JEREMIA 30 - OTSAO BAIBEL (BSI)

Chix Khünaknu hanpakma Jowanpa Kaxtsao

¹ Jowanpa, Israel nok Zang-e

² ku füi akax: “Kue nang füi akaxkya oli pangwüi lai ma zale thomlax,

³ chemthüikoxle kue ku khünaknu, Judah hia Israel, chatle shomüi-wanmale ngo ang tom angkya hanpak nguile hüile. Kue hwom a hwom pupa hwom ang koxle tüikya haxtok to chatle apüiüi, ilaxle hwome tamchatle ija ma nokpu ang achangle ngo ang kopüi. Ija kax, Jowanpa, kue akaxdaoa.”

⁴ Judah hia Israel khünaknu füi Jowanpae akax,

⁵ “Kue tuita chax-hi-zan khong zing atat, mongsom bama chichangle khomtsikya khong zing a.

⁶ Athax zaklax ilaxle ajanglax! Lüka tuitae naosa pux ang tho ang chami? Jangchangba lükabue wok ma twontwonle mixnu tuita nao ngün ang thangpupule kue chem ngün? Pangwüi büthüikoxle thün huishole chang?

⁷ Nu zao hanpak tuita hüile ngole; ija nyix füi mama nyix chemningkya chu apyen ang münmüi— ku khünaknu hanpakma künmax-mongshan hanpak tuita, ikoxlechu hwom a münzi-münmax.”

⁸ Jowanpa Khüthak Zang-e thüi: “Chemtue ija nyix nguile hüipuix, hünzom dingkux ma tüikya danglang hia ima tüikya janbüibu kue daüi, ilaxle hwom a chemtuechu mixnok dahaibu ang achangle münngoüi.

⁹ Itülüi, hwome Jowanpa hwom Zang tamchu Dawid sixli owa kue chongwang tüntong ma athungüihex, hwom ija Zang thothale changüi.

¹⁰ “Ku khünaknu, hünzom taxza; Israel khünaknu, hünzom abütkya taxtüi. Ija tsailo nok tokya hünzom kue sünüi, athax hünzom zanda ang ngole tüikya nok tokya a. Hünzom a ma hom to chatüi ilaxle mongsom ma ngoüi; hünzom to chem münthüi: ilaxle owaechu hünzom aza-anale chang ang müntom.

¹¹ Ku hünzom hato nguiüi ilaxle hünzom azünüi. Jat-libu pangwüi kue max ang tomüi athax hünzom kue chiakle thomkya onokbu a, ikoxlechu kue hünzom münamüt. Kue hünzom to sikngün chifa homtoxle münalyet; ikoxle kue hünzom to sikangün koxlechu chisumüile münchang. Ku, Jowanpae ija akaxdaoa.”

¹² Jowanpae chix khünaknu ang thüi: “Hünzom makthün a chimüihom fang, hünzom to maklaxkya a müi angkya oli münchang.

¹³ Hünzom to humele chang angkya mix owachu müntüi, hünzom mak amüi angkya oli münchang, hünzom hanpakma kakmüi angkya monghom müntüi.

¹⁴ Hünzom mongkünbue hünzom alakle awütdaoa; hwome hünzom hanpakma athax humele müntüi münchang. Kue hünzom to zan to singkya ningle singpu 2 hünzom zothup tsakle wüi changkya chemthüikoxle hünzom ochaxbu a huanu chang koxle ilaxle hünzom chichang-chizangkya a chongle chang koxle.

¹⁵ Hünzom thomzün-maklax bama kaxthup-ngaotün taxtüi ngo; hünzom hanpakma müi angkya olom müntüi. Kue hünzom to zo ile thuppu chemthüikoxle hünzom ochaxbu a huanu changle ilaxle hünzom chichang-chizangkya a chongle tüile.

¹⁶ Ikoxle athax, hünzom jokle lingkyabu pangwüi jokle lingüi, ilaxle hünzom zanpabu pangwüi zanda ang koplaxle paoüi. Hünzom to afangle thomdaokyabu to afangle thomüi, ilaxle hünzom tsui changkyabu to tsui changüi.

¹⁷ Kue hünzom tamchatle müi ang tomüi; ‘Zaion a pünpao tuita changle, she to hume ang owa müntüi,’ le hünzom zanpabue thüikoxchu, kue hünzom mak amüiüi, Ku, Jowanpae ija akaxdaoa.”

¹⁸ Jowanpae thüi: “Kue ku khünaknu hwom chaxwan to chat ang tomüi ilaxle hwom homkha pangwüi to kue chingchaüi; Jerusalem a azünle zingüi, ilaxle ija chongwang homlobu chatle kopüi.

¹⁹ Ikhama ngokya khünakbue achuakle tsai ngaoüi; hwom a mongmüile akhongüi. Ku chingcha makhange hwom mixhuak tsale hüiüi; ku mohimane hwom chuak-chongle changüi.

²⁰ Kaitokya hwom jat-li tsak-zong kue achatle koxüi ilaxle ija shingmongle zing ang tomüi; hwom to zothuple changkyabu to kue sikangünüi.

^21-22 Hwom thak ma apün ang hwomkha angkya wüi ngaiüi, hwom wanghom ang hwomkha angkya ngaiüi. Kue sepongma chix ku hato hüiüi, chemthüikoxle chinyakkya mix ku hato owa mongchongle hüiüi? Hwom a ku khünaknu ang changüi, ilaxle ku a hwom Zang ang changüi. Ku, Jowanpae ija akaxdaoa.”

^23-24 Jowanpa mongtsik a zangchei changle, chichangchizangle tüikya khünakbu khang ma thuple hüi angkya zangchei a. Chixe moküihex-ole azyadaokya mwot matsuak tanto ija münashuktox. Athax füichi ma chix khünaknue ija tsaothale tsing-wanle laxüi.