JEREMIA 50 - OTSAO BAIBEL (BSI)

Babilon Kopkya

¹ Ija a Babilon tingnu hia ima tüikya khünaknu hanpakma Jowanpae ku ang fakya kaxho changpu:

² “Chaxwannu nok hato kaxho laxkox! Ija khuapukox! Mowan ahokox ilaxle kaxho tsingang tomkox! Ija khom-pyenle taxthom! Babilon a nguakdaoa! She baozang Marduk a thuple amadaoa! Babilon nok chapabu ang zak-akopdaoa; nushixdongkya she chapabu a asumdaoa!

³ “Shuakuxchi tokya jat-li tuita Babilon to sing ang nguingole ilaxle ijae she a zizopakya nuiting ang achangüi. Khünaknu hia müibu a fütle paoüi, ilaxle ikhama owachu münngoüi.”

Israel Nok Chatkya

⁴ Jowanpae thüile: “Chemtue ija hanpak nguile hüipuix, Israel hia Judah angkya khünaknu sopngale, hwom Zang ku lomle nguiüi.

⁵ Hwome Zaion tole angkya lom atüiüi ilaxle ija lom ma küithole leüi. Hwome ku füi othuithui hanpakma tsaotsütle changüi ilaxle ija otuechu chiamaüi.

⁶ “Ku khünaknu a chunnyetmixe haxnu to asamle toxkya chunbu ningle changpu. Chun lailaile hwom tuita haxnu makhange ata haxnu to laile samle aham ngo, ilaxle hwome hwom hom ochichi to tüikya dai, ija alakle asam.

⁷ Hwom füi apongpong pangnusae hwom to sing. Hwome zanpabue thüi: ‘Hwome Jowanpa zongto ochax lyendaoa, idaile keme hwom to chemle hwonpuix ija ma thaikya müntüi. Hwom pupa hwome Jowanpa to mongong thom, iningle hwom chuwüi mongong füi ngokoxle müisepa.’

⁸ “Israel khünaknu, Babilon nok angkya zikle paolax! Ija haxtok dantox dao! Ija dantoxkya khama nang pongwang lükya mix ang changlax!

⁹ Kue shuakuxchi ma tsak-zong füikya jat-libu to lüixüi ilaxle hwom ang Babilon nok to sing ang tomüi. Hwome ija nok füi azan ang zyenthole piaüi ilaxle ija nok to lütüi. Hwome müihap mankyabu changle, ilaxle hwome hapkya sanhap otuechu münthai.

¹⁰ Babilon a tsui paoüi, ilaxle tsuikyabue hwome laxse atsutsu laxüi. Ku, Jowanpae ija akaxdaoa.”

Babilon Nguakkya

¹¹ Jowanpae thüi: “Babilon angkya khünaknu, hünzome ku khünaknu thomjole toxpu. Hünzom a mongmüi-pwonlale ngole, tsaxnakle anguix ngokya maihu tuita ningle chichangba man tuita akhongkya ningle changkoxchu,

¹² chongkya hünzom tingnu a adix-adale changüi ilaxle zakkop ang tomüi. Babilon a jat-libu khama ahixkya ang achangüi; ija a haxkozan tamchu ti chitüikya sak-hax ang changüi.

¹³ Ku mongtsik tüikya khoma Babilon ma owachu münngoüi; ija a pünle amatoxüi, ilaxle imakhange leüi khünak pangnusa wüi abütle khosamüi.

¹⁴ “Sanhap füikyabu süpahibu Babilon zan to ka ang zyenle pyakox ilaxle ija akhople kopkox. Hünzom san pangwüi füi Babilon nok to hapkox, chemthüikoxle ijae ku, Jowanpa zongto ochax lyendaoa.

¹⁵ Tingnu akhople ua-le single akhong kox! Athax Babilon-e chak ajong daoa. Ija pan katuk bakle amadaoa ilaxle atsundaoa. Kue Babilon nok to olüix khomle ngopu. Idaile hünzome hwom to olüix khomkox, ilaxle hwome mix to chemle hwondaopuix ilailaile hwom tochu hwonkox.

¹⁶ Ija haxtok ma tsaxli sai ang chichangba saxziak khai ang taxtom. Ija zansing süpahibu ngünlaxle ikhato ngole tüikya mixnokbu zaüi ilaxle hwom a mahom-hom to chatüi.”

Israel Nok Chatkya

¹⁷ Jowanpae thüi: “Israel khünaknu a, mailangbue achuale asamkya chunbu ningle changpu. Pongwang ma hwom to Asiria chongwangpae singpu, ilaxle Babilon nok wanghompa Nebukadnezar-e hwom za jao shaole akhixpu.

¹⁸ Ija khokho ma, ku, Jowanpa, Israel nok Khüthak Zang-e wanghompa Nebukadnezar hia chix tingnok to sikangün angkya changle, ija a kue Asiria nok chongwangpa to sikangünkya ningle changüi.

¹⁹ Kue Israel khünaknu a hwom chaxwan to chatle ngui ang tomüi. Karmel Haxnu hia Bashan wankam ma münkya puamün hwome saxüi, ilaxle Efraim hia Gilid haxsüt angkya hwome saxse tsukya süt puamün hwome saxüi.

²⁰ Chemtue ija hanpak nguile hüipuix, Israel haxtok ma ochax chemchu münataküi ilaxle Judah haxtok ma chichang-chizangkya chemchu münataküi, chemthüikoxle kue khosünle kopkya khünaknu ang kue thailakkya tüiüi. Ku, Jowanpae ija akaxdaoa.”

Babilon Nok hato Jowanpa Kaxfün

²¹ Jowanpae thüi: “Merathaim hia Pekod angkya khünaknu to singkox. Hwom lang kox ilaxle amütle toxkox. Kue hünzom ang kaxtom koxpupu komkaile mokkox, Ku, Jowanpae ija akaxdaoa.

²² Ija haxtok ma azankya ozing atat ang kople, ilaxle huanuma thomjole changdaoa.

²³ Babilon-e zangfang pangwüi thuple akhixdaoa, ilaxle athax a ija jantu amadaoa! Ija nok to chemle changpuix ija bama chaxwannu nok wüi abütle.

²⁴ Babilon, nang ku füi azanpu, ilaxle nang a kue nang tsünle thomkya ma manpu, ikoxle nange ija chitsing.

²⁵ Kue ku chang-paxbu athünle thomkya kha onui dap daoa, ilaxle ku mongtsiktsik ma kue ibu alaidaoa, chemthüikoxle, ku, Jowanpa Khüthak Zang ang Babilon ma mok angkya mwot tütüile.

²⁶ Ija to pangnuchi makhange singkox ilaxle hwome saxziak shole thomkya saxpung daple dongkox! Saxjun thokle dan pupule tsui kopkya tuinabu dankox! Ija haxtok amale toxkox! Ikhama chemchu taxtox!

²⁷ Hwom süpahibu komle lang kox! Hwome hütle lang kox! Babilon angkya khünakbu a maxdaoa! Hwom to sikangün angkya hanpak nguile hüidaoa!” (

²⁸ Pünpaobu Babilon angkya paole azang ilaxle Jerusalem to ngui, ilaxle ija Zangshwom-Hom to hwome chemle hwondaopuix ija olüix khom ang Jowanpa, kem Zang-e mokkyabu pangwüi hwome wün.)

²⁹ “Sanhap füikya süpahibu ang Babilon to sing angkya akaxkox. Sanhap twon ang mankyabu pangwüi tomle akatkox. Tingnu akhople kopkox ilaxle owachu paole azang ang taxtom. Ijae mokdaokya pangwüi olüix khomkox, ilaxle ijae mix to chemle hwondaopuix ijaningle chix to hwonkox, chemthüikoxle tuita Israel nok Otsaopa, ku zongto ongam füi chixe mokdaoa.

³⁰ Ikhoma chix naosünbu a tingjang lomnu to lang angkya changpu, ilaxle ija nyix chix süpahibu komkaile lang angkya changpu. Ku, Jowanpae ija akaxdaoa.

³¹ “Babilon nok, hünzome a ongame awangle tüile, ikhoma Jowanpa Khüthak Zang, ku a nang zanpa ang changdaoa! Nang to sikangün angkya ku hanpak nguile hüidaoa.

³² Hünzom mongngam jat-li a chikho thuüi ilaxle nguaküi, ilaxle ija azwot ang owaechu münasunüi. Kue hünzom tingnu ma wün langüi, ilaxle hozui-onam to tüikya pangwüi amütüi.”

³³ Jowanpa Khüthak Zang-e thüile: “Israel hia Judah angkya khünaknu to afangle thomle. Hwom kopkya khünakbue hwom to hozui makhange khile hungole ilaxle hwom pao ang mündanüi.

³⁴ Ikoxle tuita hwom khosünle kop angkya mix a tsak-zongle tüile: chix mün a Jowanpa Khüthak Zang changle.

³⁵ Jowanpae thüi: “Babilon nok hato zikmüt-mangkho! Ija angkya khünaknu hato mikmüt, ija ma apünkyabu hato, ima jetüi-hwonlangkya khünakbu hatochu.

³⁶ Ima othai ajepabu hato mikmüt— hwom chemtukuxkya ongatbu changpuix! Ija angkya süpahibu hato mikmüt— hwom chemtukux khomtsi ünpuix!

³⁷ Ija angkya man hia man-kanlinbu hato omüt-osam! Tha koxle apüikya süpahibu hato mikmüt— hwom chemtukux shonaile changpuix! Ija angkya tuinabu amadao; amadao ilaxle tsui paodao.

³⁸ Ija haxtok hato otui-onuak apüikox ilaxle ija angkya shuajenbu azopkox. Babilon a za-adünkya chapabu haxtok changle ijabu füi khünaknu ongatbu ang achangle.

³⁹ “Ikhoma Babilon a bao hia haxshix chasabu ngwotnui ang, ilaxle chitsaokya fao-obue awangüi. Ikhato otuechu khünak münngotoxüi, athax füichimachu münngotoxüi.

⁴⁰ Kue hwom hia hozui-onam tokya tinglongbu amüt pongma Sodom hia Gomorah to chemle changpuix ija Babilon ma chuwüi changüi. Ikhato tamchatle otuechu khünak münngoüi. Ku, Jowanpae ija akaxdaoa.

⁴¹ “Shuakuxchi nok tokya khünaknu nguile ngole, tsailo tokya tsak-zongle tüikya nok a; wanghom wanghombu huanuma azan ang achwonle ngole.

⁴² Hwome ma hapnu hia changlobu koplaxle laile; hwom a mongtsike awang laxle chingcha jao chitüile changle. Hwom zing a shixkya tinu tichap zing ningle tüile, hwom man kho ma ngale changpongma. Hwom a Babilon nok füi azan ang achwonle tüile.

⁴³ Babilon nok wanghompa-e ija kaxho atat, ilaxle chix chak a faile tang. Chix a mongtsik-mongmae kop, ija a shekonu tuitae nao ngün ang kakkya ningle chang.

⁴⁴ “Mailang tuita faonu-lingmong tokya lailaxle Jordan shuanu fole müie fumtsütkya nui to nguikya ningle, ku, Jowanpa nguiüi ilaxle Babilon nok osünto tingnu angkya fütle pao ang tomüi. Ifüima kue zünle kopkya khünake ija haxtok ma apünüi. Ku füi owa afyen ang thoüi? Ku füi apan ang owa mongchongüi? Chem ningle apünkya mixe ku zan to kaüi?

⁴⁵ Ikhoma Babilon tingnu zongto kue mok ang achwonle ngokya tamchu ija ma tüikya khünaknu to mok angkya to apalax. Hwom naosombu ngaxchu linle paoüi, ilaxle pangnusa wüi ija ngünlaxle abütüi.

⁴⁶ Chemtue Babilon nguakpuix, zangfang abakle sile aloxle ozing tüiüi, ilaxle khong to akhong-akhakya zing mixnokbue atatüi.”