JEREMIA 21 - OTSAO BAIBEL (BSI)

Jerusalem to Lüt angkya Aje

¹ Malkiah sasün Pashhur hia Maseiah sasün nguapa Zefaniah hokhi ija tsaiju-kaxjukya füi Judah nok wanghompa Zedekiah-e ku hato akat:

² “Chingchalaxle kwom hanpakma Jowanpa füi zangwün, chemthüikoxle Babilon nok wanghompa Nebukadnezar hia chix süpahibue tingnu hwople kop ngole. Kwom hanpakmale Jowanpae chix ohünotün mwot lituta naxmok ilaxle Nebukadnezar anongle chat ang naxtom.”

³ Ipongma Jowanpae ku füi akax, ilaxle kue ibu zangwün ku hato nguikya khünakbu hama wün

⁴ ilaxle Jowanpa, Israel nok Zang-e akaxkya ija kax Zedekiah hama wün angkya tom: “Zedekiah, Babilon nok wanghompa hia chix süpahibu füi azan ngokya nang süpahibu to kue ang tomüi. Nang süpahibu chang-pax pangwüi kue tingnu osungwa ma athünle dan ang tomüi.

⁵ Ku zongbakle nang füi azanüi, mongtsiktsik ma tamchu tüle shix-makya füi a.

⁶ Ija tingnu ma ngokya pangwüi kue langüi; khünaknu hia müi tomwüile za-adünkya kak-lak ma zi ang tomüi.

⁷ Ikoxlechu nang tomta hanpakma, nang nguakax-wangkho hwom hanpakma, ilaxlechu zan ma, otui-onuak ma, tamchu kaklak ma chimaxle tüikya khünaknu hanpakma: kue hünzom pangwüi, hünzom mik amüt-sele tsukya wanghompa Nebukadnezar hia hünzom zanpabu ang kop ang tomüi. Chixe hünzom tuita ngaxchu shanle müntox chichangba hünzom owawa hatochu chixe chingcha-jajakya müntüiüi. Ija kax Jowanpa, kue akaxdaoa.”

⁸ Ifüima Jowanpae ku ang khünaknu füi akax angkya ija kax kox: “Apakoplax! Ku, Jowanpae hünzom ang khüzün lom to zunkya lomtang hia zikmüt-mangkho to zunkya lomtang nyi tütapu zünle kop ang danpu.

⁹ Tingnu ma angongo pangwüi zan ma chichangba woknuak ma chichangba kaklak ma zi ang tomüi. Ikoxle ikha angkya laile paolaxle, tingnu to single ngokya Babilon nok tuntho to chak ajongle changkyabu, hwom a lang ang müntom; hwom a ma khangkho azangle pao ang danüi.

¹⁰ Kue ija tingnu danle müntox ikoxle amüt angkya ku mongzangwünle tsuakdaoa. Ija a Babilon nok wanghompa chak to koxdaoüi, ilaxle chixe haxbu ang achangle zokle ashun toxüi. Ija kax Jowanpa, kue akaxdaoa.”

Judah Nok Chongwang Homkha hato Kaxfün

^11-12 Dawid su-sa hwom, Judah angkya wanghom homkha hato ija kaxho fa angkya Jowanpae ku füi akax: “Jowanpa, kue akax ngokya kax to apalax. Nyixfokya to sukya tsaifün-kaxwüi tüile-ole thüilax. Mixdyen mixbue dyenlale thomkya khünakbu khose koplax. Nange ile chimok thüikoxle, nange mokle ngokya ochaxe ku ang wünchua tuita ningle mongtsik alaiüi ilaxle ija owaechu amüt ang chithoüi.

¹³ Nang, Jerusalem, haxsha ma longnu kho lwotle laikya ningle, haxtsua-zangthale thung-ngotüi. Ikoxlechu ku nang füi azanpu. Nang to owaechu münsingtsuak chichangba pan daple dong ang münthole nange thüitüi.

¹⁴ Nange chem mokdaopuix ija khoma kue nang to sikangünüi. Kue nang wanghom homlo ma münlangüi, ilaxle ija hozui ma tüikya jali pangwüi ija wün füi zokle ashunüi. Ija kax, Jowanpa kue akaxdaoa.”