IZRA 1 - OTSAO BAIBEL (BSI)

Sairas-e Judah Khünakbu Chat angkya Kaxtom Kox

¹ Parsia angkya Sairas chongwangpa ang achangkya pongwang lükya zanglao ma, Jowanpae chix ajepa Jeremia füi chempangle akax daopuix, ibu changle ngai ang tom. Ija kaxho chix chaxwan pangnu khato wüi laiza ma afan angkya hanpakma chixe Sairas ang akhangle mok angkya kaxtom kox:

² “Ija a, Parsia nok chongwangpa Sairas kaxtom changle. Jowanpa, zangkangting tokya Zang-e, ku a zangfang pangwüi thakma apün angkya mix ang kamdaoa ilaxle Judah angkya Jerusalem ma chix hanpakma zangshwom-hom tuita zingle alai angkya ku hünlit ang koxdaoa.

³ Opang chix khünakbu changpuix, hünzom pangnu füi wüi Zang womle naxngokox. Jowanpa owa Israel nok Zang changpuix, Zang owa to Jerusalem ma shwompuix, chix Zangshwom-Hom azünle zing angkya hanpakma hünzom a Jerusalem to pao angkya changle.

⁴ Chix khünak owawae chat angkya hanpakma fongkya laxse tsukya mix jangtüi, ija to chix tomzibue hule fongkox angkya changle. Hwome ibu to khopjan, hun, osüt-owong ilaxle müibu, tamchu Jerusalem Zangshwom-Hom ma tö ang kox angkya, ibu tuina pangwüi koxle apao angkya changpu.”

⁵ Ifüima Benjamin hia Judah homjen lompabue, nguapabu hia Liwi hwome, ilaxle tütapu wüi changlax, Jerusalem angkya Jowanpa Zangshwom-Hom zingle amüi angkya hanpakma pao angkya bama Zang-e opang mongto tsukya mongkho adünle koxdaopuix, ibu pangnu to

⁶ hwom tomzibue ibibi tuina koxle asun: khop-jan füi zingkya tiklakbu, hunbu, süt-wongbu, müibu, ilaxle mama-mama thalix tuinabu, tamchu zangshwom angkya hanpakma töbu koxle fong.

⁷ Sairas-e hwom ang khop hia wansabu, chempang wanghom Nebukadnezar-e Jerusalem Zangshwom-Hom angkya tsui paolaxle chix baozangbu to shwomkya nui ma thomle tüipuix, ibu pangwüi achatle kox.

⁸ Chixe ibu Mithredath chak ma kox. Chix a wanghom hom ma wangshem tüichong changkya. Judah angkya Gowarnor Sheshbazzar hanpak ang chixe ibu pangwüi akiakle alai.

^9-10 Ibu a ile changle: tö kox angkya hanpakma hun khupbu 30 tö kox angkya hanpakma khop khupbu 1, 000 mama khupbu 29 ahikya hun khupbu 30 ahikya khop khupbu 410 mama tiklakbu 1, 000

tö kox angkya hanpakma hun khupbu

¹¹ Pangnu athüt koxle 5400 hun ilaxle khop jankhua hia mama tuinabu, Babilon tokya Jerusalem to chat pongma Sheshbazzar hia chix füi tomle zanda ang ngole tüikyabue hwom füi tomle laxlaxle ngui.