JEREMIA 12 - OTSAO BAIBEL (BSI)

Jeremia-e Jowanpa ma Zangwün Atüi

¹ “Jowanpa, kue nang füi ku zangwün bama alale jangchang, nang wüi sukya ang bangüijao. Ikoxle kue sukya kaxfün bama nang ma kax tuita atüi angkya wüi. Chichangchizangkya khünakbu mix büthüikoxle huanuma ahak-aluale tüipu? Chisax-chisukya khünakbu khünakbue mix chemle tholünpuix?

² Ibu nange küipu, ilaxle hwome otsing ajopu; hwom tsongpu ilaxle oziak ziakpu. Hwome jento nang müikya bama zangwünpu, ikoxlechu hwome nang bama tuitexkya chitüi.

³ Ikoxle, Jowanpa, nange ku tsingle ngopu; kue chem mokpuix ija nange ngünpu tamchu kue nang to mongkünkya a. Lang angkya chun linle paopu ningle ibu ochax khünakbu linle paodao; hwom lang angkya tu nguikya kople hwom to nyele thomkox.

⁴ Kem haxtok a chemtukux zuale zan-ngoüi, ilaxle haxsha angkya hingzang pangwüi azanle aziküi? Müi hia osabu a zingole ija a kem khünaknu chichangchizangle tüikya khoma changle. Khünak ibue thüile, ‘Keme mokkya mwot Zang-e münngün.’”

⁵ Jowanpae thüi: “Jeremia, khünaknu füito zikkyae nang na-juale jangchang, nang manbu füito chemle ziktho angkya? Nang kothofa to ajong ang ngaxchu chitho, Jordan shuanu kax tokya faokha to chemle aham thoüi?

⁶ Hünzom haxnu homsabu ngaxchu, hünzom homkha khünakbu, hwome ngaxchu nang pongle chikop; hwom nang zan to ka ang mix füi womtüi. Hwom to mong taxong, hwome kaxmüi zangchu kangnaxwün.”

Chix Khünaknu Khoma Jowanpa ang Mongma

⁷ Jowanpae thüi: “Kue Israel nok dantoxdaoa; Kue zünle kopkya jat-li kue dantoxdaoa. Kue mongkünkya khünakbu ang hwom zanpabu ang achang angkya tsak-zong koxdaoa.

⁸ Kue zünle kopkya khünaknu ku zongto zan ang achangle; faokha tokya mailangpa tuita ningle hwome ku to tsele ahungle, ikhoma kue hwom thua anule.

⁹ Kue zünle kopkya khünaknu a osa tuita lailai olae shingpupule pangnuchi tokhange singlangle. Faomüibu sele asox kox ija müisüt ma wom ang!

¹⁰ Mixnok apün-awangkyabue ku grep haxtok huanuma amadaoa; hwome ku haxtok to cha füi nakle amadaoa; mongkünkaikya ku haxtok hwome sak-hax ang achangdaoa.

¹¹ Hwome ija laxli chitüikya haxtok ang achangdaoa; ku tunthoma ija khünak chingokya haxtok ang awüt thomle. Haxtok komkaile sak-hax ang achangdaoa, ilaxle ija pak owaechu müntik.

¹² Sak-hax angkya haxkho akaile khünaknu a tsui ang nguile. Haxtok komkaile olithu ang kue zanhok ahüidaoa; owachu tumüi-lomkhaole ngo ang müntho.

¹³ Ku khünaknue wonglai haxtok mo, ikoxle hingzang züt ang kop; hwome azongle mwot mok, ikoxle ikhama chemchu chikop. Za-adünkya ku mongtsik khoma hwom puamün atho.”

Jowanpa e Israel Tomzi Nokbu ang Tsaosax

¹⁴ Jowanpae thüi: “Kue ku khünaknu Israel ang koxkya haxtok amakya hwom tomzi nokbu bama kue zangwün angkya hidaole tüile. Fum file awütpupule kue ibu chichang-chizangkya khünakbu hwom chaxwan angkya file awütüi, ilaxle hwom chak tokya Judah nok kue sünüi.

¹⁵ Ikoxle kue hwom paole changkya füima, kue hwom to chingchakya tüiüi; kue jat-li pangwüi ma haxtoktok to tamchu ma chaxwan-wan to chatle apüiüi.

¹⁶ Hwome hwom kün-hi-mong makhange zongbakle ku khünakbue tokya zanglom pongle jangkop ilaxle ‘Jowanpa chemle ozün ma ngopuix iningle ngo angkya’: kaitanto hwome ku khünaknu ang Bal mün ma tsaotsüt angkya anwot-anole koxkya ningle: tsaotsütle jangchang, hwom chuwüi ku khünaknu khama womüi ilaxle tomwüi ahak-aluale changüi.

¹⁷ Ikoxle owawa ting-noke ija kax ma chilaxle jangchang, izuma kue hwom komkaile otsing makhange file awütüi. Ija kax, Jowanpa kue akaxdaoa.”