikkux khaosa tswonlaxle ija füi chix mak to sikle ngo. 9 Hosheko-e chix ang thüi: “Nang mongong owang pongkya lailaile athaxchu otiatia wüi hexnyi? Zang to thuakzom laxle nang büthüikoxle chizi?” 10 Job-e lan: “Nange ongat kax akax ngole! Chemtue Zang-e müikya oli kem ang koxpuix, keme pongle koptüi; Jangchangthüiba chixe kem hato sikngün ahüikya zuma a keme chix ang omale büthüikoxle thüiüi?” Chixe ibibile sikngün apongle hüikoxngaxchu Job-e Zang zongto oma chemchu chiakax. Job Zuikhuibu Nguikya 11 Ibibi mixsün azom a Job zuikhuibu changkya: Teman tingnu angkya Elifaz, Shuah chaxwan tokya Bildad üntoxle Naamah chaxwan tokya Zofar. Chemtue hwome Job sikngünle ngokya atatle lax, chix mong asom angkya hwom mongto zangwün. 12 Ochu tokhange wüi hwome Job ngünle lax ikoxlechu hwome chix chitsingtsuak. Chemtue hwome tsingle changpuix, hwom tüle-tüle azole akhongle sop. Hwome ma mongma ahole manyi-mazabu akyet ilaxle ding to labu atwomle ibu füi hwom khangto fu. 13 Ifüima ikhama hwom chix füi tomle nyix-anüt wün-anüt zangwün chitüi homtoxle haxkha to thungle nui, chemthüikoxle itukuxle chix sikngün ngokya hwome ngün ang kop. |
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
Bible Society of India