IZRA 3 - OTSAO BAIBEL (BSI)

Tamchatle Zangshwom Mwot Owang Wang

¹ Lyetjang anüt mong ma Israel khünakbu pangwüi ma tinglonglong to homhax zaile tingtan nokzingkya tsuakle hüi. Ifüima hwom pangwüi Jerusalem ma asox,

² Jehuzadok sasün Jihusua, chix füikya nguapabu, Shealtiel sasün Jerubabel, chix füi tomle chix haxnu-homsabu, hwome Israel nok Zang tö-tsap tamchatle zingle tsuak. Ikhoma Zang khünak Mosa Wanlom ma tüikya ningle hwome ibu tö-tsap ma töbu zokle ashunle kox ang tsuakle hüi.

³ Ikoxlechu zanda ang ngokya chatle tüikya khünakbu a tingnu ma tüikya khünakbu thua za. Hwome tö-tsap amipongkya khama wüi zaile alai. Ifüima hwome chizakle ja-nop to zokle ashunle töbu koxkya mwot tamchatle owang wangle hüi.

⁴ Wanlom ma tüikya ningle hwome pomsa pangpwon nuile hüi; nyixfokya to ija nyix koxsese töbu koxle hüi.

⁵ Ija tok to hwome koxzaikya, otom ma lanle zokle ashunkya töbu, ilaxle Lyetzün Pangpwon ma koxkya töbu, ilaxle Zangshwom-Hom to nguipongma koxle hüikya töbu ilaxle Jowanpa ang mongtex tö koxle hüikyabu, ibu pangwüi tsuakle hüi.

⁶ Khünaknue Zangshwom-Hom zaikya mwot chak ma laxle mahüi koxlechu, hwome Jowanpa ang zokle ashunle tö kox angkya lyetjang anüt lükya to pongwang nyixkha owang wangle hüi.

Zangshwom-Hom Zai angkya Mwot Wangkya

⁷ Khünaknue long zingpa hia pün zingpa, ibu ang kox ang ngun-syenbu apüile kox, ilaxle Lebanon haxtok tokya sedar pünbu füi alüix ang, süt, grepti-ju, olip münga, ibu Tair hia Sidon tingnubu to apao. Ibu a Joppa to tilom makhange apüi angkya changkya. Ibu pangwüi Parsia nok wanghompa Sairas ma tiksho laxle mok.

⁸ Idaile Jerusalem Zangshwom-Hom homting to hwom nguikya ofüi angkya zanglao ma lyetnu kua anyi lükya to hwome homzai mwot owang wangle hüi. Zerubbabel, Jihusua, ilaxlechu hwom nok khünak mamabu pangwüi, nguapabu, Liwi hwom, zanda ang ngokya Jerusalem to nguile tüikya khünakbu pangwüi, ija mwot to azu. Liwi hwom, zangtsa makhange thakchichi pangwüi ija Zangshwom-Hom zaikya mwot akhi-amikle hume ang kam.

⁹ Liwi khünak, Jihusua hia sasün hwom tamchu chix haxnu-homsabu, ilaxle Kadmiel hia sasün hwom (Hadawiah saxthom angkya) hwom pangwüi Zangshwom-Hom zaikya mwot to humele chang angkya asunle hüi. (Hwom to Henadad saxthom angkya Liwi hwome asun.)

¹⁰ Chemtue khünakbue Zangshwom-Hom homting zai angkya mwot owang wangle changpuix, nguapabue hwom zapuabu laxlaxle nyazongbu chak ma kopkople ma ngwotnui nui kop, ilaxle Asaf saxthom angkya Liwi hwom khopsya koplaxle ikhama ajong. Wanghompa Dawid-e adangle fakya othui ningle hwome Jowanpa achuak-achenle chang.

¹¹ Hwome Jowanpa achuakle chatchatnaole ija tsai ngao: “Jowanpa a müikya changle, ilaxle Israel tokya chix mongkün ma oshuk müntüi.” Pangnusa wüi mae tsuakkyapong le akhong, Jowanpa achuak, chemthüikoxle Zangshwom-Hom zai angkya mwot owang wangle hüidaoa.

¹² Nguapa tüichongbu huanuma, Liwi hwom, ilaxle saxthom lompabu, ibu opange owangpongkya Zangshwom-Hom ngün ang kople changdaolaxpuix, hwome ija Zangshwom-Hom homting chifün zaikya to hule ngolaxle hwom mongto chingcha dongle hüikyae hwom akhongle sop. Ikoxle mamabu a mongmüi to akhong.

¹³ Mongmüi to akhongkya hia sopkya nyi owaechu süile tsing ang chitho, chemthüikoxle hwom akhongkya ozing a tachi-suichi alople pao.