JAKOP 5 - OTSAO BAIBEL (BSI)

Hakpa Luapa bama Kaxkhün

¹ Üntoxle athax, hünzom ahak-aluakyabu, ku kax apalax! Hünzom hato hüile ngokya sikngün bama hünzom soplax üntoxle akhonglax.

² Hünzom ngun-syen samle paole, üntoxle hünzom nyi-za a tsike saxdaoa.

³ Hünzom hun hia jangjong to syake lwopdaoa, ilaxle syak ibu a hünzom zongto kaxkhi ang changüi ilaxle wün ningle ijae hünzom müi saxüi. Anyixkya oshuk din-pan to hünzome ibu ngun-syen athünle.

⁴ Ma haxtok ma thomkyabu ang hünzome owa angchu hingchak mün mafa. Apalax! Nang tsaxzüt hingchak kakyabue akhongkya ozing Zang, Khüthak Jowanpa na to nguidaoa.

⁵ Chaxwannu ma hünzom tsün mongtex ma shale tamchu pwonla tungtung le ngo. Lang angkya nyix, hünzom mongzom ma müile saxlaxle nut le ngui.

⁶ Chem ngax chichangkya khünakbu hünzome ajao ilaxle langle awüt, ilaxle hwome hünzom to chiabax.

Adukya hia Zangjop

⁷ Idaile kutüi-kunaohom, Jowanpa mangui tanto aduhüi. Hwom haxtokbue hwom ang ma manzai oziak opua dün angkya hanpakma manzai mixbue chemle adupuix, ito hulax. Tsosa hia khokse zangwat hwome adule tan.

⁸ Hünzome chuwüi adu angkya changle, Jowanpa hüitu chwonüna, hünzom monghom shingmong ang laxkox.

⁹ Kutüi kunaohom, hünzome tata mowün ama le taxtüi, ikoxle Zange hünzom ang kaxfün fakya müntüiüi. Kaxfünpa ngai ang a chwonle tüile.

¹⁰ Kutüi kunaohom, Jowanpa mün ma akax daokya ajepabu hünzome texle ataklax. Sikngün pongma apyen angkya bama hwom a kaxpan ang laxkox.

¹¹ Hwome adu tsuakkya khoma keme hwom ang mohimanbu le nyakle. Job-e adukya bamachu hünzome atatdaoa, tamchu oshukma Jowanpa-e chix to mohimankyachu hünzome awanpu. Chemthüikoxle Jowanpa a chingcha hia jajae awang le tüile.

¹² Kutüi kunaohom, pangnu thakma ija changle, hünzome zangkangting mün ma, chichangba ma tüta mün machu tsao saxle taxatsao, ikoxle hünzom kaxfün ma chiwom angkya kuxma, hünzom zangwün “jo” jangchangba jole: “mün” jangchangbachu mün le changlax.

Mongong Zangjop

¹³ Hünzom khama owawae sikngün apong ngopia? Chixe zangjopkox. Hünzom khama owawa mongmüi ngopia? Chixe achuakle tsai ngaokox.

¹⁴ Hünzom khama owawa kak-lak pia? Müimüithom mixmüi tüichongbu sekox, ilaxle Jowanpa mün ma chix to münga füi jwom laxle hwom ang zangjop ang tomkox.

¹⁵ Hwome mongong makhange jopkya ija zangjope kakmix amüiüi; Jowanpa-e chix ang tsangtsa ma chatle zong koxüi, ilaxle chixe lyenkya ochaxbu thailak faüi.

¹⁶ Ijadaile hünzome tata hama ma ochaxbu ngaikox üntoxle tata hanpakma jopkox, ile hünzom kak-lak müi ang tomüi. Khünak mixmüi tuitae jopkya zangjop ma lap tüle-tüle tüile.

¹⁷ Elija a kem lailaikya khünak tuita changkya. Chixe zang chiwat angkya bama shingmongle zangjop, üntoxle zanglao azom lyet azok mong ma chaxwannu to zang ojao chiwat.

¹⁸ Tamchatle chixe zangjop, izuma zangdinge ikha tokya zangwat thokle adüt üntoxle chaxwannue ma angkya oziak opua alai ang tom.

¹⁹ Kutüi kunaohom, hünzom khama owawa otsingtsing lomtang angkya paole sam ilaxle ata mixe chix tamchatle jang apüi thüiba,

²⁰ owae ochax khünak tuita chix ochei lom tokya apüi laxpuix, chixe zise tsyen chasa tuita khosünkya changpu, ile tüle tülekya ochaxbu thailak atak ang tompu le awanlax.