ISAIA 56 - OTSAO BAIBEL (BSI)

Zang Khünakbu Khama Pangnu Nok Wüi Womle

¹ Jowanpae chix khünaknu ang thüi: “Chem supuix tamchu oja changpuix ija moklax, chemthüikoxle lebama wüi kue hünzom khosün angkya changle.

² Nazak nyix atsaole nui ilaxle ija ahaile chichangkyabu to kue mohiman angkya changpu. Ochax chemchu chimokle tüikyabu to kue mohiman angkya changle.”

³ Jowanpa khünakbu füi womle tüikya mixnokbue: “Jowanpae ku ang chix khünaknu füi tomle chix shwom ang müntom angkya changle le chiakaxüi.” Lwomzüi laxle tüikya khünakbue, hwome su-sa pux-paile chang ang chithokya khoma, chix a Zang khünaknu füi tomsax-tommok angkya chemchu müntüile chithüi angkya changle.

⁴ Jowanpae iningkyabu füi akaxle: “Hünzome Nazak nyix nuikya füi ku achuak tamchu ku zongto chem müipuix ija oli mokle üntoxle mongong füi ku kaxtombu thomle jangchang,

⁵ hünzom ang su-sa chitüile changkoxchu hünzom münbu a ku Zangshwom-Hom ma münalak. Hünzom a otuechu alakle münasam.”

⁶ Chix khünaknu ang achangle hüilaxle chix to mongkün tamchu chix thotha ilaxle nazak nyix atsaole nui üntoxle chiale le chix kaxtombu thomle tüikya mixnokbu füi Jowanpae akax:

⁷ “Kue hünzom a ku otsao haxnu, Zaion to apüiüi ilaxle ku zangjop hom ma hünzom ang mongsom koxüi, ilaxle ku tötsap ma hünzome koxkya töbu kue pongle kopüi. Ku Zangshwom-Hom a chaxwannu nok hanpakma zangjop homle nyaküi.”

⁸ Jowanpa Khüthak Zang, owae zanda ang ngokya Israel nok chix khünaknu owae ma hom to apüipuix, chixe chatle chuwüi mama khünakbu chu hwom füi wom ang apüi angkya tsaole.

Israel Nok Lompabu Ajao

⁹ Jowanpae mixnokbu ang faomüi ningle chang üntoxle chix khünaknu jokle ling angkya akax.

¹⁰ Chixe thüi: “Lompabu pangnu, opange ku khünaknu azale changsepa hex, hwom a miksutbu changle! Hwome chemchu müntik. Hwom a hom nye ang thomkya chitwomkya hi ningle changle — hwome wünmang bama atse zaza ang awanle. Hwome jiple ngosele chemtukux tsupuix!

¹¹ Hwom a tamchu wok afwotle sax ang chikopkya nüfux füikya hi tuita ningle. Lompa ibu ma tsing-wankya chemchu müntüi. Hwome pange wüi ma mongtsutsu ma mokle ilaxle ma fünmüimüi lomle.

¹² Ibu juling mixbue thüile, ‘Ju apüihax, ilaxle keme otsuak-tsuak ma linghax! Anyix tukux ngainyix a ofün chimüitüi!’”