IZRA 5 - OTSAO BAIBEL (BSI)

¹ Ipongma ajepa anyi, Hagai hia Zekariah, Iddo sasün nyie, Jerusalem ma ngokya Judah khünakbu füi Israel nok Zang mün ma akax ang süt.

² Chemtue Shealtiel sasün Jerubabel hia Jeozadak sasün Jihusua nyie ija kaxho atatle laxpuix, hwome Jerusalem Zangshwom-Hom zai angkya mwot ma süt, ilaxle ija ajepa mixsün anyie hwom to asun.

³ Janbama wüi Hannop-Eufrat angkya Gowarnor Tattenai, Shethar Bozenai, üntoxle hwom füikya nguakax-wangkhobu Jerusalem to ngui ilaxle akax: “Ija Zangshwom-Hom zailaxle ija khuakhomle chang angkya hünzom ang kaxtom owae kox?”

⁴ Hwome ija Zangshwom-Hom zaikya to asun-azule changkya khünakbu mün chuwüi pangwüi atüi.

⁵ Ikoxlechu Judah nok lompabu thakma Zang-e hule nye ngokya, ilaxle Chongwangpa Dairas hato laiza akat laxle chix chitokya kaxnong machat tanto Parsia nok nguakax-wangkhobue chakjule chemchu chimok angkya katzua lax.

⁶ Ija a hwome Chongwangpa hato kaxwün wangle zakya laiza:

⁷ “Chongwangpa Dairas hato, nange mongsom tumüi ma apün-awangle naxchang.

⁸ “Wanghompa, nange awanle kop angkya a, kwom a Judah nok to paopu ilaxle ija chongkya Zang Zangshwom-Hom a longnu longtex chongkya chongkyabu füi püntsibu athünlaxle zaile ngokya kwome ngünle toxdaoa. Ija mwot zaxhun ma tamchu shingmongle mokle hüile.

⁹ “Ija Zangshwom-Hom zailaxle pangnu khuakhomle chang angkya hwom ang kax owae koxpule kwome atüipu.

¹⁰ Kwome hünzom hato ibu mün jaojao koxtsuak angkya hanpakma hwom mwot lom azuile ngokya lompabu mün chu atüipu.

¹¹ “Hwome lanpu: ‘Kwom a ding-hi-hax apünkya Zanghi Zangdabu changpu, ilaxle kaitanto wüi Israel nok wanghom tüle tsak-zongle tüikyabue zaile alailaxle pangwüi khuakhomle toxkya Zangshwom-Hom kwome azünle zaingopu.

¹² Ikoxlechu kwom putong hwome Zangkangting tokya Zang ang mong atsikpu, ikhoma chixe hwom to Babilon angkya wanghompa Nebukadnezar, Kaldi nok wangting angkya wanghompa-e single tingtak ang tompu. Hwome Zangshwom-Hom pünle ama toxpu ilaxle khünaknu a Babilon nok to zanda ang koplaxle paopu.

¹³ Ifüima wanghompa Sairas Babilon wangting ma Chongwangpa ang achangkya pongwang lükya zanglao ma, Sairas-e ija Zangshwom-Hom azünle zaile alai angkya kaxtom koxpu.

¹⁴ Jerusalem Zangshwom-Hom angkya tuina Nebukadnezar-e tsuile paolaxle Babilon nok baozang shwomnui to thomle tüikya hun hia khop, ibu füi zingkya tik-lak pangwüi achatle koxpu. Chongwangpa Sairas-e tiklak-khuakhe ibu, chixe Judah haxtok ma Gowarnor ang zünle kopkya mixsün Sheshbazzar chak to koxpu.

¹⁵ Ibu tuina koplaxle chatle Jerusalem Zangshwom-Hom ma dan angkya, tamchu amipongkya man ma wüi ija Zangshwom-Hom azünle zaile alai angkya chongwangpae chix füi akaxpu.

¹⁶ Ikhoma Sheshbazzar ngui ilaxle ija homting ocha zai; ija makhange homzai mwot owang wanglaxle anyix kople zaile hüile, ikoxlechu ija athax kople matsuak.’

¹⁷ “Athax, ijae Wanghompa nang mongzom jangmüi thüiningle, Chongwangpa Sairas-e Jerusalem angkya Zangshwom-Hom ija azünle zaile alai angkya kaxtom chikox hia koxpuix, ija tsaitong-kaxza lomle atak-hüi ilaxle ija bama nange chemle ajangpuix, ija kax kwom hato tsingang tomhüi.”