JEREMIA 10 - OTSAO BAIBEL (BSI)

Chapa Shwomkya hia Otsingtsing Shwomkya

¹ Israel khünaknu, hünzom hanpakma Jowanpa ma tüikya kaxho to apalax.

² Chixe thüi: “Mixnokbu mantole taxchang; ding to ozangjang to ngünle ngokya olie hünzom mongthang ang taxtom, ija thoto mixnokbu abüt-aban daobalea.

³ Ibu khünakbu zanglom a chilaxle zanglom changpu. Pün tuita faokha to dak lanle awütpu; ikoxle ija anyok-anyaile zing angkya a pün zingpabu mwot

⁴ ilaxle hun hia khop füi zale zingle. Ija a chidüt angkya hanpakmale janlak füi takle amongle thomle.

⁵ Iningkya chapabu a maikox küikya haxtok ma khünak chaxba ningle zingle thomkyabu lailaile tüile; ibue zangwün ang müntho; ibu a nwonle tix aham angkya chemthüikoxle ibue aham ang müntho. Ibu thua taxza: ibue nang to oma chemchu münthüitho, ilaxle ibue nang ang müikya oli chemchu mokle fa ang müntho.”

⁶ Jowanpa, nang lailaikya mix owa müntüi; nang a chitho-jalün, ilaxle nang mün a chongle tamchu tsak-zongle tüile.

⁷ Nang pangnu jat-li wanghompa, nang chiachuakkya mix owa tüi? Nang a achuak koxle asule tüile. Nang lailaikya owachu müntüi jat-li angkya je-hwon füikya khünakbu khama chichangba wanghombu khama opupuchu.

⁸ Hwom pangwüi ongat-onguingui wüi. Püntho chapabu makhange hwome chem tsingle lax ang thoüi?

⁹ Hwom chapabu to a Spain tokya khop füi chwoplaxle tüile tamchu Ufaz tokya hun füi chwople tüile, chakzing mwotbu pangwüi; hwom a nyinan hia nyikhike awunlaxle tüile nyitak mankyabue takkya nyibu füi a.

¹⁰ Ikoxle Jowanpa, nang a Zang tsingtsing changle, nang a khüzün Zang changle ilaxle oshuk chitüikya wanghom changle. Chemtue nang mongtsikle changpuix, chaxwannu aloxle; chaxwannu angkya jatlibue nang mongtsik adu ang müntho. (

¹¹ Chaxwannu zingle chialaikya baozangbu ang amüt angkya changle le hünzom khünakbue hwom hama apua angkya wüi changpu. Hwom a chaxwantok ojongtochu ngo ang müntom.)

Zang Achuakle Ngaokya Tsai Tuita

¹² Jowanpae chix tsak-zong makhange chaxwannu zing; chix je chix hwon makhange zangfang zingle alai ilaxle zangdingkho shale pün.

¹³ Chix kaxtom ma zangkho tokya tibu akhong; haxtua-zangnam tokhange chixe zangfwombu apüi. Zangwat ma chixe zangchangjep zingle alai ilaxle chix pungkha angkya zangwin ahüi.

¹⁴ Ija ngünle changkya zuma, khünaknu a ongat ang achangle jepa; opangsae ibu chapabu zingle changlaxpuix hwom pangwüi ongat hia kaxux ang achang, chemthüikoxle hwome zingkya baozangbu a othai tamchu khüzün chitüi.

¹⁵ Ibu a laxli chitüikya ilaxle ajaole chang angkya oli; chemtue hwom wai ang Jowanpa nguiüihex ibu a amale awüt angkya changle.

¹⁶ Jakop Zang a ibu ningle chichang; chix a jalinusa zingle alaikya Zang, ilaxle chixe Israel nok a chix khünaknu ang zünle kop. Jowanpa Khüthak Zang a chix mün changpu

Zanda ang Kople Paokya Hüiüi tüikya

¹⁷ Jerusalem angkya khünaknu, hünzom a hwople kopüi khakha! Ma tuinabu afoxlax.

¹⁸ Ija haxtok angkya hünzom a Jowanpae tswonle awüt angkya changle; hünzom tuita ota chitoxle machang machangle chixe hünzom olithu angkya changle. Jowanpa ija akaxdaoa.

¹⁹ Jerusalem angkya khünaknu akhong, “Kwom to ziamale jao maklaxdaoa! Kwom man tam müitoxüi münchang. Kwome ija a adu ang thoüi tukux thüt!

²⁰ Kwom nyihombu amadaoa; ibu to kople thomkya zubu a afündaoa. Kwom naosom hwom pangwüi paole samdaoa; kwom nyihombu chatle ajong angkya owachu chitox; ikha angkya nyibu asha angkya owachu danle chitox.”

²¹ Kue lan: “Kwom lompabu a ongat; hwome Jowanpa ma lom azüi angkya tiktole chichang. Ikhokhoma hwom thaidaoa, ilaxle kem khünaknu a chiakdaoa.

²² Apalax! Kaxho hüidaoa! Shuakuxchi ma tüikya nok tokya zandün zing huanuma tüile; hwom süpahibue Judah tingnu a sak-hax ang achangüi, hijanbu ngokya onui tuita ang a.”

²³ Jowanpa, ma khüzün oshuk-oza ma chak ma koplaxle ngokya mix owachu müntüi; ma khüzün ma chak ma koplax ngokya kwom opupuchu müntüi.

²⁴ Nang khünaknu achangle zinghüi, Jowanpa, ikoxlechu kwom zongto müimamale shix-male taxchang chichangba nang mongtsiktsikba kwom to sikangünle taxchang; ijatix kwom shuk shukya ang changüi.

²⁵ Nang mongtsik a nang to chishwomkya nok chito apaokox ilaxle nang pongle chikopkya nok chito a. Hwome nang khünaknu langhudaoa; hwome kwom komkaile jao amütdaoa ilaxle kwom chaxwan pünle ama toxdaoa.