JEREMIA 37 - OTSAO BAIBEL (BSI)

Zedekiah-e Jeremia ma Tsaiju-kaxjukya

¹ Jehoiakin sasün Jehoiakim man ma Babilon nok wanghompa Nebukadnezar-e Judah ma wanghom ang Josiah sasün Zedekiah zing.

² Ikoxle Zedekiah hia nguakax-wangkhobu opupuechu chichangba khünaknu owaechu Jowanpa tokhange hüikya kaxho kax ma chilax.

³ Kwom chaxwan hanpakma Jowanpa to jop-tole chang angkya wanghompa Zedekiah-e Shelemiah sasün Jehukal hia Maseiah sasün nguapa Zefaniah hokhi ku hato ahüi.

⁴ Ipongma ku a kun khato mashokya ilaxle khünak khato ku a mongtex ma aham ang tsuakle tüikya.

⁵ Babilon nok süpahibue Jerusalem hwople kop ngokya, ikoxle hwome chemtue Ijip nok süpahibue Ijip longzi kaile hüingokya zing atatle laxpuix, hwom anongle chat.

⁶ Ipongma Jowanpa, Israel nok Zang-e ku füi,

⁷ Zedekiah füi akax angkya ile akax: “Ijip nok süpahibu a nang to fong ang nguile ngole, ikoxle ija a hom to chat angkya changle.

⁸ Ifüima Babilon nok chatle nguiüi, tingnu to single tingtaküi, ija hwople kopüi ilaxle ija zokle ashun toxüi.

⁹ Jowanpae kue kaxkhün koxle akax ngopu, Babilon nok chatle münchatpule thütkya füi hünzome ma alüile dyenla laxma, chemthüikoxle hwom a tamchatle nguiüi jaojao.

¹⁰ Hünzome Babilon nok süpahi pangwüi to anao ilaxle maklaxdao pupu hwom nyihombu ma opao chitsuakle danle tox, ile changkox-ngaxchu ibu laoxle zo ilaxle ija tingnu zokle ashuntox angkya changle.”

Jeremia Kop ilaxle Kun to Sho

¹¹ Ijip nok süpahibu thule hüingokya khoma Jerusalem angkya Babilon nok süpahibu anongle chat.

¹² Benjamin haxsüt to nguilaxle kwom homkha haxtok hia mama tuinabu ku tsyentsyen kop angkya hanpakmale ku Jerusalem dantoxlaxle pao ang lai.

¹³ Ikoxle chemtue kue Benjamin Zünkai alople changpuix, ikhama süpahi lompa ang ngokya alixachong, Shelemiah sasün, Hananiah susüne ku azak ilaxle thüi: “Nange ija Babilon nok hato tok ahokya changpu!”

¹⁴ Kue lan: “Ija ile münchang! Kue hwom hato tok ahokya münchang.” Ikoxle Irijah-e ku kax to ojao chiapa, chixe ku kop ilaxle nguakax-wangkhobu hato apüi.

¹⁵ Hwom ang ku füi huanuma mongtsik ilaxle ku to fit üntoxle Jonathan hom ma shole thom. Chix a khwa ma chakzamix tamchu chix hom a kun ang laxle tüikya.

¹⁶ Ku a haxmong zudakkya khato shole thom ilaxle ikhato ku okuilole ngole hom.

¹⁷ Ofüima wanghompa Zedekiah-e ku apüi ang apao, ilaxle wanghom homlo ma chixe huxsa ma ku ma atüi: “Jowanpa tokhange kaxho tütali tüichami?” Kue lan: “Tüile! Nang a Babilon nok wanghompa chak to kox angkya changle.”

¹⁸ Ipongma kue atüi: “Nange ku kun to shole thom angkya, kue nang bama chichangba nguakax-wangkho hwom bama chichangba khünaknu bama thaikya oli kue chem mokdaopu?

¹⁹ Nang to tamchu ija haxtok to Babilon noke single münchangpule nang hama ajekya nang ajepabu to chemthüi?

²⁰ Ikoxle athax, wanghompa, nange pi ku kax to natha hüi ilaxle ku kax ma laxle mok-hüi. Ku a Jonathan hom to tamchatle kun khato taxshoünfa. Nange ku jangsho, tütakoxlechu ku ikhato zi angkya changle.”

²¹ Ikhoma wanghompa Zedekiah-e ku a wanghom homlo angkya khwa ma shole thom angkya kax kox. Ku ikhato ngo, ilaxle nyixfokya to an zingnui tokya an khaopong ku ang koxle hüi ilaxle oshuk ma tingnu angkya an jaojao bakle shu.