ISAIA 50 - OTSAO BAIBEL (BSI)

¹ Jowanpae thüi: “Khünak tuita chix kakonu apaokya ningle kue ku khünakbu apaopule nange thütpia? Jangchangba, afan angkya laiza ojong? Khünak tuitae masa da ang hangkya ningle kue hwom zanda ang koxle apaopule nange thütpia? Ile münchang, hünzom zanda ang hünzom ochax khoma paopu; hünzom mütkopbu khomale hünzom koxle apaopu.

² “Ku hwom khose ang hwom hato nguikya zuma khünaknu pongzik chitüile hünzom chem ang thai? Kue nyak pongma hwome büthüikoxle chilan? Ku ma hwom khose ang zong chitüile lehia? Kaxtom tuita makhange wüi kue tinu azop ang tsuak ilaxle ti chitüile ikha angkya nyaxbu naxzi ang shuajen a sak-hax ang achang ang tsuak,

³ Zikya mangsop pongkya ningle, zangdingkho kue zangnak ang achang ang tsuak.”

Jowanpa Da Tutae Kax ma Laxkya

⁴ Kue na-juale maxngokyabu zong adün ang chem akax angkya hex, Jowanpa Khüthak Zang-e ku hama apuadaoa, Chixe ku hama anwot-anole chang angkya apale kop angkya nopfokya to ku ang mongtsukya kox.

⁵ Jowanpae ku ang tsing-wankya koxdaoa, ilaxle kue alün-aloxle chichang chichangba chix hato tok ahole chichang.

⁶ Ku to chietkkyabu hato kue tok ahole kox. Hwome ku tha ajao pongma kue hwom chiabax, hwome ku khang mun file awüt pongma tamchu ku thün to thuak füi thuakle changpongma a.

⁷ Ikoxlechu hwome ajao-adakyae ku to chipo chemthüikoxle Jowanpa Khüthak Zang-e ku to fong. Kue ibu pangwüi adu ang azong. Kue thünzak münkopüile kue awanle,

⁸ chemthüikoxle Zang a ozuima tüile, ilaxle chixe ku a oma chemchu chitikkya mixle ahoüi. Owawae ku ma kaxhux-fe angkya mongchong ang chami? khwalo to tsetwon ang tomle paohu hax! Chixe ku ma kaxhux fekya nax apüikox!

⁹ Jowanpa Khüthak Zang-e ku kho-awaüi — jangchangba, ku thaikya owae aho thoüi? Ku ma kaxhux fekya pangwüi paole samüi; hwom pangwüi saxfoe saxkya nyi sumle sampupule samdaoüi.

¹⁰ Jowanpa to achuak-achenle tüikya hünzom pangwüi ilaxle chix dapa kax ma laxle tüikyabu, hünzom lekya lomtang a zangnak tukle chang koxlax, ikoxlechu Jowanpa to mongong thomlax, Zang to chalom lax.

¹¹ Mix fün ama ang olom zingle ngokya hünzom pangwüi hünzom pangwüi mae zingkya olom ma maxüi. Ija ile Jowanpa chix tomtae chang ang tomüi; hünzome wün ang chimüikya shoma thangnak apongüi.