ISAIA 49 - OTSAO BAIBEL (BSI)

Israel, a Chaxwannu Nok hanpakma Zangngai tuita

¹ Ku kax to apalax, tsailo nokbu, hünzom khünak opang tsai to ngole tüipuix! Ku puxüi thoto wüi, Jowanpae ku zünle kop ilaxle ku a chix dapa ang kamle dan.

² Chixe ku kaxfa ang changlo füi ngaxchu anaxle zing. Chix chak makhange jao chixe ku khosünle kop. Chixe ku sanjun lailaile zingle alai, Thuile twon ang müile jao anaxle.

³ Chixe ku ang thüi: “Israel, nang a ku da changle; nang khokho ma, khünaknue ku achuaküi.”

⁴ Ku thüi: “Kue mokdaoa, ikoxle ija mongong angkya jao chitüile changle! Kue ku janzüi twondaoa, ikoxlechu tsuakkya kha chemchu chitüi.” Ikoxlechu ku zangwün khose angkya hanpakma kue Jowanpa to ongpu; kue mokdaokya khoma chixe ku ang hingho koxüi.

⁵ Ku puxüi thoto wüi, Jowanpae ku zünle kop; chix khünaknu sele apüi angkya hanpakma chixe ku chix chaktwon ang lax, chiakle samle ngokya Israel khünaknu sele asox ang. Jowanpae ku achuak-achenle chang; ku janzüi otong a chix tix changle.

⁶ Jowanpae ku ang thüi: “Ku dapa, nang hanpakma ku ang chongkya mwot tuita tüile. Nang a achongkya ang achang angkya tata le münchang Israel khünaknu opang ozün ma tüipuix, ikoxle kue nang a chaxwannu nok hanpak ang zangngai ang zingüi — ikoxle tix zangfang abakle sün ang tho angkya chang koxle.”

⁷ Israel nok otsao Zang hia khosünpae thüile zudakle mong amaxle ahai thomkya mix füi, owa to chaxwannu noke mongkünle tüipuix ilaxle owa apün-adakyabu dapa changpuix: “Hünzom dankya wanghompa-e ngünle laxüi ilaxle hwom chathua zakya aho ang ajongüi; wangchasae chu ija ngünüi, ilaxle hwom a nang tong to puile akhuxüi.” Ija a Jowanpae chix dapa zünle kopkya khoma changüi; Israel nok otsao Zang-e chix kaxtsao thomle.

Jerusalem Zingle Achatkya

⁸ Jowanpae chix khünaknu ang thüi: “Chemtue nang khosün angkya hanpak nguipuix, ku nangchi ma seüi ilaxle nang sopkya to lanüi. Kue nang nyeüi ilaxle kho-awaüi ilaxle nang makhange khünaknu pangnusa füi tsaotsüt zingle. Kue nang a tamchatle otingsütle ngo ang tomüi athax kua awütle thomkya hünzom haxtok ma.

⁹ Kue kople thomkyabu ang thüiüi, ‘Paolax!’ ilaxlechu zangnak fang to ngokyabu füi, ‘Zangngai to lailax!’, le thüiüi. Hwom a haxhua to fumtsütle ngokya chunbu ningle changüi;

¹⁰ Hwom a wokno-tilanle müntüiüi. Zanghan hia sak-haxe huakkyae hwom to mak münkoxüi, chemthüikoxle hwom a hwom to mongkünkyabue azuiüi. Chixe hwom a ti fuakle jen ngokya shuasa hato paoüi.

¹¹ “Haxnukho akaile kue lomnu zingüi ilaxle ku khünaknu aham angkya lomnu achwonüi.

¹² Ku khünakbu a tsailo tokhange nguiüi, shuakux hia hannopchi tokyabu a, ilaxlechu Aswan tokhange shuathong chitokya.”

¹³ Tsai ngaokox, zangdingkhobue! Mongmüile akhong kox, chaxwannue! Haxnubu ozing alaile tsai ngaokox! Jowanpae chix khünaknu mong asomüi; sikngün ashukle ngokya chix khünakbu to chixe chingchaüi.

¹⁴ Ikoxlechu Jerusalem angkya khünaknue thüi: “Jowanpae kwom awütdaoa! Chixe kwom alakdaoa.”

¹⁵ Ikhoma Jowanpae lan: “Honu tuitae ma naosa alak ang tho ang cha tamchu she-e ngünkya nao to chikün-chiluale tüi ang cha? Onu tuita ma naosa tuita alak ang thokoxle chu, kue hünzom alak ang müntho.

¹⁶ Jerusalem, kue nang alak ang müntho! Kue hünzom mün ku chakfa ma zale kopdaoa.

¹⁷ “Tamchatle nang zingle amüi angkyabu chwonle nguingole, ilaxle nang amale ngokyabu paoüi.

¹⁸ Nang akhople hulax ilaxle chempang changle ngopuix ngünlax! Nang khünaknu asoxle ngole — hwom a hom to nguile ngole! Chemle ku ozün ma ngokya Zang changpuix, nang a nang khünaknu hanpakma mongngamkya tüiüi, tui to juüi mixcha tuita she likwün bama ngamkya ningle.

¹⁹ “Nang haxtok a amale owachu chingole changdaokya— ikoxle athax ija a hidaoküsa ang achangüi ikhato ngo ang nguingokyabu hanpakma. Ilaxle opange nang amale dantoxpuix ibu a nang füi ochu to atsaile apaoüi.

²⁰ Zanda ang ngopongma mix chaxwan to pux-paikya nang khünakbu ibue nyixta nang ang thüiüi: ‘Ija haxtok a huanuma hixle — kwom ngo angkya hanpakma onui huanuma lax angkya changle!’

²¹ Ifüima hünzome ma füi alüile akaxüi: ‘Nang hanpakma ibibi su-sa hwom owae puxle alai? Kue ku naosombu amütdaoa ilaxle athax tuita chu müntüi. Ku a mixnok chaxwan to jwonle asam — owae naosom ibu tsomle atsün? Ku a ku tata sa dantox — naosom ibu ojong tokhange hüi?’”

²² Jowanpa Khüthak Zang-e chix khünakbu füi akax: “Kue chaxwannu nok ang münwan ahoüi, ilaxle hwome nang naosom hom to apüiüi.

²³ Wanghombu a nang zongto mapabu ningle changüi; wangchanubu a nang zongto honu hwom ningle changüi. Hwom nang chitong to puiüi ilaxle nang achuaküi; hwome puinaikya füi hünzom chathua zakya ahoüi. Izuma hünzome ku a Jowanpa changpule awanüi; kue fong angkya tanle hungokya ku khünak owa angchu mong münatho.”

²⁴ Hünzome süpahi kux tsuikya pao ang thoüi hia? Mixtsak naomüie kople thomkya mix süntsuak ang chami?

²⁵ Jowanpae lan: “Ija a chemle changüihex ija changpu. Süpahibu kople thomkyabu a tswonle paoüi, ilaxle mixtsak-naomüie tsui kopkya tuina pale kopüi. Nang füi azankya mix füi ku azanüi, ilaxle kue hünzom naosom hwom kho-awa kopüi.

²⁶ Kue hünzom to zothuple ngokya lüile tata alangle chang ang tomüi; hwom a mix-lang mix-huakkya hia chichangchizangle tüikyae mwote tokle changüi. Ifüima khünaknüsa noke wüi ku a Jowanpa changpule awanüi, hünzom khosün üntoxle hünzom danle changkya mix lea. Hwome ku a tsak-zongle tüikya Israel nok Zang changpule awan ang kopüi.”