ISAIA 8 - OTSAO BAIBEL (BSI)

Khünaknu hato Mowan ang Isaia Sasün

¹ Jowanpae ku füi akax: “Zale koppüli jali chongkya tülaxlax ilaxle ija ma kaxmuakbu chongle zalax: ‘Allele Sing, Lebama Tswonle Pao’, le zakoplax.

² Monge ongkya khünak anyi, nguapa Uriah hia Jeberekiah sasün Zekariah nyi, ngünmix ang lax angkya hanpakma koplax.”

³ Alüile chingo homtoxle ku kakonu ma nao tüi. Chemtue kukhi sasün ngünpuix, Jowanpae ku füi akax: “Chix ang: ‘Allele Sing, Lebama Tswonle Pao’, le amünkox.

⁴ Naosa ‘Anu’ hia ‘Apa’, le nyaktang matsongba, Damaska angkya tuina pangwüi tamchu Samaria angkya tsuikya mwot-kat pangwüi Asiria nok wanghompa-e tswonle paodao angkya changle.”

Asiria Nok Chongwangpa Nguile ngole

⁵ Jowanpae ku füi tamchatle zangwün.

⁶ Chixe thüi: “Wanghom Rezin hia wanghom Pekah nyi tunthoma, ibu khünakbue adangle jenkya Shiloh shuasa ti münlaxpule awütkya khoma, ilaxle abün

⁷ Ku, Jowanpa-e, Judah nok to sing angkya hanpakma Asiria chongwangpa hia chix süpahibu komkaile apüiüi. Kakax pangnu khato lyemle Eufrat shuanu tichen mualyemle hüikya ningle hwom thut-thutle hüiüi.

⁸ Pangnu pangnu to chwople, tichen lailaile hwome Judah zutlaxtoxle leüi.” Zang a kwom füi tüile! Chix zang pünkyae chaxwan kho sünle tüi.

⁹ Jat-libu, hünzom zalaxle asoxlax! Apalax, hünzom haxtua-zangnam tokyabu. Azan ang achwonlax, ikoxlechu zalax! Changle, achwonlax, ikoxlechu zalax!

¹⁰ Hünzom katzuabu laxlax! Ikoxlechu ibu otuechu tsuakle münpao. Mongtsukya tukuxle hünzome zangwünlax! ikoxlechu ija chem angchu münchang, chemthüikoxle Zang a kwom füi tüile.

Ajepa ang Jowanpa e Kaxkhün Kox

¹¹ Chix tsak-zong chongkya makhange Jowanpae khünaknu lengokya lomtang ma chile angkya hanpakma ku ang kaxkhün koxdaoa. Chixe thüi:

¹² “Khünaknu zangwün khato hakle taxkop ilaxle chemthua hwom zapuix ija thua nang taxza.

¹³ Texle ataklax, Jowanpa Khüthak Zang, ku a otsao changle. Nang a ku thua tix za angkya changpu.

¹⁴ Ku a wün ang chitsuakkya otsao changkya khoma ku a tuita khünaknu chikho thule ngokya longnu ningle changpu; Judah hia Israel nok wangting tamchu Jerusalem tingnu angkya khünaknu aman angkya hanpakma ku a tuita kam thale thomkya changpu.

¹⁵ Khünaknu huanuma chikho thuüi; hwom a atiüi ilaxle akhixle paoüi. Hwom a kam ma aman angkya changle.”

Lwompu Hwom füi Apongkya bama Kaxkhün

¹⁶ Hünzom, ku wangshembue Zang-e ku ang fakya kaxhobu nyele tamchu sünle thom angkya oli changpu.

¹⁷ Jowanpae chix a khünaknu mikngün thoto khünle thomdaoa, ikoxlechu kue chix to mongongpu tamchu monghom thompu.

¹⁸ Ikhama ku Jowanpae ku ang koxkya naosom hwom füi tüile. Jowanpa Khüthak Zang owa ngwotnui Zaion Haxnu ma tüipuix, chixe kwom a khüzün kaxho tuita ang ahüikya changle.

¹⁹ Ikoxle khünaknue hünzom ang kaxhobu hanpakma, kax atsatle ngokya aje hia o-nan, ibu ma tik to angkya akaxüi. Hwome thüiüi: “Ikhoma khünakbue iningkya kaxhobu paktik ang baozang chasabu füi zangwün angkya ilaxle ozün ma ngokyabu mün ma ziünkyabu füi apong angkya changle.”

²⁰ Hünzome ibu kax to lanüi: “Hünzom hama Jowanpae chem anwot-ano puix ija to apalax! Jenu-shipabu zangwün to taxapa — hwom zangwüne hünzom sikngün füi atsaile thom ang münthopu.”

Sikngün angkya Hanpak

²¹ Khünaknu a chaxwan faole ahamüi; hwom mong athoüi ilaxle woknuak tilan ma maxüi. Hwom woknuak ma tamchu hwom mongtsik ma hwome ma wanghom hia ma Zang to thuakzomle changüi. Hwome zangkho chito hukoxlax

²² chichangba haxchi to hukoxlax, ikoxlechu hwome thangnak hia zangnak boma chemchu münngün, hwom jwonle ahüi ngokya zangnaknu kha a.