JEREMIA 34 - OTSAO BAIBEL (BSI)

Zedekiah Hanpakma Kaxho tuita

¹ Babilon nok wanghompa Nebukadnezar hia chix süpahibue, chaxwannu nok opang chix fang ma tingnu-noksa ang changle ngopuix, ibu nok angkya süpahibue namfong laxle, Jerusalem hia ija akhople tüikya tinglongbu to tingtakle changpongma Jowanpae ku füi akax.

² Jowanpa, Israel nok Zang-e Judah angkya Zedekiah hato nguilaxle ija kax akax angkya ku füi akaxle thüi: “Ku, Jowanpae ija tingnu a Babilon nok wanghompa chak to koxüi, ilaxle chixe ija zokle ashunüi.

³ Nang a paole azang ang münkop; nang a kopüi ilaxle chix chak to koxle apaoüi. Nange chix a thün-khang asaole ngün ang kopüi ilaxle nange chix füi ahuakle zangwün ang kopüi; ifüima nang a Babilon nok to paoüi.

⁴ Zedekiah, kue nang bama chemle akaxpuix ija to nathale apalax. Nang a zanhok ma münlang.

⁵ Nang a mongsom ma ziüi, ilaxle nang thoma wanghom ang ngole hüikya hünpu hünpa hwom mangbu akhünle changpongma khünaknue ongan müikya sobu zokle changkya ningle nang hanpakma chuwüi hwome ongan müikya sobu zokle changüi. Hwome nang mang sople changüi ilaxle thüiüi, ‘Kem wanghompa a zidaoa!’ Ku, Jowanpae ija kax akaxdaoa.”

⁶ Ifüima Babilon nok wanghompa-e Jerusalem tingtakle ngopongma

⁷ ija tingnu ma ngole tüikya wanghompa Zedekiah hato kue ija kaxho kox. Süpahibue, Judah haxtok ma ziakop laxle tüikya tingnu anyi Lakish hia Azekah nyi to ngaxchu single hüi.

Dahaibu Chisumüile Dyenkya

⁸ Israel nok khama dahai ang thomkya mix chitüi angkya hanpakma, Ibri dahaibu, sheko hia lüka pangwüi

⁹ wanghompa Zedekiah hia Jerusalem angkya khünak noknusae tsaifün-kaxwünle tsuak.

¹⁰ Khünak pangnusae tamchu lompabu noke wüi hwom dahaibu dan angkya ilaxle ibu tamchatle dahai ang chilax angkya zangwün fünle tsuak. Hwome ibu danle apao,

¹¹ ikoxlechu ofüima hwome mong alop, ibu tamchatle apüi, ilaxle tamchatle hwom dahai ang achang angkya atsang.

¹² Ipong Jowanpa,

¹³ Israel nok Zang-e, khünaknu hama wün angkya kax ile akax: “Kue hünpu hünpa hwom Ijip nok chak to dahai ang ngokya danle khangkho angai pongma tsaotsüt tuita zing. Kue hwom füi

¹⁴ Ibri khünak zanglao azok nguile ma thothale da ang jangthomdao thüiningle zanglao anüt lükya to ija danle apao angkya wüi changpule kue hwom füi akaxdaoa. Ikoxle hünpu hünpa hwome kuchi to najao chitha chichangba ku kax to ojao chiapa.

¹⁵ Münyix shongnyix tix hünzom ang künlop-monglüi ilaxle ku zongto müikya mwot mokpu. Hünzom pangwüie ma Ibri khünak da ang thomkyabu danle apao angkya ku füi zangwün tsuakpu, ilaxle hünzome ku mikngün ma, ku to shwomle ngokya Zangshwom-Hom ma tsaotsütle changpu.

¹⁶ Ikoxlechu janpüi ma hünzom ang mong alop ilaxle ku adix-adale changpu. Hwome mongtsukya ningle hünzom pangnusae wüi ma dabu danle apaopu, ilaxle hünzome hwom da ang tamchatle achang.

¹⁷ Ikhoma athax, Jowanpa, kue akaxle ngopu, hünzome ku kax ma chilaxle changdaoa; hünzome Israel khünak noknusa ang mongtex ma ngo ang pan-danle münchang. Müihule, athax kue hünzom a mongtex pankya faüi: zanhok ma, okak-olak ma tamchu woknuak-tilan ma hünzom a mongtextex ma mik max ang tomüi. Kue hünzom to chemle mokpuix ija ngünlaxle chaxwannu nok pangwüi abütle chang ang tomüi.

^18-19 Judah hia Jerusalem angkya alixachongbu, wanghom homlo angkya okax-okhobu, zompu-zangpabu, ilaxle lompa hwom pangnu, ibu füi tomle, maihupong anyi langlaxle anyi ang achangle asexle thomkya anyi oba makhange le le ku füi tsaosax. Ikoxle hwome ija tsaosüt ama ilaxle ija wanlom chithom. Ikhoma hwome maihupong to chemle hwonpuix ija lailaile kue hwom to hwon angkya changle.

²⁰ Hwom lang ang tungle ngokya zanpabu chak to kue hwom koxüi, ilaxle hwom mangbu a osa hia faomüibue sax ang tomüi.

²¹ Wanghompa Zedekiah hia chix nguakax-wangkhobu, kue hwom langsele atum ngokya zanpabu chak to koxüi. Kue hwom a, nang zan to kale ngokya zakkya Babilon nok süpahibu chak to koxle apaoüi.

²² Kue hwom ang kaxkoxle changüi ilaxle hwom a ija tingnu hato chatüi. Hwome ija to singüi, ija hwople kopüi, ilaxle ija zokle ashunüi. Kue Judah angkya tingnubu a owachu chingokya sak-hax ang achangüi. Ku, Jowanpae ija akaxdaoa.”