JEREMIA 1 - OTSAO BAIBEL (BSI)

Jeremia

¹ Ija laipex a Hilkiah sasün Jeremia zangwün tsai-hi-kax zale thomkya changpu. Chix a Benjamin haxsüt angkya Anathoth tinglong ma nguapa tuita changkya.

² Jowanpae Jeremia füi, chix zanglao bün-azom sütle tüipongma, Amon sasün Josiah a Judah haxtok ma wanghom ang ngopongma zangwün,

³ tamchatlechu chixe Josiah sasün Jehoiakim wanghom ang ngopongma akax. Ifüima, Josiah sasün Zekariah-e apünkya zanglao bün-büta nguikya kople Jowanpae chix füi zang obithomthom ma hexle wün. Ija zanglao lyetjang aga lükya to Jerusalem angkya khünaknu a zanda ang kople pao.

Jeremia Nyakkya

⁴ Jowanpae ku ang thüi:

⁵ “Kue nang ang khüzün zakdün koxüi thoto wüi zünle kopkya changpu, ilaxle nang puxüi thoto wüi nang a jat-libu hato ajepa tuita ang zünle kopdaoa.”

⁶ Kue lan: “Jowanpa Khüthak Zang, kue zang chemle wünüihex ngaxchu matik; ku a naosa tomtata changle.”

⁷ Ikoxlechu Jowanpae ku ang thüi: “Nang naosa tomtata changle le taxakax, ikoxle kue nang tsanle apaokya khünaknu hato paokox, ilaxle kue nang hama chemle akax angkya kaxtom koxpuix pangwüi hwom hama wünkox.

⁸ Hwom thua taxza, chem, thüikoxle nang kho awa ang ku nang füi ngo angkya changle. Jowanpa, kue, ija akaxpu!”

⁹ Ifüima Jowanpae chix chak thüi: ku tun to lyet, ilaxle ku füi akax: “Apakoplax, kue nang ang nange chithaile akax angkya kax koxpu.

¹⁰ Anyix kue nang ang jat-li hia wangtingbu thakma, ibu file awüt angkya hia bele athai angkya, pünle ama angkya hia khole awüt angkya, zing angkya hia küi-thwom angkya tsak-zong koxpu.”

Mikngün-ohün Anyi

¹¹ Jowanpae ku ma atüi: “Jeremia, nange chem ngünpu?” Kue lan: “Almon pün okang tuita ngünle.”

¹² “Nange changle akaxdaoa, ilaxle ku kax changle ngaikya to kue hule ngopu le Jowanpae lan.”

¹³ Ifüima Jowanpae ku füi tamchatle akax. Chixe atüi: “Iboma nange chempang ngün?” Kue lan: “Kue shuakuxchi ma tole ngokya tiknu tuita ngünle, ilaxle ija a ichikao to akheüi khakha.”

¹⁴ Chixe ku ang thüi: “Ija haxtok ma ngole tüikya pangnu hato thama a shuakuxchi makhange tole hüiüi,

¹⁵ chemthüikoxle shuakux chitokya jat-libu pangwüi kue ikhato ngui ang sele ngopu. Hwome wanghombue hwom tüntongbu a Jerusalem zünkai ma tamchu ija long katukbu akhople ajongüi ilaxle, ilaxle Judah haxtok angkya mama tingnubu akhople chuwüi ajongüi.

¹⁶ Hwome ochax lyenle changkya khoma kue ku khünaknu to sikangünüi; hwome ku danle toxle, ilaxle mixnok baozangbu ang töbu koxle, tamchu hwom chapabu zingle ilaxle ibu to shwomle.

¹⁷ Achwonlax, Jeremia; paokox ilaxle kue nang ang akax angkya kaxtom fale tüikya hwom hama pangwüi akaxkox. Athax hwom thua zale taxngo, chichangba nang hwom füi ngole tüipongma kue nang sisi mix zale chang ang tomüi.

^18-19 Apalax, Jeremia! Ija haxtok angkya pangnusa — Judah nok wanghombu, nguakax-wangkhobu, nguapabu, ilaxle khünaknubu — nang zongto zan ang changüi. Ikoxle anyix kue nang ang ibu to adu tsuak ang janzüi koxpu, nang a, janthongnu hia khop katuk füi ziakople thomkya tingnu tuita ningle changüi. Hwome nang to münlüt, chemthüikoxle nang kho awa ang ku nang füi tüile. KuI, Jowanpae ija akaxpu.”