JIHUSUA 6 - OTSAO BAIBEL (BSI)

Jeriko Nguakkya

¹ Israel nok dong ang chitom angkya hanpakma Jeriko tingnu pan a haklaxle nyele ngo. Ija tingnu to khünak owachu ngui ang chitho tamchu ikha angkya owachu laile pao ang chitho.

² Jowanpae Jihusua füi akax: “Kue Jeriko angkya wanghompa hia chix süpahibu füi tomle Jeriko bakle nang chak to danpu.

³ Nang ilaxle nang süpahibue hanpak to tampong nyix azok ija tingnu akhople khualyenle aham angkya changpu.

⁴ Nguapabu mixsün anüt, nyazong tuipong koplaxle Tsaotsüt Suak tunthoma ahamüi. Nyix anüt lükya to nang üntoxle nang süpahibue ija tingnu anüt ma akhopüi. Nguapabue nyazong mütüi.

⁵ Hwome nyazong okuilole mütüi. Hünzome ija atatkya füi tomle noknu a sungdünle akhongüi, ipongma tingnu katuk tsunle hüiüi. Ifüima süpahibu küithole tingnu to nopüi.”

⁶ Jihusua-e nguapabu se ilaxle hwom ang thüi: “Tsaotsüt Suak koplax ilaxle mixsün anüt ija tuntho male-kox; hwome nyazongbu koplax.”

⁷ Ifüima chixe chix khünakbu ang ija tingnu akhople khualyen angkya kaxkox, ipongma Jowanpa Tsaotsüt Suak tunthoma lomkop mix le.

^8-9 Jihusua-e kaxtom koxkya ningle, nyazongbu koplaxle hüikya nguapabu lomkop mix le; hwom füifüi ma Tsaotsüt Suak koplaxle tüikya nguapabu hüi. Ipongma nyazongbu mütle aham.

¹⁰ Ikoxlechu Jihusua-e chix khünaknu füi, chixe kaxkoxle machang tanto kaxkaxle hia akhong-akhale chichang angkya kaxkoxle thom.

¹¹ Idaile chixe ibu othom ang Jowanpa Tsaotsüt Suak koplaxle hanpak to tampong ma akhople chang angkya akax. Ifüima ibu chatlaxle hwom pom ma wüi wünpom.

^12-13 Ofüinop Jihusua kaile wüi zo ilaxle othom anyi lükya machu nguapabu hia süpahibue othonyix mokkya lailaile wüi lomkopmix thoma laxlaxle, nguapa hia süpahibue ija tingnu akhople aham; anaole Jowanpa Tsaotsüt Suak koplaxle nguapang thom azuile hüi. Otua komle ziakopmixbu hüi. Ipongma nyazong mütle aham.

¹⁴ Ofüi nyix chuwüi hwome tingnu akhople nyazong mütle tam akhople aham ilaxle pom to chat. Ile hwome ija mwot ilele wüi hanpak nyix azok mok.

¹⁵ Nyix anüt lükya tochu zangngai füi tomle zolaxle ilele wüi othom anüt ma ija tingnu akhople khualyenle aham.

¹⁶ Othom anüt lükya khualyen ashukle nguapabue nyazong müt-hax khakhama Jihusua-e chix khünakbu ang sungdünle akhong ang tom, ilaxle chixe thüi: “Jowanpae ija tingnu hünzom chak to koxdaoa!

¹⁷ Ija tingnu tamchu ija ma atüitüi, Jowanpa to shwomkya ang laxle pangwüi olithu angkya changpu. Tsangtsa hangle ngokya mixcha Rahap hia hwom homkha a mik max ang chitomüi, chemthüikoxle kem zyetmixbu pyenle azünkya a she changle.

¹⁸ Ikoxlechu amüt angkya oli hünzome litutachu chitoxüi; hünzome lax-twonle jangchang thüiningle Israel pom hato thama apüiüi.

¹⁹ Khop, hun, wi chichangba jan ibu a Jowanpa hanpak ang süidaoa. Ibu a Jowanpa suak ma shoüi.”

²⁰ Idaile nguapabue nyazong müt. Khünaknue ija atatkya füi tomle tüle sungdünle akhong, ilaxle pan katuk tsun ang tom. Ifüima süpahibu küithole tingnu to dong ilaxle ija tingnu ziakople chang.

²¹ Hwome ma changlobu füi tingnu ma atüitüi komle, sheko, lüka, taiko, naosom pangwüi lang. Hwome osu-maihu, chun hia zwonbu chu pangwüi lang.

²² Ifüima Jihusua-e amipongma hwom zyetmix ang laxkya mixsün nyi füi akax: “Hünkhie tsaosaxle changdaokya lailaile tsangtsa hangle ngokya mixcha Rahap hato paolax ilaxle hwom kako-homkha pangwüi ikhato apüihüi.”

²³ Idaile hokhi paolaxle Rahap, honu, hopa, hotüi-honao hia hwom kako-homkha bakle apüi. Hwom homkha hia dabu pangwüi hwome lax ilaxle Israel nok pom zuito apüile azün.

²⁴ Ifüima hwome tingnu to wün füi thutlaxle zokle ashun. Hun, khop, wi hia jan, ibu füi zingkya tuina boma mama ima atüitüi komkaile zokle ashun. Jan tuina bakle Jowanpa suak ma dan.

²⁵ Chixe Jeriko to zyet ang mixsün anyi apaokya nyi pyenle azünkya khoma Jihusua-e Rahap hia hwom homkha pangwüi ozün ma tüi. (Anyix kople she füikya sixli Israel nok ma tüile ngole.)

²⁶ Ipongma Jihusua-e kaxkhün ile fa: “Jeriko tingnu angkya azangkya mix a Jowanpa othuak-ozom ma tüile. “Owawae ija homting zaile jangchang thüiningle sasün tüichongpa zile paoüi; ilaxle owae pan zingle changüihex, sasün naoshukpa zile paoüi.”

²⁷ Ikhoma Jowanpa Jihusua füi ngo; ilaxle chix achuak-achenkya münchong chix haxtok pangnu khato wüi zangle paoüi.