JEREMIA 27 - OTSAO BAIBEL (BSI)

Jeremia-e Maihupongpa Dang Alik

¹ Judah ma Josiah sasün Zedekiah wanghom ang achangkya füima lebama wüi Jowanpae

² zu ang müikhwon zu ilaxle pün danglang asakle dangzem zinglaxle ija ku dingkux ma alik angkya ku füi akax.

³ Ifüima Jowanpae Edom, Moab, Amon, Tair ilaxle Sidon, ibu nok wanghombu hato, hwom chaxwan tokya alixachongbu wanghompa Zedekiah to hu ang Jerusalem to nguikya khünakbu makhange kaxho tuita apao angkya ku füi akax.

⁴ Jowanpa, Israel nok Zang-e, ija chix zangwünbu hwome ma wanghom hwom hato apüi angkya hwom ang kaxtom kox angkya bama ku füi akax:

⁵ “Chaxwannu, khünaknüsa, ilaxle chaxwantok ma ngole tüikya zünmok pangwüi kue kutsak kuzong chongkya füi zingle alaipu; ilaxle ija kue owa ang koxse tsupuix ija ang koxpu.

⁶ Ibibi chaxwan zangfang a Babilon nok wanghompa Nebukadnezar, ku dapa fang ma ngo angkya tomkya mix a ku changpu; kue faomüibu ang ngaxchu chix thothale chang ang tompu.

⁷ Zangfang pangnu noke wüi chix thothale changüi, ilaxle hwom thai angkya tunu mangui-manguile thothale ibu jatlibue hwom thothale ngoüi. Ifüima chix wangtinge chix thak to tsak-zongle tüikya wangting angkya wanghombu thothale changüi.

⁸ “Ikoxle owawa jat-li hia wangting tuitae chix ang apün ang chitomle jangchang, kue ija onok to ochax-oza, woknuak-tilan ibu füi, Nebukadnezar chak to hwom komkaile maxle machang machangle sikangünüi.

⁹ Hünzom ajebu chichangba owawae wünmang makhange chichangba lwompu chasabu nyakle apüilaxle chichangba chajik-muashem mwot makhange jekax akax ang thole le wünlaxpuix, khünak ibu kax to taxapa. Hwom pangwüie hünzom ang Babilon nok wanghom chak to koxle chichang angkya akaxle.

¹⁰ Hwome hünzom dyenle ngole ilaxle hünzom a hünzom haxtok füi atsaile tsailo nok to kople pao ang tom angkya changle. Kue hünzom jwonle apaoüi ilaxle hünzom a amütüi.

¹¹ Ikoxle owawa jat-lie Babilon nok wanghompa chak to koxlaxle chix thothale jangtüi, kue ija jat-li a ma ngole tüikya haxtok ma wüi thomo-manzaile ngo ang tomüi. Ija kax Jowanpa, kue akaxdaoa.”

¹² Ija kaxkax wüi kue Judah nok wanghompa Zedekiah füichu akaxpu: “Babilon wanghompa chak to koxlax. Chix tamchu chix khünaknu thothale changlax, ikoxtix nang ozün ma ngoüi.

¹³ Nang khünaknu chemkhoma ochax-ozan, woknuak-tilan chichangba okak-olak chak to max angkya? Ija kax Jowanpae, Babilon wanghompa chak to chikox tsuakkyabu omüt hanpak akax wüi.

¹⁴ Chix chak to chikox kox wüi müi angkya changpule akaxkya ajebu kax to hünzome nathale taxchang. Hwome hünzom dyenle ngopu.

¹⁵ Ibu a chixe ahüikya münchang ilaxle ibue chix mün ma atsele zangwünkya changpule Jowanpa chix jaoe akaxle. Ikhoma chixe hünzom jwonle apaoüi, ilaxle hünzom lang ang tomüi, hünzom füi tomle hünzom hama kaxthai zangwün apüile ngokya ajebu chuwüi langüi.”

¹⁶ Ifüima kue khünaknu hia nguapabu hama Jowanpae akaxkya kax apua: “Babilon tokya Zangshwom-Hom tuinabu chwonchwonle wüi chatle apüi angkya changle le akaxkya ajebu kax to taxapa. Hwome hünzom hama othai zangwünle ngopu.

¹⁷ Hwom kax to taxapakop! Babilon nok wanghompa chak to koxlax ilaxle hünzom ozün ma ngolax! Ija tingnu chemkhoma pünle ama toxkyabu nui-ting ang chang angkya?

¹⁸ Khünak ibu a ku ajebu tsingtsing jangchang tamchu hwom ma ku kaxho tüile jangchang, Zangshwom-Hom angkya tuina hia wanghom homlo angkya thanu-juapabu Babilon nok to chipaole onui ma wüi ngo ang tom angkya bama hwome ku füi zangwün ang laxkox.” (

^19-20 Chemtue wanghompa Nebukadnezar-e Judah nok wanghom Jehoiakim sasün Jehoiakin, Judah hia Jerusalem angkya okax-okhobu Babilon nok to paopuix, ipongma chixe thongkho, wi tibom, man-kanlinbu, ilaxle Zangshwom-Hom tuina hidaole danle tox.)

²¹ “Zangshwom-Hom hia wanghom homlo angkya tuina chempang danle toxlaxpuix, ibu bama Jowanpa, Israel nok Khüthak Zang, kue akaxkya kax to apalax:

²² Ibu a Babilon nok to paoüi ilaxle ku mong hwomchi to koxle machangba ibu ikhato wüi ngoüi. Ifüima kue ibu chatle apüiüi ilaxle ija onui ma anaole danüi. Ija kax Jowanpa, kue akaxdaoa.”