ISAIA 46 - OTSAO BAIBEL (BSI)

¹ “Ija a Babilon nok baozangbu ashukkya ang achangüi! Tam a Bel hia Nebo hwom to shwomle tüikya, ikoxle athax hwom mantsak khoma hünzingle tüile, na-juale maxkya müibu tok ma a.

² Chapabue hwom lailai to sün ang chitho; hwom a kop ilaxle tsui pao. Ija a Babilon nok baozangbu oshuk ang changüi!

³ “Ku kax to apalax, Jakop sixli hwome, ku khünaknu kha angkya atatle tokyabu pangwüi. Nang puxkya makhange wüi kue nang to humele hüipu.

⁴ Ku a hünzom Zang changpu ilaxle kue hünzom to humele thomüi hünzom azule khothokya kople a. Hünzom kue zingpu ilaxle kue humele thomüi; kue hünzom to fongüi ilaxle hünzom khosünüi.

⁵ “Jowanpae thüi: Hünzome ku owa füi apyenüi? Ku lailaikya mix tüichami?

⁶ Khünaknu ma nyitsong dong ilaxle hunbu thok; khopjanbu hwome tuak ma thüt. Baozang zingle alai angkya hanpakma hwome hun jao mix apüi; ifüima hwome ija tong to puile akhuxle shwom!

⁷ Hwome ija hwom suakto ma dan ilaxle azya; hwome ija onui ma dan, ilaxle ija ikhama ajongle ngo, ikha angkya ija achexle pao ang chitho. Owawae ija to jop-tole jangchangba, ijae chemle chu chilan chichangba thama chak tokya chix azün ang chitho.

⁸ “Ija texle ataklax, hünzom ochax khünakbu; kue chem mokle tsuakdaopuix ija awanlax.

⁹ Kaipongma chempangle changdaopuix texle ataklax; Zang a ku tata wüile ongkya tüilax chemthüikoxle ku lailaikya tamchatle owachu chitüi.

¹⁰ Chempang changle ngaipuix ibu bama kue pongwang tokhange wüi ajepu; chempangle chang angkya hex kaitanto wüi kue akax. Kue ajangkya mwot chichang homtoxle müile le kue thüipu, kue moküile mong ma texpupu kue moküi.

¹¹ Kue handün chitokya khünak tuita ngui ang se; chix a lawang pile ju pupule juüi ilaxle kue chempang mwotlom zingle tüipuix ija mokle alaiüi. Kue akaxdaoa, ilaxle ija tsuak angkya wüi.

¹² “Ku kax to apalax, hünzom kheba chithüikyabu lüt angkya a ochu towüile owae thüipuix.

¹³ Lüt angkya din kue chwonle ahüiüi — ija a tsailo towüi lejao münchang. Kue anao angkya shenle ngoüi münchang. Kue Jerusalem sünle kopüi ilaxle ikhama Israel nok hato achuak-achenkya apüiüi.”