JIHUSUA 4 - OTSAO BAIBEL (BSI)

Manwan Longbu Küi

¹ Khünaknu pangnu Jordan shuanu tale letsuak füima, Jowanpae Jihusua ang thüi:

² “Khünak 12 zünlax, homjen foto mixhuak tuipong,

³ ilaxle Jordan shuanu sungkha, Jowanpa Tsaotsüt Suak pailaxle nguapabu ajongle ngokya kha angkya longtom tuipong tswonle apüi ang laxkox. Ibu long hwome hwom füifüile aja hünzom athong angkya onui alople apüile ima dan ang tomkox.”

⁴ Ilaxle chixe zünle kopkya mixhuak 12 Jihusua-e se,

⁵ ilaxle chixe hwom ang thüi: “Jowanpa Tsaotsüt Suak thoma achale Jordan shuanu tole-kox. Hünzom pangnue ma suakto ma longtom tuipong, Israel nok homjen foto tuipong ang tswonle apüikox.

⁶ Longtom ibue khünaknu hama Jowanpae chemle mokdaopuix ija texle atakle lax ang tomüi. Athax füichima, hünzom su-sabue hünzom ma, ija longthün a chem hanpak-hex, le atüikya zuma,

⁷ Jowanpa Tsaotsüt Suak-e Jordan shuanu ata pongma Jowanpae jenle ngokya Jordan shuanu zak ang tomkya manwan changpu; idaile longtom ibue Israel khünak a Jowanpae mokdaokya ija mwot texle atak ang tompu, le hwom hama wünle koxüi.”

⁸ Mixsün ibue Jihusua kax ma lax. Jowanpae Jihusua ang kaxtom koxkya ningle, Jordan shuanu osungkha tokya hwome longtom 12 tswonle lax, longtom tuita a homjen tuita hanpak ang, hwome thongnui alople paile apüi ilaxle ibu ikhama athünle dan.

⁹ Jordan shuanu tanti to Jihusua-e chu, nguapabu ajongkya wama othom 12 ma long athünle dan. (Ibu long a anyix kople tüile.)

¹⁰ Jowanpae Jihusua füi, khünaknue mok angkya kaxtom koxkya mwot ma-ashuk tanto nguapabu a tinu mongto ajongle an. Ija a Mosa-e koxkya kaxtom. Khünaknu nonokhaile tale le.

¹¹ Chemtue hwom tachi ma tüikya hex, Jowanpa Tsaotsüt Suak pailaxle nguapabu khünaknu thothoma le.

¹² Mosa-e hwom füi akaxle toxkya ningle, Reuben, Gad hia Manasseh homjen süifi, azan angkya hanpakma atha-anyemle, khünaknu thoma achale tale bang.

¹³ Jowanpa pomtho ma azan ang achwon laxle hajat punyi tukux khünak Jeriko zui angkya haxsha ma tale hüi.

¹⁴ Ija nyix Jowanpae mokkya mwot makhange Jihusua a khünak zongto tuita chongkya khünak tuita ang e. Hwome Mosa achuak-achenle hüikya ningle chix tsünjang masule Jihusua chuwüi khünaknue achuak-achen.

¹⁵ Ifüima Jowanpae Jihusua ang,

¹⁶ Tsaotsüt Suak pailaxle ngokya nguapabu Jordan shuanu angkya lai angkya kax kox ang tom.

¹⁷ Jihusua-e ile mok,

¹⁸ ilaxle nguapabue shuakax alople changkya zuma, shuanu a amipongkya ningle chatle apongle jen ang süt.

¹⁹ Khünaknue Jordan shuanu pongwang angkya lyetnu nyix bün lükya to tale le ilaxle Jeriko zongma handün chikao, Gilgal ma pom zaile athong.

²⁰ Ikhama Jordan shuanu angkya tswonle kopkya longtom 12 Jihusua-e athünle zing.

²¹ Chixe Israel khünaknu ang thüi: “Athax füichima, su-sabue ija long chem hanpak-hexle atüikya zuma,

²² hünzome, Jowanpae Jordan shuanu azop laxle Israel khünaknu haxzan ma tale le ang tomkya wünle koxüi.

²³ Kem hanpakma Tütsak Tinu zop ang tomkya lailaile, hünzom pangwüi tale matsuak-matsuakle Jowanpae Jordan shuanu tijen zop ang tomkya hünzome hwom hama wünle laxkox.

²⁴ Ikhokhoma wüi chaxwannu angkya khünak noke Jowanpa tsak-zong chemtukux chongkya hex, ija awan ang kopüi, ilaxle hünzome Jowanpa hünzom Zang jento achuak-achenle ngo angkya changpu.”