JEREMIA 39 - OTSAO BAIBEL (BSI)

Jerusalem Nguakkya

¹ Judah ma wanghompa ang Zedekiah ngokya zanglao aku lyetbün lükya to, Babilon nok wanghompa Nebukadnezar chix süpahibu komkaile koplaxle nguile Jerusalem to sing.

² Zedekiah wanghom ang ngokya zanglao bün-büta lyetjang ali ma nyix aku lükya to tingnu pan a komkaile atsunle hüi. (

³ Chemtue Jerusalem hwople koppuix, Babilon nok angkya wanghompa nguakax-wangkhobu achongchong pangwüi ngui ilaxle Osungkha angkya Zünkai ziakop, ikhama Nergal Sharezar, Samgar Nebo, Sarsekim, hia mama Nergal Sharezar ibu womle.)

⁴ Chemtue wanghompa Zedekiah hia chix süpahibue chempangle changpuix ija ngünkya zuma, hwom ang zangnak ma tingnu angkya paole azang ang azong. Hwom a wanghom hwom tsawatkha makhange laile pao, ilaxle katuk anyix apongkya fülom makhange lai, ilaxle Jordan Haxsha chito paole azang.

⁵ Ikoxlechu Babilon nok süpahibue hwom achuale zik ilaxle Jeriko zui angkya haxsha ma Zedekiah kop. Hwome chix a wanghompa Nebukadnezar hato apüi. Ipongma wanghompa a Hamath haxsüt to Riblah tingnu ma ngole tüikya, ilaxle ikhato Nebukadnezar-e chix hanpakma kaxsüt toxle akax.

⁶ Riblah ma chixe Zedekiah mikngün ma chix sasün lang, ilaxle Judah nok pünlix-wangchongbu chuwüi chixe langle awüt.

⁷ Ifüima,

⁸ Ile changpongma, Babilon noke wanghom homlo hia khünaknu hom-haxbu zokle ashun ilaxle Jerusalem katuk thuple atsun.

⁹ Oshukma Nebuzaradan, süpahi lompa-e, tingnu ma dantoxkya khünakbu Babilon nok to zanda ang laxlaxle pao, ikhato chix hato tok aho laxle paokya thom chuwüi tüikya.

¹⁰ Chixe Judah haxtok ma tuimix-nuakmix züizüi danle tox. Hwom ang haxtok homting chemchu chitüi ikhoma chixe hwom ang grep haxtok hia mama manzai haxtokbu koxle tox.

Jeremia Dankya

¹¹ Ikoxlechu wanghompa Nebukadnezar-e chix süpahi lompa Nebuzaradan ang ibubu kax kox angkya kaxtom kox:

¹² “Paokox ilaxle Jeremia lomle atak-hüi ilaxle chix to müile humele changhüi. Chix to chakmok-janlangle taxchang, ikoxle chix hanpakma chix mongtsukyakya mokle laxkox.”

¹³ Ikhoma Nebuzaradan, chix bomachu alixachong Nebuzaradan, Nergal Sharezar hia Babilon nok wanghompa nguakax-wangkhobu pangwüi,

¹⁴ hwome ku wanghom khualo to apüi. Hwome ku to hume angkya hanpakma Ahikam sasün tamchu Shafan susün Gedaliah dan. Ku hom to haxmüi-zangmale nguilaxma hexle ku to hu angkya a chix changkya.

Ebedmelek hanpakma Monghom Tuita

¹⁵ Ku wanghom khualo ma kun ma shole tüipongma Jowanpae ku füi akaxle

¹⁶ Etheopia nok Ebedmelek hama Jowanpa, Israel nok Khüthak Zang-e kax apuale kox angle thüi: “Chemle chemle moküile akax daolaxpuix, kue ija tingnu hato okop-olwot münchang ikoxle thomshix thama apüi angkya changle. Ibu chemtue changle ngaiüihex, ibu ngün ang nang a ikhato ngole asuüi.

¹⁷ Ikoxlechu Jowanpae nang kho-awale changüi, ilaxle nang a nang zale ngokya khünakbu chak to münkoxüi.

¹⁸ Kue nang ozün ma panle thomüi, ilaxle nang mik amüt ang müntom. Nange ku to mongong thomle changkya khoma nang a zi-max ang müntom. Ku, Jowanpae ija akaxdaoa.”