JIHUSUA 18 - OTSAO BAIBEL (BSI)

Ota Tüikya Haxsüt Tom-hanle Changkya

¹ Hwome haxtok bakle lüttsuakkya füima Israel khünak pangwüi Shiloh ma asox ilaxle ikhama Jowanpa ngwotnui Nyihom tuita ajong.

² Ipong kople haxsüt makoptsuakkya Israel homjen anüt tüikya.

³ Idaile Jihusua-e Israel nok füi akax: “Jowanpa hünzom putong hwom Zang-e hünzom ang fadaokya haxtok bakle koptsuak angkya athaxchu chemtukux tan-nyele ngohomüi?

⁴ Ku ang homjen foto mixsün azom pong zünle fahüi. Hwome chemtukux kopse tsupuix, ija haxsüt ziakople hu ang kue ibu chaxwan faole hua ang tsanle apaoüi. Ifüima hwom ku hato chat angkya oli.

⁵ Haxtok a hwom bama othom anüt ang ahanüi; Judah a shuathong chikao hwom haxsüt ma ngoüi, ilaxle Jusep a shuakuxchi chix haxsüt ma ngoüi.

⁶ Ibibile othom anüt ma haxsüt ahankya laiza zalaxle ku hato apüihüi. Ifüima Jowanpa kem Zang ma tik ang kue hünzom hanpak ang chizing tswonüi.

⁷ Ikoxlechu hünzom füi tomtomle Liwi hwome hwom haxsüt münkopüi, chemthüikoxle hwom süntom a Jowanpa thothale ngua mwot mok angkya changle. Ilaxle chu, Gad, Reuben hia Handün Manasseh hwom ang Jordan shuanu zongma handünchi kao haxtok, Jowan dapa Mosa, chix jaoe koxle toxdaoa.”

⁸ Jihusua-e hwom ang ibibile adangle fakya füima khünak ibu hwom chaxwan ziakwon ang apao: “Chaxwan bakle faolax ilaxle ziakwonle koplax, ifüima ku hato chat-hüi. Ilaxle ikha Shiloh ma kue hünzom hanpak ang Jowanpa füi tik-to laxle chizing tswonüi.”

⁹ Idaile khünaknu pangkha towüi aham ilaxle haxsüt anüt ang achangle ahan ang hwom thung laxle tinglongbu akiakle laiza. Ifüima hwom Jihusua hato hwom pom Shiloh to chat.

¹⁰ Jihusua-e hwom hanpak ang Jowanpa füi tik-to laxle chizing tswon; ilaxle haxsüt ma kopkya Israel homjenbu ang ma haxsütsütle ahanle kox.

Benjamin ang Koxkya Haxsüt

¹¹ Pongwang ma Benjamin homjen ang hwom haxsüt tswonle kox. Ija haxsüt a Judah hia Jusep nyi haxsüt zo ma asu.

¹² Shuakuxchi hwom longzi Jordan makhange wangle haxlya-haxlya le dongle Jeriko zongma shuakuxchi haxmik alop ilaxle hannop chito kwonle haxhua to Bethawen sak-hax alop.

¹³ Imakhange asongle jule longzi Luz zongma shuathongchi ma lai (Luz ang Bethel lechuwüi nyak), ikha makhange asongle jule Ataroth Addar to lai. Ijongkha a amachi Beth Horon zongma shuathongchi haxhua ma tüikya.

¹⁴ Ifüima ija longzi mama chitole, ija haxhua hannopchi kao makhange shuathong chikao to le ilaxle Kiriath Bal (Kiriath Jearim) Judah homjen haxsüt to ngui. Ija a hannopchi kao longzi.

¹⁵ Shuathongchi longzi a Kiriath Jearim tua makhange wangle Neftoah shuasa to lai.

¹⁶ Imakhange ija haxnucha to jule Hinnom haxsha atale ngünkya kha Refaim haxsha shuakux-tsim to lai. Ifüima ija Hinnom haxsha akaile shuathong chito Jebu nok haxzi shuathong chikao Enrogel chitole.

¹⁷ Ifüima ija shuakuxchi kao Enshemesh to kwonle Adumin Lomnu füi atale tüikya Geliloth to ngui. Ifüima ija longzi Bohan Longnu hato ju, (Bohan a Reuben sasün changkya.)

¹⁸ Ilaxle longzi zongma shuakuxchi Jordan haxsha to asongle hule le. Ifüima ija haxsha to ju,

¹⁹ Beth Hoglah longzi zongma shuakuxchi male ilaxle Omang Tinu shuakuxchi Jordan shuanu jenle jukya shuapong ma ashuk. Ija a shuathongchi longzi changpu.

²⁰ Jordan a handünchi longzi. Ibibi a Benjamin homjene hwom haxtok ang kopkya haxsüt longzi changpu.

²¹ Benjamin homjen kux tingnubu a: Jeriko, Beth Hoglah, Emek Keziz,

²² Beth Arabah, Zemaraim, Bethel,

²³ Awim, Parah, Ofrah,

²⁴ Kefaramoni, Ofni, üntoxle Geba: tingnu 12, ibu akhople tüikya tinglongbu tüihukya.

²⁵ Ibomachu Gibeon, Ramah, Beroth,

²⁶ Mizpah, Kefirah, Mozah,

²⁷ Rekem, Irpil, Taralah,

²⁸ Zela, Haelef, Jebu (Jerusalem), Gibeah, ilaxle Kiriath Jearim: tingnubu 14, ibu akhople tüikya tinglongbu tüihukya. Ibibi a Benjamin homjene hwom haxsüt ang kopkya haxtok changpu.