JEREMIA 19 - OTSAO BAIBEL (BSI)

Ashixkya Tikkux

¹ Pao laxle hax tikkux tuita shak angkya Jowanpae ku füi akax. Züizüi tüichong mixmüibu hia nguapabu khama azupabu züizüi laxlaxtox angkya

² ilaxle Tik zingnui Zünkai makhange Hinnom Haxsha to pao angkya chixe ku füi akax. Ikhato kue chixe ku ang koxkya kaxho apuk angkya chang.

³ Jowanpae ku ang ile thüi angkya akax: “Judah wanghombu tamchu Jerusalem angkya khünaknu, ku, Jowanpa Israel nok Khüthak Zang-e hünzom füi akax angkya kax to apalax. Ija haxtok hato kue khomtsikya tha ahüi angkya changle, ilaxle ija zing atatkyabu pangwüi abütle changüi.

⁴ Khünaknue ku chilaxle awütdaoa ilaxle ija onui ma mama baozangbu: baozangbu oja hwomechu chitik, hwom pupabue chitik ilaxle Judah nok wanghombue chuwüi chitik, ibu ang hwome töbu apüile koxkya tokhange ija onui akhudaoa, ikhoma kue iningle mok angkya jao changle. Hwome ijongkha a chemngax chichangkya khünakbu ajie awangdaoa,

⁵ ilaxle hwom naosombu wün ma zokle tö ang kox angkya hanpakma hwome Bal ang tö-tsapbu zingle koxle. Ijaningle mok angkya otuechu kue hwom ang kaxtom chifa; ijaningkya bama ku mongkho ma ngaxchu chidong.

⁶ Idaile ijongkha ang Tofeth chichangba Hinnom Haxsha le chinyak angkya tunu nguile hüiüi, Ijakha a Mikmütnui lümix awan ang kopüi.

⁷ Ija onui ma kue Judah hia Jerusalem angkya khünaknue zingkya mwottho pangwüi olom tün ang tomüi. Kue hwom zanpabu ang hwom to anao ang tomüi ilaxle zanhok ma hwom mik-amüt ang tomüi. Kue hwom mangbu a osa hia faomüibu ang sax ang tomüi.

⁸ Le-zyenüi khünak noknusae ile changkya ngünlaxle abütle khosam tang kue ija tingnu hato thama apüiüi.

⁹ Zanbue tingnu akhople kopüi ilaxle khünak pangwüi lang ang tungüi. Akhople kopkya a ipongpongle ziama ang changüi, tingnu mong ma tüikya khünakbue tata müi saxüi ilaxle masu masa hwom müi ngaxchu saxle changüi.”

¹⁰ Ifüima Jowanpae, ikhato ku füi tomle nguikyabu tunthoma ija tikkux ashix angkya akax

¹¹ ilaxle Jowanpa Khüthak Zang-e akaxkya kax ija hwom füi akax ang tom: “Kue ibu khünaknu hia ija tingnu akhixle awütüi, ija ashixkya a ija tikkux ashixkya owaechu tamchatle asop-apong ang chithole changkya ningle changüi. Khünaknu hwom mang Tofeth ma ngaxchu akhünüi chemthüikoxle ibobo ma hwom ang mang akhün angkya onui chitüi.

¹² Ija tingnu hia ima ngokya khünakbu kue Tofeth ningle achangüi, ija kue tsaopu.

¹³ Jerusalem angkya hom-haxbu, Judah nok wanghom hwom hom-haxbu, ilaxle opang homtok ma lyettsibu ang ongan müikya sobu zokle tamchu mama baozangbu ang ju thokle töbu koxpuix: ibu pangwüi Tofeth lailaile chitsaokya ang changüi.”

¹⁴ Ifüima kue Tofeth danle tox. Jowanpae ku ikhato ija kaxho khuapu ang tsanle ahüikya changle. Ku paolaxle noknusa tunthoma Zangshwom-Hom khwa ma ajong

¹⁵ ilaxle Khüthak Jowanpa, Israel nok Zang-e akaxkya kax ngaile thüi: “Ija tingnu hia tomzi tinglongbu pangwüi hato, kue ahüiüile tsaokya sikngün pangwüi kue apüiüi, chemthüikoxle hünzom mong khüidaoa ilaxle hünzome ku zangwün to nathaüi münchang.”