ISAIA 9 - OTSAO BAIBEL (BSI)

¹ Ija sikngün hanpak chak tokya azangle pao angkya hwom ang lomtang tuita chu müntüiüi. Zebulun hia Neptali homjen haxtokbu a tamchatle azale awütkya ang achang, ikoxlechu füichi chaxwan zanghane ija haxtok hato münchong-ngampai apüiüi; ija wankam a Mediterenian handünchi kao makhange Jordan shuanu tachi haxtok alople, tamchu mixnokbu ngokya Galili jao alople.

Füichi Wanghompa

² Zangnak fangto ahamle ngokya khünaknu hwome chongkya zangngai ngündaoa. Hwom a zangnak fang chaxwan to ngokya, ikoxle athax hwom to zangngaie nyanle ngole.

³ Nange hwom ang chongkya mongmüi koxdaoa, Jowanpa; nange hwom mongmüi ang tomdaoa. Nange chem mokdaopuix ija füi hwom mongmüile, khünaknue puamün wün pongma mongmüikya ningle chichangba hwome azan pongma kopkya tuina ahan pongma mongmüikya ningle.

⁴ Chemthüikoxle hwom zothuple ngokya dang nange amadaoa ilaxle hwom suakpong ma fitle ngokya jantom nange awütdaoa. Zan-nokbu to nange lütle tsuakdaoa nang khünaknu to afangle zothup ngokya zan-nokbu a, ami pongma nange Midi nok süpahibu to lütkya lailaile.

⁵ Sing ang hüikya süpahibu chisox ilaxle aji füi awangkya hwom nyizabu pangwüi wün ma max ang tomüi.

⁶ Kem ang naosa tuita puxdaoa! Kem ang sasün tuita koxdaoa! Ilaxle chix a kem lompa ang changüi. Chix ang a: “Ohünotün Mongjang zukya” “Khüthak Zang”: “Oshuk chitüi Hopa”, “Tumüi Wanghompa”, le amünüi.

⁷ Chix chongwang janzüi a chong ang chong ang sütüi; chix wangting a jento tumüi-mongsom ma ngoüi. Chixe Wanghompa Dawid mantswon chongwang ningle apünüi, changkya hia sukya a chix tsak-zong chifün ang laxüi, athax makhange oshuk hanpak alople. Jowanpa Khüthak Zang-e ibu pangwüi mok angkya mongzang wündaoa.

Jowanpa e Israel Zothupüi

⁸ Jakop sixli, Israel nok thakma kaxfün fa angkya Jowanpa-e kaxtak dündaoa.

⁹ Israel khünaknu pangnusa, Samaria tingnu ma ngokya khünak pangwüi, hwome ija a chixe mokpule awan ang kopüi. Athax hwom a mongngam ma hia khokhe chithüi ngole. Hwome thüile,

¹⁰ “Haxhuak long füi zingkya hom tsundaoa, ikoxlechu kwome ibu longhombu ang lüile zingüi. Saikomor püntsibu a ahütdaoa, ikoxlechu kwome ibu a sümüipu sedar pün füi lüile zingüi.”

¹¹ Jowanpae hwom zanpabu mwop ang tomdaoa hwom to sing angkya hanpakma.

¹² Siria a handünchi ma Filistia a hannopchi male Israel nok jok angkya hanpakma hwom wikhabu akadaoa. Ibibile changkox ngaxchu Jowanpa mongtsik mabak; athaxchu sikangün angkya hanpakma chix chak a ajong lüwüi tüile.

¹³ Israel khünaknu ang künlop-monglüi matüi; Jowanpa Khüthak Zang-e hwom to ipongpongle sikngün fakoxchu, hwom a chix hato machat.

¹⁴ Israel nok lompabu hia hwom khünaknu to Jowanpae nyixta ma wüi sikangünüi; chixe hwom okhang-müi komle texle awütüi.

¹⁵ Zunu-zupa hia tüichong mixmüibu a okhang: ilaxle othai hwon-nwot apüikya ajebu a omüikuachi changüi!

¹⁶ Ibu khünak lom azuikyabue hwom othai to zunle pao ilaxle hwom komkaile khosam ma dantox.

¹⁷ Idaile Zang-e tsünzün hwom opupuchu paole azang ang münkox, ilaxle chixe zomnu hia khaxsa hwom opupu tochu chingcha ahokya müntüiüi, chemthüikoxle khünaknu pangwüi zang chilax homtoxle ngokyakya tamchu chichangchizangle tüikyakya wüi. Itukuxle changkox-ngaxchu Jowanpa mongtsik münbaktoxüi, ikoxle chix chak a athaxchu hwom to sikangün ang ajong lüwüi ngoüi.

¹⁸ Kongbüi hia hux pünbu zokle ashunkya wün lailaile khünaknu chichang-chizangkyae zokle ashunle. Tsan shunkya wünkhut othwom-othwom ma dongkya lailaile ijae zokle ashunle.

¹⁹ Jowanpa Khüthak Zang ang mongtsik ngaikoxle, chixe chaxwan okhao angkhange zokle ashundaoa. Khünakbu a wün tak angkya ha thatha ang changdaoa; ilaxle khünak owaechu mik chiamütle matüi-manao ota toxkya müntüiüi.

²⁰ Chaxwan pangnu khato wüi khünakbue hwom atak tsuakpupu pa-lole saxüi, ikoxlechu hwom wokfwot tam münmüitoxüi. Ibue masu-masa hwom ngaxchu sax angkya changle!

²¹ Manasseh hia Efraim khünakbue tata to single changüi, ilaxle hokhi athütlaxle Judah to singüi. Itukuxle changkox-ngaxchu Jowanpa mongtsik münbaktox; athaxchu chix chak a hwom to sikangün ang ajong lüwüi tüile.