JEREMIA 42 - OTSAO BAIBEL (BSI)

Khünaknue Jeremia füi Hwom hanpakma Zangjop hüile Akax

¹ Ifüima süpahi lompabu pangwüi, Kareah sasün Johanan hia Hoshaiah sasün Azariah hokhi chuwüi womle pangnu chifün angkya khünaknu füi ngui

² ilaxle ku füi akaxle thüi: “Kwome nang ang mok-hüi thüikya mwot shong-mok fahüi! Kwom hanpak ang Jowanpa kwom Zang to jople changhüi. Kwom ozün ma toxle tüikya pangwüi hanpakma jople fahüi. Hanpak tuita ma kwom a huanuma tüile ngokya; ikoxle athax a, nange ngün ang kople kwom hidaole wüi dantoxpu.

³ Kwom le angkya lomtang aho angkya hia kwome mok angkya mwotlom apuale fa angkya hanpakma Jowanpa to jople fahüi.”

⁴ Kue lan: “Müihule! Hünzome akaxkya ningle kue kem Jowanpa to zangjople changüi, ilaxle chixe chemle akaxpuix ija kue hünzom hama apuale faüi. Kue hünzom hama chiwünle chemchu pyenle müntox.”

⁵ Ifüima hwome ku ang thüi: “Kwom hanpakma nang makhange fakya Jowanpa kaxtom pangwüi kax ma kwome chilaxle jangtüi, ija bama ngünmix hia zangwün changle thom angkya mix a Jowanpa naxngokox.

⁶ Ijae kwom ang mongzom chiamüikoxlax amüikoxlax, kwom hanpakma ma nang ang owa to jop-hüile kwome atsang ngopuix, ija Jowanpa kwom Zang kax ma kwome lax angkya jao changpu. Kwome chix kax ma laxle tüikoxtix wüi kwom zongto jalinusa müile hüi angkya changpu.”

Jeremia Zangjop to Jowanpa Kaxlan

⁷ Nyixbün füima Jowanpae ku füi zangwün;

⁸ ikhoma kue Johanan, chix füi tomle tüikya süpahi lompa hwom hia mama khünaknu pangwüi sele asox.

⁹ Kue hwom ang thüi: “Jowanpa, Israel nok Zang, owa hato hünzome ku tsaiju-kaxjule chang ang tsanle apaopuix, chixe thüile,

¹⁰ ‘Hünzom ang ija haxtok ngole hüi angkya to mongtsukya jangtüi, kue hünzom zingle ajongüi ilaxle pünle münatsunüi; kue hünzom küi-thwomle changüi ilaxle file münawütüi. Kue hünzom hato ahüikya thama khoma ku ang huanuma mongma ang tomle.

¹¹ Babilon nok wanghompa thua zale ngokya zakdao. Ku Hünzom füi tüile, chix tsak-zong chak tokya hünzom kue sünüi.

¹² Chemthüikoxle ku ma chingcha tüile, ilaxle kue chix ang hünzom to chingchale hu ang tomüi ilaxle chixe hünzom ma chaxwan to chat angkya danüi. Ku, Jowanpae ija kax akaxdaoa.’

^13-15 “Ikoxle khünaknu opang Judah ma toxle tüilaxpuix, hünzome Jowanpa hünzom Zang kax ma chilaxle chitüiüi ilaxle ija haxtok ma münngopule chiangam angkya changpu. ‘Chemtuechu ochax-ozan chiapongle ngokya chichangba ochax-ozan zing chiatatle ngokya chichangba woknuak ma chingo toxkya Ijip chaxwan towüi chatüi’ le hünzome chiakax angkya changpu. Hünzome ile akaxle jangchang thüiningle, Jowanpa, Israel nok Khüthak Zang-e akaxle, ‘Hünzome Ijip nok to kaxle ngo angkya mongzangwünle jangtsuak,

¹⁶ hünzom oja zan thua zale ngopuix ija zane hünzom ha alopüi, hünzome chaza ngokya woknuake hünzom achuale hüiüi, ilaxle hünzom a ikhato Ijip to ziüi.

¹⁷ Khünak opang Ijip to chatle kalaxle ngosele tsulaxpuix, ibu pangwüi ochax-ozan chichangba woknuak-tilan chichangba okak-olak ibu chak to maxüi, Hwom khama tuita chu ozün ma münngoüi, ilaxle kue ahüi angkya thama-thomshix chak tokya owae paole azang ang münthoüi.’

¹⁸ “Jowanpa, Israel nok Zang-e akaxle, ‘Chemle ku mongtsik-mongma Jerusalem angkya khünakbu ding to thokle adütpuix, ija ningle hünzom Ijip nok to kale jangchang thüiningle ku mongtsik-mongma a hünzom khangkho ma adütüi. Mikngün zongma hünzom a za-adünle tüiüi; khünaknu hünzom chanyi-wanjaile changüi ilaxle hünzom mün a othuak-ozom lom to twonüi. Hünzome ija onui otuechu tamchatle ngün ang münkop.’”

¹⁹ Kue chizakle wünle le: “Judah ma danle toxkya khünaknu, hünzom a Ijip nok to chika angkya Jowanpae akaxle. Ilaxle kue athax hünzom ang kaxkhün koxpu,

²⁰ hünzome chimokfang othai mwot mokle ngole. Hünzome ku ma kem Jowanpa to hünzom hanpakma zangjop angkya akaxpu, ilaxle chix kaxtom pangwüi kax ma laxle tüi angkya hünzome tsaosaxpu.

²¹ Ilaxle athax kue hünzom füi akaxdaoa, ikoxle Jowanpa kem Zang-e ku makhange hünzom füi akax angkya kaxho kax ma hünzome ojao chiapa.

²² Idaile hünzome ija mong ma koplax: hünzom a hünzom kalaxle ngokya haxtok to ochax-ozan chichangba woknuak-tilan chichangba okak-olak, ibu chak ma ziüi.”