JIHUSUA 11 - OTSAO BAIBEL (BSI)

Jabin hia Chix Üithom to Jihusua-e Lüt

¹ Chemtue Israel noke zan pangnusa to anaole hüikya kax Hazar nok wanghompa Jabin na to wang, chixe: Jobab nok wanghompa Madon, Shimron nok hia Akshaf nok wanghombu.

² Ilaxle haxhua nok shuakuxchi wanghombu, Galili Shinthuk-titung zongma shuathongchi Jordan haxsha angkyabu, haxchithong tokyabu, Dor zui angkya Tinu kax achole tüikyabu, ibu pangwüi hato chixe kaxpua apik.

³ Chixe ibibi nok hato chuwüi kaxpua apik: Jordan shuanu pangnyichi ma tüikya Kanan nokbu, Amor nok, Hit nok, Peri nok ilaxle Jebu nok, haxhua to tüikya onok pangwüi hato ilaxle Mizpah haxtok angkya Hebron haxnu chithong ma tüikya Hip nok, ibu pangwüi hato kaxho kox.

⁴ Hwom pangwüi ma süpahibu koplaxle nguile tinu kax angkya fix büta le khünaknu athüt. Hwom ma man hia man-kanlin huanuma tüikya.

⁵ Wanghom ibu pangwüi athütlaxle Israel nok füi azan ang Merom shuajen ma pom zaile athong.

⁶ Jowanpae Jihusua ang thüi: “Ibu thua ojao taxza! Ngainyix ipongma kue ibu pangwüi Israel nok hanpak ang langle tsuakdaoüi. Hünzome hwom manbu ocha afaiüi ilaxle ibue linkya zyenbu zokle ashunüi.”

⁷ Idaile Jihusua hia chix khünakbue Merom shuajen ma hwom to allele single tingtak.

⁸ Jowanpae ibu to Israel noke wüi lüt ang tom; Israel nok hwom to single shuakuxchi Misrefoth Maim hia Sidon alople jao achua, ilaxle handün chito Mizpah haxsha alople jao achua. Zan nok tuita ozün ma chitoxle ma-amüt tanto hwom chizakle azan.

⁹ Jowanpae kaxtom fakya lailaile Jihusua-e hwom to mok: Chixe hwom manbu ocha afai ilaxle ibue linkya zyenbu zokle ashun.

¹⁰ Ilaxle Jihusua anongle chat üntoxle Hazor tingtakle koplaxle ija wanghompa lang. (Ipongma ibu wangting khakha ma zong sütüikya a Hazor wangting changkya.)

¹¹ Hwome ikha angkya pangwüi langle awüt; owachu ozün ma chitox, ilaxle tingnu a zokle ashun.

¹² Jihusua-e ibu tingnu tamchu hwom wanghombu pangwüi koptsuak, hwom pangwüi langle awüt; ile Jowan dapa Mosa-e fakya kaxtom ningle hwome mok.

¹³ Ikoxlechu Jihusua-e zokle ashunkya Hazor tingnu boma, Israel noke haxhua dingma tüikya tingnu tuita chu chizok.

¹⁴ Israel khünaknue ibu tingnubu angkya thalix tuina hia tsom-pombu hwom hanpak ang pangwüi tüi. Ikoxlechu khünak-nak a pangwüi lang; owachu ozün ma chitox.

¹⁵ Jowanpae chix kaxtombu chix dapa Mosa ang kox, Mosa-e Jihusua ang kox ilaxle Jihusua-e ibu kax ma laxle mok. Jowanpae Mosa ang koxkya kaxtom pangwüi chixe mok.

Jihusua-e Laxkya Haxtok Wankam

¹⁶ Jihusua-e haxhua nok, haxchithong nok, shuakux-shuathong pangwüi, Goshen haxsha pangwüi ilaxle shuathongchi angkya haxza nok ilaxlechu Jordan haxsha, ibu haxtok pangwüi kop.

^17-18 Hwom haxsüt longzi shuathongchi Edom zui angkya Halak Haxnu makhange shuakuxchi ma tüikya Lebanon haxsha angkya Balgad alople tüikya. Ibu haxtok angkya wanghombu füi Jihusua okuilole azanle hüilaxle chixe wüi ibu bakle kop ang tho ilaxle pangwüi langle awüt.

¹⁹ Israel nok füi nokmüile hüikya a Hip nok angkya Gibeon tingnu tata wüi. Mamabu a bakle azanlaxle laxkyakya wüi.

²⁰ Jowanpae hwom mong ma Israel nok füi azan angkya mongkho adünle kox. Ija a hwom pangwüi olithule amüt ang tom angkya hanpakma ilaxle pangwüi chingcha chitüile langle awüt angkya hanpakma. Ija a Jowanpae Mosa ang fakya kaxtombu.

²¹ Ipongkhae Jihusua paolaxle tomchong hualo li Anakim nok amüt. Hwom a Hebron, Debir, Anab, ilaxle Judah hia Israel nok haxhua pangnu khato ngokya haxhua nok changkya. Jihusua-e hwom üntoxle ibu tingnu komkaile amüt.

²² Israel haxtok ma Anakim nok mixhuak tuita chitox; ikoxlechu Gaza, Gath hia Ashdod, ibu to hidaopong danle tox.

²³ Jowanpae Mosa ang kaxtom koxkya ningle Jihusua-e ibu haxtok pangwüi laxtsuak. Jihusua-e ibu Israel nok ang mating-matok ang lax ang kox ilaxle hwome homjen-homjen to ma haxtoktokle ahanle lax. Ile khünaknu achax-azanle ngokya zakle ashuk.