JEREMIA 20 - OTSAO BAIBEL (BSI)

Jeremia-e Nguapa Pashhur füi Alakya

¹ Immar sasün nguapa Pushhur, owa Zangshwom-Hom ma okax-okho ang ngole tüikya mix hex, chixe kue ibu apukkya zing atatle changkya zuma,

² chixe ku to chakmok ilaxle Zangshwom-Hom ma thakchi Benjamin Zünkai ma janbüi füi khale thom.

³ Ofüinop, Pushhur-e ku khale thomkya dan füima, kue chix ang thüi: “Nang ang Pushhur le mün Jowanpae fakya münchang. Chixe nang ang fakya mün a ‘Pangnu khato Tuwuk’, le changpu.

⁴ Jowanpa chixjao-e ku ang akaxdaoa, ‘Nang a, nang hanpakma ilaxle zuikhuibu hanpakma tuita tuwuk ang achangüi, ilaxle nange hwom pangwüi zan nok changlobu chak fang ma lamkya ngünüi. Judah angkya khünaknu kue Babilon wanghom chak to kox angkya changpu; chixe züizüi a chix chaxwan to zanda ang koplaxle paoüi ilaxle mamabu a langle toxüi.

⁵ Kue ija tingnu ang tuina zan-nokbue tsui pao ang tomüi ilaxle ima atüitüi pangwüi, Judah nok wanghompa tuina ngaxchu wüi bakle Babilon nok to pao ang tomüi.

⁶ Ikoxle nang hanpakma, Pushhur, nang üntoxle nang homkha khünak pangwüi kopüi ilaxle Babilon nok to paoüi. Nang ikhato ziüi ilaxle ikhato akhünüi, nang kaxthai zangwün füi dyenlale thomkya nang zuikhuibu chu pangwüi nang füi womle tüiüi.’”

Jeremia-e Jowanpa hato Kaxthup-Ngaotün

⁷ Jowanpa, nange ku dyendaoa, ilaxle ku a dyendaoa. Nang aku füi sütsak-süzongpu ilaxle nange ku towüi lütdaoa. Noknusae ku chanyi-wanjai; nyixtungtale hwome ku chanyi.

⁸ Chemtue kue zangwünle changpuix, ku sop ilaxle akhong: “Changnong-pünthom! Thama-thomshix!” Jowanpa, othuithuima ku ajao-ada ilaxle aza-ana, kue nang kaxho khuapukya khokho ma.

⁹ Ikoxle chemtue kue “Kue Jowanpa alaküi ilaxle chix mün ma tam-münakaxüi”, le thüipuix, ipongma nang kaxho a wün lailaile ku mongkha to zule chuak. Kue ija ku mongkha to kople thom ang tsuakkya pongle azong, ikoxle kue kople thom ang chitho.

¹⁰ Pangnusae huxsa ma wünkya kue atat, “Thomshix thama a pangkhato tüile! Idaile chix bama pünpa-chongwangbu hato kax koxhax!” Ku zuikhui shemkhaxbu ngaxchu ku dütüi to hule nui. Hwome thüi: “Chix a dyen ang tsuaküi, ifüima keme chix koplaxle olüix khom ang thoüi.”

¹¹ Ikoxle Jowanpa, nang a huanu tsak-zong füi kuchima tüile ngo, ilaxle ku to zothuple ngokyabu a dütüi. Hwome othuithui hanpak ang zakkople changüi, chemthüikoxle hwome chianao tho. Hwom zakkop a tam alak angkya münchang.

¹² Ikoxle, Jowanpa Khüthak Zang, nange khünaknu to zukya lom ma thwontsingpu; hwom kün-hi-mongkha ma chem tüipuix nang tikle ngopu. Ikhoma nange ku zanpabu to olüix khomle changkya kue ngün ang tomhüi, chemthüikoxle ku künduk mongthang kue nang chak to koxdaoa.

¹³ Jowanpa hanpakma tsai ngaokox! Jowanpa achuak kox! Ochax khünakbu chak tokya hwom afangle thomkyabu chixe sünle.

¹⁴ Ku puxkya nyix to thuakzompu! Anue ku puxle alaikya nyix alakdao!

¹⁵ “Ija a lüka naosa changle! Nang ang sasün tüidaole!” le kaxho fa üntoxle ku apa ang mong amüikya khünak thuakzom ang naxchang!

¹⁶ Chix a ibu tingnubu ningle naxchang chingchacha chitüile Jowanpae amütdaokya tingnubu ningle a. Puxüi thoto wüi chixe ku chilang kopkya khoma Chixe anopningle kakle awaokya zing naxatat

¹⁷ ilaxle tungtoe zankhong tinglyet zing naxtat. Ile chang koxba anu naopom nui a ku zukting ang changhuse.

¹⁸ Ku a omalax ang pux ngo? thangshix tuita hia mongtsik apong zaza ang, ku tsün a zakkop ma ashuk ang hia?