JEREMIA 15 - OTSAO BAIBEL (BSI)

Judah Nok Max angkya

¹ Ifüima Jowanpae ku füi akax: “Mosa hia Samuel hwom ikhama ku ma tsaiju-kaxjule ajongle tüikoxchu, kue ibu khünaknu to chingcha ojao münaho. Hwome pao ang tomkox; hwom ku miktho angkya apaokox.

² Chemtue hwome nang ma hwom ochito paoüile atüipuix, ile akaxkya ku kax hwom hama wünkox: “Züizüi a okak-olak thama ma zile pao angkya chifün ma tüile: ikhoma hwom pao angkya wüi! Züizüi a zan ma max angkya thama ma tüile: ikhoma hwom pao angkya wüi! Züizüi a woknuak thama ma zi angkya wüi: ikhoma hwom pao angkya wüi! Züizüi a zanda ang kople paokya thama ma max angkya changle: ikhoma hwom pao angkya wüi!

³ Hwom to khompua-zadünkya thama oli ali ibibi chang angkya bama ku, Jowanpae mongzangwünle tsuakdaoa: hwom a zanhok ma langüi; hwom mangbu a hibue linle paoüi; osabue ibu saxüi, ilaxle ota danle toxkyabu a faomüibue jokle lingüi.

⁴ Chix Judah wanghom ang ngopongma Manasseh sasün Hezekiah-e Jerusalem ma chemle mokdaopuix ija bama kue zangfang angkya khünaknu hwom ma abüt ang tomüi.”

⁵ Jowanpae thüi: “Jerusalem angkya khünaknu, hünzome ching owa chaüi, ilaxle hünzom mang owa sopüi? Hünzom chemle tüipuixle atüi angkya okuilole owa zakthoüi?

⁶ Hünzom khünaknue ku chilaxle awütpu; hünzome ku hato hünzom tok ahopu. Ikhoma kue ku chak thüipu ilaxle hünzom zutle akhünpu chemthüikoxle ku mongtsik adule ngo ang ku nale shu.

⁷ Ija haxtok angkya tinglong pangnu towüi tsaxsa apik pupule zangwin to kue hünzom apik. Ku khünaknu, kue hünzom amütpu, kue hünzom su-sa hwom langpu chemthüikoxle hünzom chemtuechu hünzom ochax lomtangbu danle chitox.

⁸ Hünzom haxtok ma thanubu huanuma tüile tinu kax tokya fix füi ngaxchu süluile. Hwom tsaktan tüipongma kue hünzom tsünzünbu mik-amüt ilaxle ibu honu hwom mongthang ang tompu. Kue hwom to allele hongpu künmax-mongshan hia thama füi a.

⁹ Sasün hwom anüt amütkya mixchanu zakmaxle tox, zaksyet ang azongzi. Anyixningkya she zangngai a zangnaknu ang achangle pao; she-e zak kople ilaxle mongkha ma kakle. Anyix ozün ma ngole tüikyabu, hünzom a zanpabu chak to lang ang koxüi. Ija kax, Jowanpa, kue akaxdaoa.”

Jowanpa to Jeremia-e Kaxthup-ngaotün

¹⁰ Ku a chemtukux mongmüi chitüikya khünak tuita hex! Anue ku chemkhoma ija chaxwannu to ngui ang tompuix? Haxtok angkya khünak pangwüi füi ku ahe-atsi ilaxle kax ma ala. Kue ngun-syen owa angchu chikox chichangba owa angkya kue chilax; ikoxlechu noknusae ku to thuakzom.

¹¹ Jowanpa, kue müile nang thotha-manzaile chichang thüiningle hwome thuakzomkya pangwüi ku hato naxnguikox tamchu hwom sikngünle hia tuitaile ngopongma kue ku zanpa hwom hanpakma nang ma chingcha chijule jangchangdao thüiningle a. (

¹² Owaechu jan apak ang müntho, tamnüile wi füi awon zingkya shuakux chitokya janbu a.)

¹³ Jowanpae ku ang thüi: “Kue ku khünaknu angkya tuina hia ngun-syenbu hünle pao angkya zan-nokbu ahüiüi. Ija a pangnu khato wüi hwome mokle hüikya ochaxbu khoma tuita tsangmüt ang changüi.

¹⁴ Hwome opak chitikkya haxtok to kue hwom ang hwom zan-nok thothale chang ang tomüi, chemthüikoxle ku mongtsik a wün ningle changle, ilaxle ijae jento zokle ngo angkya changle.”

¹⁵ Ifüima kue akax: “Jowanpa, nange awanpu. Ku texle ataklax ilaxle ku to fonglax. Ku zothuple changdaokyabu to kue olüix khomle chang ang tomhüi. Hwome ku lang ang tho angkya kuxmale nange hwom shanle taxchang. Kue zakkopkya a nang mün khoma kopkya changpule texle atak-hüi.

¹⁶ Nange ku füi zangwünpu, ilaxle kue kaxfa tuita chialyetle apapu. Jowanpa Khüthak Zang, ku a nang kux changle, ikhoma nang zangwünbue mongmüi-pwonla tungle ku mongkha awangle.

¹⁷ Kue ku hanpak mix füi nyinyo tamchu mongmüi tungle chiashix. Nang kax ma laxle ku a ku tata mongtsik ashukle ngole hompu.

¹⁸ Büthüikoxle ku chizakle sikngünle ngo? Ku mak a büthüikoxle chimüi angkya oli? Ibu büthüikoxle chimüitho angkya? Tsonu khato zople paokya shuasa tuita ningle nang ku ang mong athose thütpia?”

¹⁹ Ija to Jowanpae ile lan: “Nang mongchatle jangchang kue pongle kopüi, ilaxle nang a tamchatle ku dapa ang ngoüi. Nange ongat zang wünle chingo homtoxle laxli kaxho apukle jangchang, nang a tamchatle ku ajepa ang ngoüi. Khünaknu nang hato tamchatüi, nang mix hwom hato paongo angkya mwot müntüi.

²⁰ Hwom hanpakmale kue nang a khop füi zingkya katuk tuita ningle shingmongle zingüi. Hwome nang zongto tüiüi, ikoxlechu hwome nang to münlüt. Nang khangkho sünle thom angkya hanpakma ku a nang füi womle tüiüi.

²¹ Tsakzongle hia changnong-pünthomle tüikya khünakbu chak tokya kue nang azünüi. Ija a, Jowanpa, ku kax changpu.”