JIHUSUA 2 - OTSAO BAIBEL (BSI)

Jihusua-e Jeriko to Zyet ang Khünak Akat

¹ Ifüima Kanan haxtok to zyetle hu ang tamnüile chu Jeriko tingnu to hu ang Akasia angkya thongnui makhange Jihusua-e huxsa ma zanhu mix tsanle akat. Ija tingnu to hwom nguikya zuma, hwom a wünpom ang, ma tsangtsa hangle ngokya mixcha Rahap hato ngui.

² Jeriko angkya wanghompa-e ija ja, Israel khünak chix chaxwan thwonlop ang nguile tüileta le atat.

³ Ikhoma chixe Rahap hato kax kox: “Nang hom ma tüikya khünakbu a kem chaxwan zyet ang hüikyabu changle! Hwom alaihüi!”

^4-6 She-e lan: “Khünak züita ku hom to nguile toxpu, ikoxle hwom ojong tokyahex kue müntik. Hwom a zanghan mikmüt füi tomle tingnu pan haküi thoto wüi laile paoünpu. Hwom ochichi to pao ang laipuix müntik münto hom, ikoxlechu hünzom sümomdaole jangzik thüiningle hwom ha alop ang tsuakse.” (Ipongma zyetmix anyi a Rahap-e homkho to dünlaxle she-e thomkya mora-zi-pün thwom füi chwople pyenthomkya.)

⁷ Wanghom süpahibu tingnu angkya lai, ilaxle hwom tokfüi ma tingnu pan-ka hak. Jordan shuanu takya lompong alople hwome Israel nok zyetmixbu achuale zik.

⁸ Zyetmixbu wünpomle majipba, Rahap homkho to dong

⁹ ilaxle hokhi ang thüi: “Kue awanle, Jowanpae ija haxtok hünzom ang koxdaoa. Tingnu angkya khünak nok wüi hünzom thoto za-ngoüna.

¹⁰ Hünzome Ijip nok dantox pongma Jowanpae chemle Tütsak Tinu azople fapuix ija kwome atatdaoa. Jordan shuanu zongma handün chito hünzome chemle Sihon hia Og, Amor nok wanghom anyi mik amütpuix ibu kwome atatle hüipu.

¹¹ Ibu zing atatkya füi tomle kwom zale ngopu; hünzom zing thoto kwom pangwüi ang mongmaxle changüna. Jowanpa hünzom Zang a zangkangting hia chaxwannu pangnu thakma Zang changle.

¹² Athaxpi chix mün ma, kue chemle hünzom to chingcha ahopuix ilailaile ku tamchu kwom kako to chingchakya tüiüile tsaohüi, ilaxle kue hünzom to mongong thomtsuak angkya kuxma münwan tütali fale toxhüi.

¹³ Ku anu hia apa hwom, kutüi hia kunao hwom tamchu hwom kako-homkhabu pangwüi sünle tüiüile tsaofa. Kwom a mik max ang taxtomünfa!”

¹⁴ Hwome she ang thüi: “Kwome akax daokya kax jangthai thüiningle Zang-e kwom mik naxamütkox! Kwome chempang mokdaopuix ija owa hamachu chiwünle jangthom tsuak, kwome thüipu, chemtue Jowanpae kwom ang ija haxtok koxle changpuix, ipongma kwome hünzom khosünle kopüi.”

¹⁵ Rahap a tingnu pan füi asople zingkya hom ma ngokya, idaile ibu Israel khünak thangmik makhange zu ma ashale ajo.

¹⁶ She-e thüi: “Haxkho to tüikya tingkhua to paolax, ile chichang thüiningle wanghom süpahibue hünzom ataküi. Ikha to hwom chatle nguikya shan ang nyix azom azwonle ngolax. Hwom chat füima hünzome ma lom kople pao ang tsuaküi.”

¹⁷ Hwome she ang thüi: “Nange kwom ang tsaosax ang tomkya zangwün kwome thomüi.

¹⁸ Nange ile mok angkya changle: Chemtue kwom tingtakle ikhato nguiüihex, thangmik oja makhange kwom ajopuix, ija ma ija zukhik fünle thomlax. Hünnu hünpa hia hüntüi hünnao hwom tamchu hwom kako homkhabu pangwüi nang hom ma athütle nüilax.

¹⁹ Ija homkha angkya owawa laile jangpao, chix a ma thaikya khoma zilaxüi, ija bama kwom ma tsaitox-kaxfe angkya chitüiüi; ikoxle nang füi tomle hommong ma asukya owawa to maklaxle jangchang, ija bama kwom hünlit changpu.

²⁰ Ile chang koxlechu, nange owawa hama kwom mwot bama wünle koxkya jangtüi, kwom ang nange tsaosax ang atsangle tsaokya tsaosüt kwome münthomüi.”

²¹ She-e ile wüi changüile mongtsu ilaxle hwom pao ang tom. Hwom paole changkya füima, she-e ija zukhik thangmik ma fünle thom.

²² Zyetmixbu a haxhua to donglaxle azwonle ngo. Nyix azom mong ma wanghom süpahibue chamtua-suizang pangnu khato hwom tüichale hule aham, ikoxle hwome chiataktsuak; ikhoma hwom Jeriko tingnu to chat.

²³ Ifüima zyetmix nyi haxhua tokya thai ilaxle shuanu tale Jihusua hato chat. Okhie chempangle changpuix ibu bakle chix hama wünle kox.

²⁴ Okhie thüi: “Jowanpae ija haxtok kem ang bakle koxdaokya atsingsho. Ikhatokya khünaknu pangwüi kem thoto zanle abanle ngole.”