ISAIA 61 - OTSAO BAIBEL (BSI)

Khosünle Kopkya Kaxho Müikya

¹ Jowanpa Khüthak Zang-e ku chix Chasa füi awang. Chixe ku zünle kop ilaxle tsanle apao Chitüi-chinang khünakbu hato kaxho müikya apüi ang, Künmax-mongshanle ngokyabu mong azün ang, Kople thomkyabu hato dan angkya kax apuk ang Ilaxle kun ma thomkyabu hato alai angkya kaxho ang.

² Chixe ku khuapu ang tsanle apao Chaxwan-zanghan tu nguikya bama Jowanpae chix khünaknu khosünüi Ilaxle hwom zanpabu to lütüi. Künmax-mongshanle ngokyabu pangnu mong asom ang chixe ku ahüipu,

³ Zaion ma künmax-mongshanle ngokyabu ang kox ang Mongma lüix ma künsom hia mongmüi kox ang, Mongma lüix to mongmüi tsai ngao ang. Hwom a pünbu ningle changüi Jowanpa chix jaoe küikya pünbu ningle. Hwom pangnusae chem changpuix ija moküi, Chixe chem mokdaopuix ija hanpakma Zang achuaküi.

⁴ Kaiwüi amale thomdaokya tingnu hwome zingle amüiüi.

⁵ Ku khünaknu, mixnokbue hünzom thothaüi. Hünzom müizyembu to hwome humele changüi Hünzom haxtok ma hwome manzaiüi ilaxle grep tong moüi.

⁶ Ilaxle hünzom a Jowanpa nguapabu le awan ang kopüi, Kem Zang dapabu a. Hünzome chaxwannu nok tuina lax ang kopüi Ilaxle ibu a hünzom kux changpule angasomkya tüiüi.

⁷ Hünzom thünzak hia chie-chisekya pangwüi ashuküi. Hünzom a ma haxtok ma ngo ang kopüi, Ilaxle hünzom tuinabu a othom anyie nuile changüi; Hünzom mongmüi ma oshuk müntüitoxüi.

⁸ Jowanpae thüi: “Kue sukya kaxfün to mongkünle ilaxle mix to afang thomkya hia mütkopkya thua anule. Kue ku khünaknu to mong athokya chitüile hingho koxüi Ilaxle oshuk chitüikya Tsaotsüt hwom füi thomüi.

⁹ Chaxwannu nok khama hwom a fuale wünüi; Hwom ngünkya pangnusae awanle changüi Hwom a kue mohimankya khünaknu changle le.”

¹⁰ Jerusalem mongmüilax, Jowanpae nang bama chem mokdaopuix ija hanpakma a. She a tui to juüi naocha tuita aza-apua laxle tüikya ningle changpu. Zang-e chix to khosün hia lütkya füi awunle koxdaoa.

¹¹ Chemle suitsang daple asoklaxle tsongle hüipuix, Jowanpa Khüthak Zang-e chix khünaknu khosünle changüi, Ilaxle chaxwannu nok pangnue chix achuakle changüi.