ISAIA 5 - OTSAO BAIBEL (BSI)

Grep Haxtok ma Ngaokya Tsai

¹ Kue ija tsai ngaopongma apalax, ku zuikhui hia chix grep haxtok tsai: Ku zuikhui ang grep haxtok tuita tüikya haxzaoe awangkya haxhua tuita ma.

² Chixe hax tho ilaxle ikha angkya longbu atsao; chixe sümüikya grep zubu küi. Ibu nye angkya hanpakma chixe ding homsabu zai, ilaxle grepbu nak ang tswomkha tho. Chixe grep jum angkya tanle ngo, ikoxle grep ziak pangwüi osik ang achang.

³ Ikhoma athax ku zuikhuie thüi: “hünzom Judah hia Jerusalem ma ngokya khünaknu, ku hia ku grep haxtok bama kaxfünle fahüi.

⁴ Kue ija thomwot ma chimokle athakya tüidaocha? Chichangthüiba, kue sungkya ningle chichangle chixe grep ziak osik büthüikoxle ziakpu?

⁵ “Kue ku grep haxtok to ile mok angkya changle; kue ija akhople tüikya tsawat paoüi, ija to tsyenle thomkya katuk atsunüi, ilaxle faomüie ibu naxsaxkox tamchu nakle naxakhixkox.

⁶ Ija khama hingzang wüi naxnyemkox. Kue ozubu sexle münchang chichangba haxkhutle akhixle münchang; itülüi kue ija to kongbüi hia huxbue awangle chang ang tomüi. Kue ija ding to zangwat angkya zangfwom münabax.”

⁷ Israel nok a Khüthak Jowanpa haxtok changle; Judah angkya khünaknu a küi angkya zubu changle. Chem müipuix ija moküile chixe hwom to mongong, ikoxle hwom mixe mixmik amütle chang. Chem supuix ija moküile chixe hwom to mongong, ikoxle hwome chakmokle changdaokyabue sukya kaxfün fahüile akhong.

Khünaknue Mokkya Ochax

⁸ Hünzom a maxdaoa! Hünzome tüile ngoünkya tok to obo ang hom-hax hia manzai haxtokbu shaktüi. Alüile chingole haxtok ma nang boboma owachu ngo ang onui chitüile changüi.

⁹ Khüthak Jowanpa kax kue atatdaoa: “Ibu chongkya hia osün müikya homnubu homhua ang achangle paoüi.

¹⁰ Zangdom tuita ma zaile alaikya grepti-ju pe achyet wüi fyetle tsuaküi. Khia hota puli zampa küikoxle khia bün achyet wüi kopüi.”

¹¹ Hünzom a maxdaoa! Hünzom juling saxsaxle chang ang swomsae kai wüi zopu, ilaxle zangnak ma chuwüi sudaole jutok ngopu.

¹² Hünzom pwonle le changpongma, hünzom waxmai, khopsya hia thuaput, ibu füi ju kop. Ikoxlechu Jowanpae chempang moktüipuix hünzome müntik,

¹³ ikhokho ma hünzom a zandabu ang koplaxle paoüi. Hünzom lompabu a zikle paole woknuake lopüi ilaxle zangjang khünakbu a tilan ma ziüi.

¹⁴ Amalum a hwom bama woknuak maxle, ilaxle ija owikha lanle akakox. Mwop-mwop-tsatsale ngonuikya zangjang khünaknu füi tomle ijae Jerusalem angkya pünlix-wangchongbu jokle ling.

¹⁵ Pangnusa wüi chingchacha chitüile awütüi ilaxle owa angamle ngolaxpuix chix a puinai ang tomüi.

¹⁶ Ikoxlechu sukya mwot mokkya tokhange Khüthak Jowanpae chix chongkya ahole, ilaxle chix khünak to kaxfün fakya tokhange chixe chix otsao angaile ahole.

¹⁷ Tingnu thomle maxkya tamting ma chun hosabue hia zwonsabue fum tsütle saxüi.

¹⁸ Hünzom a maxdaoa! Hünzom a hünzom ochaxbu chak tokya dale alai ang müntho.

¹⁹ Hünzome thüile: “Jowanpae chixe moküihex-ole akax daokya nonokhaile naxmokdao, ikoxle tix kwome ija ngünle lax ang thoüi. Israel nok otsao Zang-e chix mwot mokle naxle-kox; chix mongto chemle texpuix, keme shong-huhax.”

²⁰ Hünzom a maxdaoa! Hünzome ochax ang otsaole ilaxle otsao ang ochaxle nyakle. Hünzome zangnak a zangngai ang achangle awüt ilaxle zangngai a zangnak ang achangle awüt. Chem sipuix ija hünzome tikya ang achang ilaxle oja tipuix ija a sikya ang achang.

²¹ Hünzom a maxdaoa! Hünzome hünzom a hwontüi-jelangkyabu, tüle tsingzaikyabu le thütle.

²² Hünzom a maxdaoa! Ju pe ma naomüibu! Ija lingkya zuma hünzom ang tüle mongchong!

²³ Ikoxlechu zuizun koplaxle hünzome thaikya khünak danle apao, ilaxle chithaikya mix ang sukya kaxfün kop ang chitomle abax.

²⁴ Ikhoma athaxpi, chemle tsaxsa hia fum zik asoxlaxle wün to zokle ashunpuix, ilailaile nang tsing a fuaküi ilaxle nang song chuile ngokyabu zanle ziüi üntoxle zangwin to pikle paoüi, chemthüikoxle hünzome Khüthak Jowanpa, Israel nok Zang-e kem hama anwot-anokya chilaxle awütkoxpu.

²⁵ Chix khünaknu füi Jowanpa ang mongmale, ilaxle hwom to sikangün angkya hanpakma chixe chak thüidaoa. Haxnubu sile aloxüi, ilaxle opang zile paolax puix ibu mang a tingjang lomnu to oma-oshix awütkya ningle ngoüi. Ile changkox-ngaxchu Jowanpa mongtsik münbak, ikhoma sikngün fa ang chix chak thüile wüi ngoüi.

²⁶ Tsailo nok sele lax angkya hanpakma Jowanpae mowan koxle. Haxtua-zangnam tokhange hwom ngui angkya, hwom hanpak ang chixe pipit mütle. Ilaxle nonokhaile tamchu otsuaktsuak ma akhangle hwom nguile!

²⁷ Hwom opupuchu china-chijua; hwom opupuchu chikho thule chilax. Hwom ang mikngüt ojao chihüi. Züpak tuita chida, chisox zu tuita fünle chipao.

²⁸ Hwom naxhixbu a tüle anaxle, ilaxle hwom hapnubu a hap ang achwonle tüile. Hwom man chisokbu a long-jan lailaile tsak, ilaxle hwom man-kanlin ochabu shangflo ningle anguix.

²⁹ Mailangbu müi langlaxle owaechu chix chak angkya owaechu pale chipao tho angkya nui to paolaxle tsekya ningle süpahibue sungdünle azax.

³⁰ Chemtue ija nyix nguile hüiüihex, hwome Israel nok zongto tinu-tichap to kaile azaxle akhongüi. Ija chaxwan to hulax! Zangnak hia künmax-mongshan tata! Zangngai a zangnaknue lingdaoa.