JEREMIA 41 - OTSAO BAIBEL (BSI)

¹ Ija zanglao lyetnu kua anüt lükya to, Nethaniah sasün tamchu Elishama susün Ishmael, wanghom homkha angkya mixsün tuita ilaxle wanghompa nguakax-wangkhobu khama achongkya tuita, khünak bün koplaxle gowarnor Gedaliah füi apong ang Mizpah to ngui. Hwom pangwüi tomle fongsaxle thungle ngopongma,

² Ishmael hia chix khünak hwom mixsün büne ma changlolo syetle alai ilaxle Gedaliah langle tox.

³ Ishmael-e Mizpah ma Gedaliah füi tomle tüikya Israel nok pangwüi langle awüt, ikhama ngole asukya Babilon nok süpahibu chuwüi ikhama wom.

⁴ Ofüi nyix, owaechu Gedaliah langkya awan ang makopba,

⁵ Shekem, Shiloh hia Samaria tokya khünak mixhuak puli ngui. Hwom a, mongmakya aho ang tunmunbu komkaile ongle, hwom nyizabu akyet, ilaxle ma tsangtsa to alüile mak-kha laxle tüikya. Hwom a Zangshwom-Hom ma tö kox angkya hanpakma saxziak hia ongan müikya sobu koplaxle tüikya.

⁶ Ikhoma Mizpah angkya Ishmael hwom füi apong ang lai, ilaxle chix a sopngale aham. Chemtue chixe hwom ha alople changpuix, chixe thüi: “Chingchajaja laxle ngui üntoxle Gedaliah füi aponglax.”

⁷ Hwom tingnu mong ma nopkya füi tomle, Ishmael hia chix khünakbue hwom lang ilaxle hwom mangbu tüküi khato tswonle awüt.

⁸ Ikoxle othom khama mixsün büne Ishmael ang thüi: “Chingchajaja laxle kwom a taxlangünfa! Kwom ma wonglai tsax, tsaxsa tuita, olip münga, ibomachu nax-tibu haxtokbu to khomle thomle.” Ikhoma chixe hwom lang ang chitom.

⁹ Ishmael-e chixe langkya khünak mangbu tswonle awütkya tswomkha a tuita chongle changkya. Israel nok wanghompa Basha-e chix to single changpongma ija tswomkha a wanghompa Asa-e thole alaikya. Ija tswomkha a Ishmael-e khünak mang füi awang.

¹⁰ Ifüima chixe wanghom sacha hwom hia Mizpa angkya khünaknu pangwüi zanda ang kople pao; ibu a süpahi lompa Nebuzaradan-e Gedaliah fang ma ngo ang danle toxkyabu changkya. Ibu zanda ang koplaxle Ishmael a Amon nok haxsüt chikao makhange chat ang achex.

¹¹ Ile Ishmael-e khünaknu to hwonkya mwot bama Johanan hia chix füi tomle tüikya süpahi lompabu pangnusae atat.

¹² Ikhoma hwom a chix füito achuale zik ilaxle Gibeon angkya tüküi zui ma chix tholüi ang tsuak.

¹³ Ishmael-e zanda ang koplaxle tüikya khünakbue chemtue Johanan hia lompabue azüi laxle süpahibu ngünle laxpuix, hwom ang tüle mongmüi,

¹⁴ ilaxle anongle hwom hato fütle hüi.

¹⁵ Ikoxlechu Ishmael hia chix khünak hwom mixsün achyet a Johanan chak tokya Amon haxtok chito paole azang ang tho.

¹⁶ Ifüima Johanan hia süpahi lompabue, Gedaliah: süpahibu, shekobu, naosombu, ilaxle zwom züile changdaokya khünakbu mik amüt üntoxle Mizpa angkya Ishmael-e zanda ang koplaxle paokya khünaknu to humele chang.

^17-18 Ija haxtok ma Babilon nok wanghompa-e gowarnor ang achangle toxkya khünak Gedaliah mik amütkop laxle hwom a Babilon nok thua zale ngo. Ikhoma Babilon nok thoto hwom Ijip nok to pao ang lai. Lomba to hwom Bethlehem zui ma Kimham ma nazak.