ISAIA 66 - OTSAO BAIBEL (BSI)

¹ Jowanpae thüi: “Zangkangting ku ngwotnui, chaxwannu a ku chitingnui changpu. Jangchangba, nange ku hanpakma chem ningkya hom tamchu chem ningkya ku ngwotnui zingle alaiüi?

² Zangfang a ku jaoe zingle alaikya changpu! Puinaikya füi tamchu künlop-monglüi laxle, opange ku thuaza tamchu kax ma laxle tüilaxpuix, ibu füi ku ang mongzom müikya tüile.

³ “Khünaknue hwom zongma chemle müipuix ija ningle mok. Tö ang kox angkya hanpakma maihupong tuita langpuix chichangba khünak tuita langpuix hwom zongto tuitata wüi changle; hwome chun hosa tuita to koxle wüi changlax hisa tuita ngom azople wüi changlax; hwome saxziak tö koxpuix chichangba wak aji koxpuix, hwom zongto tuitata wüi; ongan müikya zo zokle changpuix chichangba chapa tuita to shwomle changpuix, hwom zongto tuitata wüi. Hwome ile dyenlale shwom-tole changkya olom hwom zongto müihule.

⁴ Ikhoma kue hwom hato thama apüiüi — hwom a ija thua süzakya changle — chemthüikoxle kue sepongma owaechu chilan chichangba kue chem akaxpuix ija to owaechu chiapa. Hwome ku kax ma chilaxle tüi angkya ikoxle ochax mwot mok angkya mongzangwünle tsuak.”

⁵ Jowanpae chem akaxpuix ija to apalax, hünzom chix chathua zakyabu tamchu chix kax ma laxle ngokyabu: “Chemthüikoxle hünzom ma ku to mongongkya tüile, hünzom khünak züizüie hünzom to miktsakle ilaxle hünzom füi tomle mok angkya mwot hwom ma chemchu müntüi. Hwome hünzom chanyi ilaxle thüi: ‘Jowanpae chix chuak-chongkya naxahokox ilaxle hünzom khosünle naxchang kox, ikoxtix kwome hünzom mongmüikya ngünüi.’ Ikoxlechu hwom a hwom alüile thajaokya tüiüi!

⁶ Apalax! Tingnu ma chongkya ozing ija, Zangshwom-Hom ma ozing alaikya, ija a Jowanpae chix khünaknu to sikngün fakya zing changpu!

⁷ “Ku otsao tingnu a ojao chikak homtoxle nao puxle alaikya mixcha tuita ningle changpu.

⁸ Ija ningkya ngünkya mix tamchu atatkya mix owawa tüicha? Chaxwan onok tuita nyixtakya fang ma puxkya nok tüicha? Chaxwannu nok tamchatle puxüi thoma Zaion a okuilole sikngün ngo angkya münchang.

⁹ Kue ku khünaknu pux angkya hanpak hato ahüilaxle pux ang müntomüile chithüt”, le Jowanpae akaxdaoa.

¹⁰ Jerusalem füi mongmüikox; she hanpakma pwonla dongkox, ija tingnu to mongkünle tüikya hünzom pangnusae! Athax she füi tomle mongmüikox, hünzom she hanpakma sople ngokyabu pangwüi!

¹¹ Naosa tuita honu tsomti thoto mongmüikya ningle, She ahak-aluakya ma hünzome mongmüi ataküi.

¹² Jowanpae thüi: “Kue hünzom hato okuilole ngo angkya ahak-aluakya apüile faüi; chaxwannu nok angkya tuina hünzom hato otuechu chizopkya shuajen ningle jenle nguingoüi. Nang a, tüle künkak mongkün füi ma ahui-jak ma pailaxle honue tuitae apu-achangle hume thomkya nao ningle changpu.

¹³ Honu tuitae masa mong asomkya ningle, Jerusalem ma kue hünzom mong amüiüi.

¹⁴ Hünzome chemtue ile changkya ngünüihex, hünzom ang mongmüiüi. Ijae nang tsak-zongle tamchu tsangtsa fan müile ngo ang tom. Ifüima, Jowanpa, kue ku kax ma laxle ngokyabu to kue fongle hüikya, ilaxle ku zanpabu hato ku mongtsik ahokya hünzome awanle hüiüi.”

¹⁵ Jowanpa a wün füi hüiüi. Chix a zangchei ozang ma piüi ilaxle chix ang mongtsikkyabu to sikangünüi.

¹⁶ Chaxwannu angkya khünaknu opang thaile changpuix ibu to wün hia changlo füi chixe sikngün faüi — ilaxle mik max ang tomüi.

¹⁷ Jowanpae thüi: “Songsari baozangbu to shwomkya mongzok lom to ma tsangtsa koxkya hia otsao tsawat to jenlole paopuix üntoxle opange wakmüi hia jux müibu tamchu chitsaokya müibu saxle changpuix ibu hato oshuk hanpak nguile hüile.

¹⁸ Kue hwom mongtex hia hwom mwotbu tsingle Ku nguile ngole chaxwannu nok pangwüi tomle. Chemtue hwom tomle nguiüihex, hwome ku tsak-zonge chem mokle tsuak puix ija ngünle laxüi

¹⁹ ilaxle hwom to sikngün ang tomkya a ku changpule awan ang kopüi. “Ikoxlechu kue hwom züizüi sünle tüiüi ilaxle ku mün hia ku zaxzangle changkya matsingkya tsailo nokbu to hwom apaoüi: Spain nok to, Libia nok to, ilaxle Lidia, hwom mankya sanhap mix füi, ilaxle Tubal hia Grik nok to. Ibu chaxwannu nok khato hwome ku chuak-chongle tüikya apuküi.

²⁰ Hwome hünzom füikya Israel khünakbu ku hato hingho tuita ningle laxle apüiüi. Hwome ibu a Jerusalem angkya ku otsao haxnukho to apüiüi ibu a mankho ma, mantsakbu kho ma, ilaxle utbu kho ma, man-kanlin hia maihue linkya zyenbu kho ma apüiüi; ija a Israel noke zanglom ma otsao ang twonle ngokya tik-lakbu ma Zangshwom-Hom to töbu apüile koxkya ningle changüi.

²¹ Kue hwom züizüi a nguapabu ang tamchu Liwi hwom angle zingüi.

²² “Chaxwannu hozün hia zangkangting hozün kutsak kuzong makhange chemle ngopuix, ilailaile hünzom sixli hia hünzom münbu a othuithuima ngoüi.

²³ Lyetzün pangpwon hia Sabath foto, zangfang angkya pangnu nok wüi ku to shwom ang ija Jerusalem to ngui angkya changle.

²⁴ Hwom pao ang laikya zuma, ku zan to kale changkya khünakbu mang hwome ngünle laxüi. Hwom mang saxkya chongbu tamchizile ngoüi, ilaxle hwom to zokle ashun ngokya wün a tam chimaxle ngoüi. Khünaknüsa mikngün ma hwom a chisumüikyabu ang ngünüi le Jowanpae akaxle.”